ខេត្តកំពត ៖ បុរសម្នាក់ឈ្មោះទិត្យ សីហា អាយុ២០ឆ្នាំ ដោយសារខឹងប្រពន្ធក៏បានផឹកថ្នាំសម្លាប់សត្វល្អិតបញ្ចប់ជីវិតរបស់ខ្លួនកាលពីវេលាម៉ោង៧និង៣០នាទីយប់ថ្ងៃទី២៩ កក្កដា នៅនឹងផ្ទះរបស់ខ្លួនស្ថិតក្នុងភូមិអង្គរជ័យ២ ឃុំដំណាក់កន្ទួតខាងត្បូង ស្រុកកំពង់ត្រាច ។ អ្វីដែលគួរឱ្យកត់សម្គាល់នោះ គឺទោះជាមានករណីផឹកថ្នាំសម្លាប់ខ្លួនបែបនេះក្តីក៏ក្រុមសាច់ញាតិខាងប្តីហាក់ដូចជាមិននិយាយជាចំហពីទំនាស់ក្នុងគ្រួសាររហូតឈានដល់ការផឹកថ្នាំពុលសម្លាប់ខ្លួននេះឡើយ ។
ប្រភពនានាឱ្យដឹងថា បុរសដែលផឹកថ្នាំពុលសម្លាប់ខ្លួននេះទើបតែរៀបការប្រពន្ធបានជាង៣ខែប៉ុណ្ណោះ ហើយប្រពន្ធក៏មានផ្ទៃពោះផងដែរ ។ មុនពេលកើតហេតុ២ថ្ងៃ គេឃើញទាំង២នាក់ប្តីប្រពន្ធនេះហាក់ដូចជាមិនសូវត្រូវគ្នាទេ គឺមានជម្លោះផ្ទៃក្នុងដែលតាមដឹងគឺផ្តើមចេញពីរឿងលុយ ។ បើយោងតាមមន្ត្រីនគរបាលស្រុកដែលចុះទៅធ្វើកំណត់ហេតុឱ្យដឹងថា ឪពុកម្តាយខាងស្រីបានចែកដីឱ្យប្តីប្រពន្ធនេះធ្វើតូបលក់ដូរមួយនៅជាប់មុខផ្ទះ ដែលដីនោះមានតម្លៃលក់២លានរៀល ហើយក៏បានឱ្យក្រុមសាច់ញាតិខាងប្រពន្ធចាត់ចែងលក់ដីនេះ ។ ប៉ុន្តែពេលលក់មិនបាន២លានរៀលទេ គឺបានតែ១លានរៀល ហើយក្នុងមួយលានរៀលនោះប្រពន្ធបង្ហាញប្តីតែ៧០ម៉ឺនរៀលគឺបាត់៣០ម៉ឺនរៀល ក៏មានការសួរដេញដោលប្រពន្ធពីរឿងបាត់លុយនេះ ទើបឈានទៅមានរឿងរ៉ាវជម្លោះផ្ទៃក្នុងគ្រួសាររហូតតមមាត់តមកមិននិយាយរកគ្នាទៀតផង ។
ប្រភពដដែលបន្តទៀតថា លុះមកដល់ល្ងាចថ្ងៃទី២៩ កក្កដា បុរសជាប្តីបានចូលដេកក្នុងបន្ទប់មុន និងបានលួចផឹកថ្នាំបំពុលសត្វល្អិតសម្លាប់ខ្លួន លុះពេលប្រពន្ធដើរចូលទៅតាមក្រោយឃើញប្តីបែកពពុះមាត់ទៅហើយ ក៏ដឹកទៅកាន់មន្ទីរពេទ្យស្រុកភ្លាមៗ តែអ្វីៗយឺតពេលទៅហើយដោយសារបុរសជាប្តីបានស្លាប់នៅត្រឹមពាក់កណ្តាលផ្លូវទៅកាន់មន្ទីរពេទ្យ ។ ក្នុងការត្រួតពិនិត្យ នគរបាលក៏បានរកឃើញសំបកថ្នាំសម្លាប់សត្វល្អិតដែលបុរសរូបនេះលួចយកទៅផឹកផងដែរ ៕
ចែករំលែកព័តមាននេះ