រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់សាលាក្តីខ្មែរក្រហមចុះថ្ងៃទី៣០ កក្កដា បានសរសេរថា ថ្ងៃទី១២ កក្កដា ឆ្នាំ២០១២ រាជរដ្ឋាភិបាលកម្ពុជា បានជូនដំណឹងទៅអង្គការសហប្រជាជាតិអំពីសេចក្តី សម្រេចរបស់ឧត្តមក្រុមប្រឹក្សានៃអង្គចៅក្រមនៃព្រះរាជាណាចក្រកម្ពុជា កាលពីថ្ងៃទី២០ មិថុនា ឆ្នាំ២០១២ ដែលបានតែងតាំងសហចៅក្រមស៊ើបអង្កេតអន្តរជាតិ លោក ម៉ាក ហាម៉ុន ជនជាតិអាមេរិក និងសហចៅក្រមស៊ើបបម្រុងអន្តរជាតិ លោក អូលីវីយេ បូរ៉ាឡេត ជនជាតិបារាំង នៅអង្គប្រជុំជម្រះវិសាមញ្ញក្នុងតុលាការកម្ពុជា (អ.វ.ត.ក)។
អង្គការសហប្រជាជាតិកំពុងតែរៀបចំការចេញដំណើររបស់លោក ហាម៉ុន មកកាន់រាជធានីភ្នំពេញ ដើម្បីចាប់ផ្តើមបំពេញការងាររបស់លោក ។ ការចាប់ផ្តើមការងាររបស់លោក ហាម៉ុន នឹងធ្វើឱ្យអ.វ.ត.ក អាចបន្តកិច្ចការដ៏សំខាន់របស់ខ្លួនក្នុងការដាក់ឱ្យទទួលខុសត្រូវរបស់ឧក្រិដ្ឋកម្ម ដែលត្រូវបានប្រព្រឹត្តក្នុងអំឡុងរបបកម្ពុជាប្រជាធិបតេយ្យ ៕
ចែករំលែកព័តមាននេះ