ខេត្តកណ្តាល ៖ ក្នុងឱកាសចុះបំពេញការងារនៅស្រុកអង្គស្នួល កាលពីថ្ងៃទី២៩ កក្កដា លោករស់ វណ្ណា អនុប្រធានទី១គណៈដឹកនាំគណៈពង្រឹងមូលដ្ឋានស្រុកអង្គស្នួល និងជាប្រធានក្រុមការងារថ្នាក់កណ្តាលចុះជួយឃុំ២ គឺឃុំបែកចាន និងឃុំក្រាំងម្កាក់ រួមនឹងក្រុមការងារជាច្រើនរូបទៀត បានចុះទៅពិនិត្យមើលដំណើរការសាងសង់សមិទ្ធផលនានាក្នុងឃុំក្រាំងម្កាក់ក្នុងនោះមានអគារទីចាត់ការសាលារៀន១ខ្នងធ្វើពីបេតុងប្រក់ក្បឿងមាន៣បន្ទប់ និងអគារសិក្សា១ខ្នង ធ្វើពីបេតុងប្រក់ក្បឿងកម្ពស់២ជាន់ស្មើនឹង១២បន្ទប់ ស្ថិតក្នុងអនុវិទ្យាល័យ ហ៊ុន សែន អង្គពពាយ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងលោកជំទាវ កិត្តិព្រឹទ្ធបណ្ឌិត ។ មកដល់ពេលនេះ អគារទីចាត់ការសម្រេចការសាងសង់បានប្រមាណ៩០%ហើយអគារសិក្សាបាននិងកំពុងដំណើរការសាងសង់។
គួរបញ្ជាក់ថា បន្ទាប់ពីកសាងរួចរាល់អនុវិទ្យាល័យ ហ៊ុន សែន អង្គពពាយ នេះ តាមការអនុញ្ញាតដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គ្រោងនឹងដំឡើងទៅជាវិទ្យាល័យវិញ ដែលជាការជួយសម្រួលការធ្វើដំណើរទៅរៀនឆ្ងាយរបស់សិស្សានុសិស្សដែលមានលំឋានក្នុងឃុំនេះ និងនៅឃុំជុំវិញនេះជាច្រើនបានមករៀននៅទីនេះ ។ ជាមួយនឹងការចុះពិនិត្យការងារសាងសង់នេះដែរ លោករស់ វណ្ណា បានណែនាំដល់អ្នកម៉ៅការសាងសង់ សូមឲ្យយកចិត្តទុកដាក់លើការសាងសង់ដោយធ្វើទៅតាមបទដ្ឋានបច្ចេកទេសត្រឹមត្រូវ ធានាបានទាំងគុណភាព សោភ័ណភាព និងការប្រើប្រាស់យូរអង្វែង ។
ឆ្លៀតក្នុងឱកាសនោះដែរ លោករស់ វណ្ណា រួមនឹងក្រុមការងារ បានអញ្ជើញចូលរួមជាមួយពុទ្ធបរិស័ទក្នុងពិធីបុណ្យផ្កាសាមគ្គី និងពិធីបុណ្យសិតទៀនព្រះវស្សាក្នុងវត្តខ្ពប ស្ថិតក្នុងឃុំក្រាំងម្កាក់ ព្រមទាំងបាននាំយកទេយ្យវត្ថុ គ្រឿងឧបភោគបរិភោគ លំដាប់ចំណាំព្រះវស្សា និងបច្ច័យប្រគេនដល់ព្រះសង្ឃដែលកំពុងគង់ចាំព្រះវស្សាក្នុងវត្តចំនួន៥ដែលក្នុង១វត្តៗប្រគេនទៀនព្រះវស្សា១គូ សាដក,អង្ករ,ប្រេងម៉ាស៊ូត,មី,ទឹកត្រី,ទឹកស៊ីអីុវ,ប៊ីចេង,ត្រីខ,ទឹកក្រូច,ទឹកបរិសុទ្ធ និងបច្ច័យចំនួន២សែនរៀល និងដោយឡែកប្រគេនចូលរួមបុណ្យផ្ការស្មីសាមគ្គីវត្តខ្ពបបច្ច័យចំនួន២លាន៣សែនរៀល ។
ជួបសំណេះសំណាលជាមួយប្រជាពលរដ្ឋដែលមកចូលរួម លោករស់ វណ្ណា បានថ្លែងកោតសរសើរដល់អាជ្ញាធរនិងប្រជាពលរដ្ឋក្នុងមូលដ្ឋាន ដែលរួមគ្នាបង្កើតបានជាសមិទ្ធផលថ្មីៗជាច្រើនទាំងពុទ្ធចក្រ និងអាណាចក្រនៅទូទាំងឃុំ ។ ទន្ទឹមនឹងនេះ លោកបានជំរុញលើកទឹកចិត្តឱ្យយកអស់គ្រប់លទ្ធភាពក្នុងការងារបង្កបង្កើនផលស្រូវរដូវវស្សាឆ្នាំនេះ ជាពិសេសត្រូវប្រុងប្រយ័ត្នចំពោះគ្រោះធម្មជាតិផ្សេងៗដូចជាខ្យល់ព្យុះ ទឹកជំនន់ និងរន្ទះបាញ់ជាដើម ។ លោកក៏បានជម្រាបជូនផងដែរពីព្រឹត្តិការណ៍ថ្មីៗនាពេលកន្លងទៅ និងទទួលបានជោគជ័យដូចជា ការទទួលធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី២០ និងកិច្ចប្រជុំរដ្ឋមន្ត្រីការបរទេសអាស៊ានលើកទី៤៥ ដែលនេះគឺជាមោទនភាពរបស់ប្រជាជាតិកម្ពុជាទាំងមូល ៕
ចែករំលែកព័តមាននេះ