រាជធានីភ្នំពេញ ៖ ក្នុងជំនួបពិភាក្សាការងារជាមួយលោក Joseph Yun ឧបការីរង រដ្ឋមន្ត្រីការបរទេសអាមេរិក នាព្រឹកថ្ងៃទី១៧ មីនា ឆ្នាំ២០១១ នៅទីស្តីការក្រសួងការបរទេស និងសហប្រតិបត្តិការអន្តរជាតិ លោកឧបនាយករដ្ឋមន្ត្រីហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ បានស្នើសុំឱ្យអាមេ រិកគិតគូររឿងបំណុលដែលកម្ពុជាជំពាក់អាមេរិកជាង៣០០លានដុល្លារទាំងការប្រាក់នោះឡើងវិញ។ សំណើរបស់កម្ពុជាមាន៣ចំណុច ចំណុចទី១-កម្ពុជាសុំឱ្យចុះការប្រាក់ពី៣% មកត្រឹម១%វិញ ក្នុងមួយឆ្នាំ ។ ចំណុចទី២-កម្ពុជាសុំបង្វែរបំណុល៧០% នៃបំណុលសរុបឱ្យទៅជាជំនួយអភិវឌ្ឍន៍លើគម្រោងអភិវឌ្ឍន៍ប្រទេសកម្ពុជា និងចំណុចទី៣-នៅសល់៣០% កម្ពុជានឹងធ្វើការចរចាដើម្បីសងទៅសហរដ្ឋអាមេរិកវិញ ។
ពាក់ព័ន្ធនឹងសំណើនេះ លោកឧបការីរង រដ្ឋមន្ត្រីការបរទេសអាមេរិកបានបញ្ជាក់ថា នៅថ្ងៃបន្ទាប់នេះលោកនឹងធ្វើការសិក្សាជាមួយនឹងក្រសួងសេដ្ឋកិច្ច និងហិរញ្ញវត្ថុកម្ពុជា ហើយលោកនឹងយកសំណើនេះទៅធ្វើការសិក្សា ។
ទាក់ទិនទៅនឹងបញ្ហាព្រំដែនកម្ពុជា -ថៃ លោកឧបនាយករដ្ឋមន្ត្រី ហោ ណាំហុង បានលើកបញ្ជាក់ថា កម្ពុជា នឹងទៅចូលរួមប្រជុំនៅពេលខាងមុខនេះ ចាប់ពីថ្ងៃទី៧ ដល់ថ្ងៃទី៨ ខែមេសា ឆ្នាំ២០១១ ទាំងគណៈកម្មការព្រំដែនចំរុះJBC និងគណៈកម្មការព្រំដែនទូទៅGBC ។ បញ្ហានេះ កម្ពុជាបានផ្តល់នូវទីតាំងសម្រាប់អ្នកសង្កេតការណ៍ឥណ្ឌូណេស៊ីរួចហើយ នៅតែភាគីថៃទេដែលមិនទាន់បានផ្តល់ ។ លោកឧបនាយករដ្ឋមន្ត្រីបានលើកជាចម្ងល់ថា កន្លងមកហេតុអ្វីបានជាភាគីថៃនៅតែនិយាយថា ខ្លួនចង់ចរចាជាមួយកម្ពុជាសិនទាក់ទិននឹងបញ្ហាទីតាំងនេះ ។ ព្រោះបញ្ហាទីតាំងដែលអ្នកសង្កេតការណ៍ឥណ្ឌូណេស៊ីបានដាក់ឱ្យមានរៀងខ្លួននោះ គឺកម្ពុជាមិនចាំបាច់ពិភាក្សាជាមួយថៃឡើយ កម្ពុជាបានកំណត់ទីតាំងនៅលើទឹកដីកម្ពុជារួចស្រេចហើយ ដូច្នេះថៃក៏មិនចាំបាច់ពិភាក្សាជាមួយកម្ពុជាដែរអំពីបញ្ហាហ្នឹង។ ខ្លួនត្រូវកំណត់នៅលើទឹកដីរបស់ខ្លួនទៅដើម្បីឱ្យអ្នកសង្កេតការណ៍គេចុះមកតាមគោលដៅ ។
លោកឧបនាយករដ្ឋមន្ត្រីបានមានប្រសាសន៍បន្តថា កម្ពុជាបានត្រៀមលក្ខណៈស្នើទៅតុលាការអន្តរជាតិទីក្រុងឡាអេឱ្យធ្វើការបកស្រាយអំពីសេចក្តីសម្រេចរបស់ខ្លួននៅឆ្នាំ១៩៦២ឡើងវិញ ។ ដោយសារឥឡូវនេះ បញ្ហាដែលស្មុគស្មាញនោះគឺថៃបានយកផែនទីឯកតោភាគីមកប្រើដែលអន្តរជាតិមិនទទួលស្គាល់ គូសខ្លួនឯងហើយបានកំណត់ដែនដីរបស់ខ្មែរថាជាដីរបស់ខ្លួន ។ ដូច្នេះហើយមានតែមធ្យោបាយមួយគត់គឺកម្ពុជាស្នើឱ្យតុលាការអន្តរជាតិទីក្រុងឡាអេបកស្រាយសាលក្រមសេចក្តីសម្រេចរបស់ខ្លួននៅឆ្នាំ១៩៦២ ឡើងវិញ។ ព្រោះក្នុងសេចក្តីសម្រេចនោះមាន៣ចំណុច ទី១-ប្រាសាទព្រះវិហារស្ថិតនៅក្នុងទឹកដីខ្មែរ ទី២-កងទ័ពឆ្មាំរបស់ថៃត្រូវដកចេញពីប្រាសាទព្រះវិហារ និងតំបន់ជុំវិញប្រាសាទព្រះវិហារ និងចំណុចទី៣-ឱ្យប្រគល់វត្ថុបុរាណដែលថៃយកពីប្រាសាទព្រះវិហារ និងនៅតំបន់ជុំវិញ ។ ឆ្នាំ១៩៦២ នោះថៃបានគោរព ក៏ប៉ុន្តែនៅពេលដែលប្រាសាទព្រះវិហារនេះចុះក្នុងបញ្ជីបេតិកភណ្ឌពិភពលោកនៅឆ្នាំ២០០៨ បែរជាថៃមកអះអាងដោយប្រើផែនទីឯកតោភាគី ដែលអន្តរជាតិមិនទទួលស្គាល់ទៅវិញ ។ ដូច្នេះហើយសំខាន់គឺមានតែតុលាការអន្តរជាតិទីក្រុងឡាអេ ធ្វើការបកស្រាយឱ្យបានច្បាស់លាស់ ពីព្រោះផែនទីគូរដោយបារាំង-សៀម ហើយសៀមខ្លួនឯងទៀតសោតក៏បានទទួលស្គាល់ ហើយអន្តរជាតិក៏ទទួលស្គាល់ តុលាការអន្តរជាតិក៏បានប្រើផែនទីនេះក្នុងការកាត់ក្តីដែរ ។ ថៃខ្លួនឯងទទួលស្គាល់ អនុវត្តន៍តាមសាលក្រមហ្នឹងហើយស្នើឱ្យបារាំងបញ្ជូនឱ្យខ្លួនថែមទៀតដើម្បីឱ្យអាជ្ញាធរតាមខេត្តរបស់ខ្លួននៅជាប់ព្រំដែនទុកប្រើប្រាស់ទៀតផង ។
ចំពោះរឿងនេះ លោក Joseph Yun ឧបការីរងរដ្ឋមន្ត្រីការបរទេសអាមេរិក បានថ្លែងថា ដោយសារកម្ពុជា-ថៃជាមិត្តសហរដ្ឋអាមេរិកដូចគ្នា ដូច្នេះអាមេរិកបានគាំទ្រចំពោះតួនាទីរបស់អាស៊ានក្នុងការជួយសម្រុះសម្រួលដោះស្រាយពីបញ្ហានេះ ។ អាមេរិកគាំទ្រទាំងបញ្ហាតួនាទីអ្នកសង្កេតការណ៍ ហើយនឹងបញ្ហាដោះស្រាយតាមយន្តការរបស់អាស៊ាននេះ ជាពិសេសការកោះប្រជុំកាលពីថ្ងៃទី២២ ខែកុម្ភៈកន្លងមក ។
លោកឧបការីរងបញ្ជាក់ថា លោកអូបាម៉ា ប្រធានាធិបតីអាមេរិក បានទាក់ទងទៅលោកប្រធានាធិបតីឥណ្ឌូណេស៊ីដោយបញ្ជាក់ថា អាមេរិកគាំទ្រឱ្យមានកិច្ចប្រជុំនេះ ហើយក៏ស្វាគមន៍ការប្រជុំនៅពេលខាងមុខនេះជាជំហានបន្តបន្ទាប់ផងដែរ ដើម្បីឈានទៅរកការដោះស្រាយធ្វើយ៉ាងណាឱ្យមានការត្រូវរ៉ូវគ្នា ។ ទាក់ទិននឹងរឿងបំណុលនេះ ដូចប្រសាសន៍របស់សម្តេចតេជោធ្លាប់មានប្រសាសន៍ថា សំណើនេះគឺកម្ពុជាងាកទៅរកចំណុចរួមមួយដែលកម្ពុជា-អាមេរិក អាចឯកភាពនិងយល់យោគគ្នាទៅវិញទៅមក ។ កាលណាយើងចង់រកចំណុចមួយដែលភាគីម្ខាងគេមិនឯកភាពនោះ បញ្ហាដោះស្រាយក៏អត់ទទួលបានលទ្ធផលជាវិជ្ជមានដែរ ដូច្នោះយើងបង្វែរទៅរកចំណុចរួមមួយដែលអាចយល់ព្រមទាំងអស់គ្នា ចំណុចនេះយើងឃើញថាជាចំណុចកាន់តែកៀកគ្នាហើយ ៕
ចែករំលែកព័តមាននេះ