ខេត្តបាត់ដំបង ៖ រថយន្តធុនធ្ងន់មួយគ្រឿងដែលសមត្ថកិច្ចសង្ស័យថា ផ្ទុកអង្ករលើសចំណុះបានផ្ទុះកង់ក្រោយបណ្តាលឱ្យឆេះ បង្កការភ្ញាក់ផ្អើលយ៉ាងខ្លាំងដល់អ្នកដំណើរតាមដងផ្លូវ ខណៈដែលរថយន្តនេះកំពុងបើកបរលើកំណាត់ផ្លូវជាតិលេខ៥ កាលពីវេលាម៉ោង១១និង២៥នាទីព្រឹកថ្ងៃទី៣០ កក្កដា ត្រង់ចំណុចភូមិពុកឆ្មា ឃុំអន្លង់វិល ស្រុកសង្កែ តែសំណាងល្អបានអ្នកភូមិ និងរថយន្តពន្លត់អគ្គិភ័យធ្វើអន្តរាគមន៍ពន្លត់ទាន់ពេល ។
សមត្ថកិច្ចមូលដ្ឋានបានឱ្យដឹងថា រថយន្តនោះជាប្រភេទរថយន្តយីឌុបដឹកទំនិញ អ្នកបើកបរឈ្មោះ ជា ហ៊ូន អាយុ៤០ឆ្នាំ ដែលដឹកអង្ករពេញ ។ សមត្ថកិច្ចបញ្ជាក់ថា រថយន្តនេះ បានផ្ទុះកង់ក្រោយខាងឆ្វេង ហើយបណ្តាលឱ្យឆាបឆេះភ្លាមមួយរំពេច ខណៈកំពុងបើកបរ តែសំណាងល្អបានអ្នកភូមិជួយដងទឹកពន្លត់ទាន់ ហើយរថយន្តពន្លត់អគ្គិភ័យបានមកជួយអន្តរាគមន៍ទាន់ពេលវេលាដែរ កុំអីទាំងអង្ករ ទាំងរថយន្តក្លាយជាចំណីព្រះអគ្គីទៅហើយ ។
អ្នកបើកបររថយន្តបានប្រាប់ថា រថយន្តខ្លួនបានដឹកអង្កររបស់ក្រុមហ៊ុនវៀតណាម ចេញពីខេត្តព្រៃវែងឆ្ពោះទៅកាន់ច្រកតំបន់អូរបីជាន់ ស្រុកអូរជ្រៅ ខេត្តបន្ទាយមានជ័យ ដើម្បីនាំចេញទៅប្រទេសថៃ ប៉ុន្តែមកដល់ចំណុចខាងលើក៏ផ្ទុះកង់ឆេះសន្ធោសន្ធៅតែម្តង ។ បុរសនេះបញ្ជាក់ថា ពេលកំពុងធ្វើដំណើរក៏ស្រាប់តែផ្ទុះកង់លាន់ដូចគ្រាប់បែក ពេលឈប់មើលស្រាប់តែឃើញមានអណ្តាតភ្លើងឆាបឆេះហ៊ុយទ្រលោម ហើយភ្លាមៗអ្នកភូមិបាននាំគ្នាដងទឹកជួយពន្លត់ បន្តិចក្រោយមកទើបរថយន្តពន្លត់អគ្គិភ័យរបស់សមត្ថកិច្ចមកដល់ជួយពន្លត់ទាន់ពេល ។
លោក សាត គីមសាន នាយការិយាល័យចរាចរខេត្ត ដែលបានចុះពិនិត្យកន្លែងកើតហេតុ បាននិយាយថា រថយន្តនេះអាចមានកំហុស២ករណីដែលករណីទី១គឺ បញ្ហាបច្ចេកទេស កង់រថយន្តសឹកក្រឡា ទី២គឺអាចបណ្តាលមកពីរថយន្តនេះផ្ទុកលើសចំណុះ។ លោកបញ្ជាក់ថា រថយន្តអាចផ្ទុកអង្ករមិនតិចជាង៤០តោននោះទេ លុះពេលរត់ផ្លូវឆ្ងាយបណ្តាលឱ្យកកិតក្តៅកង់ ហើយផ្ទុះតែម្តង ។
គួរកត់សម្គាល់ថា បច្ចុប្បន្នរថយន្តដឹកទំនិញភាគច្រើនដែលធ្វើចរាចរលើផ្លូវជាតិលេខ៥ និងលេខ៥៧ ត្រូវគេសង្ស័យថា បានដឹកលើសទម្ងន់ដែលច្បាប់បានកំណត់ ។ ផ្លូវជាតិលេខ៥នៅត្រង់ចំណុចភូមិស្វាយកង់ ឃុំអន្លង់វិល ស្រុកសង្កែ គេឃើញមានក្រុមកុងត្រូលជជុះដុះស្លែមួយកន្លែង ដែលគេអះអាងថា ជាមន្ត្រីជំនាញចាំថ្លឹងរថយន្តដឹកលើសចំណុះ ។ ប៉ុន្តែតាមការពិនិត្យលើសកម្មភាពជាក់ស្តែងគឺគ្រាន់តែចាំកត់ក្បាលឡានរបស់ក្រុមហ៊ុនដឹកជញ្ជូន ឬឡានដឹកទំនិញធំៗរបស់ឯកជនដើម្បីយកប្រាក់តែប៉ុណ្ណោះ ។ កុងត្រូលដែលជ្រកក្រោមតៀមលក់ដូរផ្ទះអ្នកស្រុកខាងលើនេះ គឺមានច្រើនឆ្នាំហើយ តែរថយន្តដឹកលើសចំណុះនៅតែបន្តបំផ្លាញផ្លូវជាតិដដែល ។
ទោះជាបែបណាលោក គឹម ប៊ុនធឿន នាយការិយាល័យនគរបាលបង្ការពន្លត់អគ្គិភ័យបាននិយាយដែរថា រថយន្តបង្កអគ្គិភ័យនោះរងការខូចខាតកង់ខាងឆ្វេងទាំងស្រុង និងឆេះអង្ករមួយចំនួន ។ លោកបញ្ជាក់ថា នេះចាត់ទុកជាសំណាងហើយដែលអ្នកភូមិ និងរថយន្តអង្គភាពពន្លត់អគ្គិភ័យជួយអន្តរាគមន៍ទាន់កុំអីអាចខូចរថយន្តទាំងស្រុងតែម្តង ៕
ចែករំលែកព័តមាននេះ