ខេត្តបន្ទាយមានជ័យ ៖ នៅរសៀលថ្ងៃទី២៧ កក្កដា លោកណុប រក្សា អ្នកឆ្លើយឆ្លងព័ត៌មានប្រចាំស្នងការដ្ឋាននិងសារព័ត៌មានកោះសន្តិភាពប្រចាំខេត្ត បាននាំយកអំណោយជាថវិការបស់លោកអ៊ុក រ៉ាប៊ុន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងលោកជំទាវជាភរិយា លោកឧកញ៉ាស្រី ងួន និងលោកជំទាវឧកញ៉ាស្រី វុទ្ធី ព្រមទាំងបុត្រ សរុបទាំងអស់ចំនួន៩០០ដុល្លារ ដោយធ្វើការបែងចែកចំនួន៣០០ដុល្លារប្រគល់ជូនលោកតាឱ គង់ អាយុ៩៣ឆ្នាំ មានជំងឺសម្រាកតែលើកន្ទេល និងលោកយាយធិប យិប អាយុ៨៨ឆ្នាំ ត្រចៀកថ្លង់ជាភរិយាមើលថែតា ទាំងវ័យចាស់ជរាដូចគ្នា និងមានជីវភាពក្រីក្ររស់នៅជាមួយកូនប្រុសម្នាក់ដើរធ្វើជាកម្មករស៊ីឈ្នួលគេឈ្មោះឱ ចាន់ អាយុ៣៨ឆ្នាំនៅភូមិកោះកែវ ឃុំប្ញស្សីក្រោក ស្រុកមង្គលបុរី ។
ចំណែកទឹកប្រាក់២០០ដុល្លារជូនលោកជី វ៉ាន់ស៊ុយ តារាកំប្លែងនិងជាអ្នកចម្រៀង ដែលមានជំងឺដុះសាច់ក្នុងថ្លើមកំពុងសម្រាកព្យាបាលនៅភូមិបឹងត្រស់ ឃុំភ្នំតូច ស្រុកមង្គលបុរី ដែលជំងឺរបស់លោកធ្ងន់ធ្ងរណាស់ទៅហើយ ។ នៅព្រឹកថ្ងៃទី២៨ កក្កដា លោកណុប រក្សា ក៏បាននាំយកអំណោយជាថវិកា ចំនួន៤០០ដុល្លារទៀត ទៅប្រគល់ជូនដល់ដូនចាស់មានអាយុ១០០ឆ្នាំចំនួន២នាក់នៅភូមិទ្រាស ឃុំគោកកឋិន ស្រុកថ្មពួក គឺលោកយាយទុំ សាធ អាយុ១០២ឆ្នាំ និង លោកយាយ គង់ លង អាយុ
១០១ឆ្នាំ ដែលសព្វថ្ងៃនេះលោកយាយទាំង២នាក់កំពុងស្ថិតក្នុងវ័យចាស់ជរាណាស់ទៅហើយ។ លោកយាយទាំង២នាក់ក្នុងម្នាក់ៗទទួលបានអំណោយជាថវិកាចំនួន២០០ដុល្លារ។ រាល់សកម្មភាពដែលនាំយកអំណោយទៅប្រគល់ជូននេះ ក៏មានមន្ត្រីនគរបាលមូលដ្ឋាន និងអាជា្ញធរឃុំ លោកមេភូមិចូលរួមផងដែរ ។
លោកណុប រក្សា បានជម្រាបជូនអ្នកដែលបានទទួលអំណោយទាំងនោះថា អំណោយដែលនាំយកមកប្រគល់ជូននាពេលនេះ គឺជាការផ្តល់ជូនរបស់លោកបណ្ឌិតអ៊ុក រ៉ាប៊ុន រដ្ឋមន្ត្រីប្រតិភូអមនាយករដ្ឋមន្ត្រីនិងជារដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងលោកជំទាវជាភរិយា លោកឧកញ៉ាស្រី ងួន ព្រមទាំងលោកជំទាវឧកញ៉ាស្រី វុទ្ធី និងបុត្រដែលបានផ្តល់តាមរយៈកោះសន្តិភាពឲ្យយកមកប្រគល់ជូនដល់ដៃលោកតាលោកយាយដល់គេហដ្ឋាន ។
លោកយាយទាំង៣នាក់ និងលោតា រួមទាំងលោកជី វ៉ាន់ស៊ុយផង បានថ្លែងអំណរគុណដល់លោកបណ្ឌិត អ៊ុន រ៉ាប៊ុន និងលោកជំទាវជាភរិយា លោកឧកញ៉ាស្រី ងួន និងលោកជំទាវឧកញ៉ាស្រី វុទ្ធី ព្រមទាំងបុត្រ ដែលបានលះបង់ធនធានផ្ទាល់ខ្លួនដ៏ច្រើនសន្ធឹកសន្ធាប់ចែករំលែកជូនពួកគាត់ ដែលកំពុងមានការខ្វះខាតយ៉ាប់យឺុន និងកំពុងតែមានជំងឺប្រចាំកាយផងនេះ។ ពួកគាត់សូមជូនពរជ័យសិរីមង្គលដល់ក្រុមគ្រួសាររបស់លោក លោកជំទាវ លោកឧកញ៉ាសូមឲ្យជួបតែសេចក្តីសុខ សេចក្តីចម្រើនឈ្នះអស់មារសត្រូវទាំងឡាយទាំងពួង។
ជាមួយនេះសូមឲ្យទេវតាដែលមានឫទ្ធីបារមីគ្រប់ទិសទីកំពុងថែរក្សាទឹកដីកម្ពុជាក៏សូមឲ្យជួយថែរក្សាក្រុមគ្រួសាររបស់លោកនិងលោកជំទាវ លោកឧកញ៉ានិងលោកជំទាវឧកញ៉ាឲ្យជួបតែសេចក្តីសុខ សេចក្តីចម្រើននិងមានសំណាងល្អជារៀងរហូត ៕
ចែករំលែកព័តមាននេះ