រាជធានីភ្នំពេញ ៖ នាព្រឹកថ្ងៃទី៣០ ខែកក្កដា ឆ្នាំ២០១២ នៅសណ្ឋាគារសាន់វេ មានបើកកិច្ចប្រជុំមួយរបស់គណៈកម្មការដឹកនាំគម្រោងប្រព័ន្ធស្វ័យប្រវត្តិកម្មទិន្នន័យគយអាស៊ីគូដា (PSC) លើកទី១១ ក្រោមអធិបតីភាពលោកបណ្ឌិតប៉ែន ស៊ីម៉ន ប្រតិភូរាជរដ្ឋាភិបាល ទទួលបន្ទុកជាអគ្គនាយកគយ និងរដ្ឋាករកម្ពុជា និងជាប្រធាន PSC ។
សមាសភាពចូលរួមមាន សមាជិកក្រុមផ្តល់ប្រឹក្សាបច្ចេកទេស (TAG) សមាជិកក្រុមការងារគម្រោងជាតិ (NPT) មន្ត្រីគយសាខា ការិយាល័យគយដែលអនុវត្តប្រព័ន្ធ តំណាងក្រសួងពាក់ព័ន្ធ តំណាងដៃគូអភិវឌ្ឍន៍ តំណាងគម្រោងកិច្ចសម្រួលពាណិជ្ជកម្ម និងការប្រកួតប្រជែង (TFCP) តំណាងកម្មវិធីគាំទ្រការអភិវឌ្ឍពាណិជ្ជកម្ម (TDSP) តំណាងក្រុមហ៊ុន WebbFontaine, Resolvo ព្រមទាំងតំណាងវិស័យឯកជន ។
លោកបណ្ឌិតប៉ែន ស៊ីម៉ន បានមានប្រសាសន៍ថា កិច្ចប្រជុំនេះជាកិច្ចប្រជុំលើកទី១១ និងជាលើកចុងក្រោយនៃការអនុវត្តគម្រោងប្រព័ន្ធប្រវត្តិកម្មទិន្នន័យគយអាស៊ីគូដា ក្រោមគម្រោងកិច្ចសម្រួលពាណិជ្ជកម្ម និងការប្រកួតប្រជែង(Trade Facilitation Competiveness Project-TFCP) គាំទ្រថវិកាពីធនាគារពិភពលោក ។ ការអនុវត្តគម្រោងនេះមានរយៈពេល៦ឆ្នាំគត់ គិតពីខែកក្កដា ឆ្នាំ២០០៦ ដល់ខែកក្កដា ឆ្នាំ២០១២ ។ លទ្ធផលសម្រេចបានសំខាន់ៗរួមមាន បានកសាង និងបានដាក់ឱ្យអនុវត្តនូវឯកសាររដ្ឋបាលតែមួយ (SAD) បានដាក់ឱ្យអនុវត្តនូវមុខងារប្រព័ន្ធនិវេទន៍ប័ណ្ណ បានដាក់ឱ្យអនុវត្តនូវមុខងារភណ្ឌាគារគយមានដែនកំណត់ និងបានដាក់ឱ្យអនុវត្តគម្រោងប្រព័ន្ធស្វ័យប្រវត្តិកម្មទិន្នន័យគយ (ASYCUDA) នៅមាត់ច្រកគយសំខាន់ៗចំនួន២០កន្លែង ដែលគ្របដណ្តប់ជាង៩៥%នៃកិច្ចប្រតិបត្តិការឯកសាររដ្ឋបាលតែមួយ (SAD) សរុបទូទាំងប្រទេស ។
ដើម្បីធានានូវនិរន្តរភាពនៃការអនុវត្តបន្តផែនការកែទម្រង់១២ចំណុច ដើម្បីអភិវឌ្ឍន៍វិស័យឯកជនរបស់រាជរដ្ឋាភិបាលកម្ពុជា ជាពិសេសការអនុវត្តយន្តការបញ្ជរតែមួយជាតិ អង្គប្រជុំបានគាំទ្រផែនការសកម្មភាពអនុវត្តបន្តគម្រោងនេះ ក្រោមគម្រោងថ្មី គឺកម្មវិធីគាំទ្រអភិវឌ្ឍន៍ពាណិជ្ជកម្ម (Trade Development Support Program-TDSP) គាំទ្រថវិកាពីធនាគារពិភពលោក សម្រាប់រយៈពេល១៨ខែទៀត ដើម្បីពង្រីកបន្ថែមទៀតមុខងារប្រព័ន្ធឱ្យអនុវត្តពេញលេញសម្រាប់ឆ្ពោះទៅអភិវឌ្ឍន៍ និងអនុវត្តគម្រោងបញ្ជរតែមួយជាតិ(National Single Window) និងបញ្ជរតែមួយអាស៊ាន(ASEAN Single Window) ។
លោកបណ្ឌិតប៉ែន ស៊ីម៉ន បានបង្ហាញនូវការកោតសរសើរ និងជឿជាក់ដល់ក្រុមការងារគម្រោងជាតិអាស៊ីគូដា ដែលមានសមត្ថភាព ភាពជាម្ចាស់ក្នុងការគ្រប់គ្រង ប្រើប្រាស់ និងថែរក្សាប្រព័ន្ធនេះ និងបានថ្លែងអំណរគុណដល់ដៃគូអភវិឌ្ឍន៍ វិស័យឯកជន ព្រមទាំងក្រុមការងារដែលពាក់ព័ន្ធទាំងជាតិ និងអន្តរជាតិទាំងអស់ ដែលបានសហការ និងគាំទ្រការអនុវត្តគម្រោងនេះដោយជោគជ័យ ៕
ចែករំលែកព័តមាននេះ