រាជធានីភ្នំពេញ ៖ បុរសម្នាក់ជិះម៉ូតូអាយខនតាមបណ្តោយផ្លូវលេខ៣៧១ ពីជើងទៅត្បូង ស្របពេលនោះមានរថយន្តហាយឡែនឌ័របើកបរដោយបុរសម្នាក់ស្របទិសគ្នា បានបុកអាយខនពីក្រោយពេញទំហឹង បណ្តាលឱ្យបុរសអ្នកបើកម៉ូតូដួលបោកទៅលើថ្នល់រងរបួសធ្ងន់ កាលពីវេលាម៉ោង៨និង៤០នាទីយប់ថ្ងៃទី២៧ កក្កដា ក្នុងសង្កាត់ទឹកថ្លា ខណ្ឌសែនសុខ ។
តាមសាក្សីឱ្យដឹងថា មុនពេលកើតហេតុបុរសម្នាក់បានជិះម៉ូតូអាយខនតាមបណ្តោយផ្លូវលេខ៣៧១ ពីជើងទៅត្បូង ក្នុងល្បឿនធម្មតា ស្រាប់តែមានរថយន្តហាយឡែនឌ័រ ពណ៌ស្ករមួយគ្រឿង បើកដោយបុរសម្នាក់ពីក្រោយ បានវ៉ាម៉ូតូ ហើយក៏បុកម៉ូតូត្រូវចំហៀងរថយន្តបណ្តាលឱ្យអ្នកបើកម៉ូតូដួលបោកទៅលើថ្នល់រងរបួសធ្ងន់ ។ ភ្លាមៗអ្នកបើករថយន្តបានបន្ថែមល្បឿនគេចបាត់ដោយសុវត្ថិភាព ។
ក្រោយពេលកើតហេតុ ប៉ូលិសចរាចរបានចុះទៅដល់កន្លែងកើតហេតុ ហើយបានបញ្ជូនជនរងគ្រោះទៅមន្ទីរពេទ្យដើម្បីព្យាបាល ចំណែកម៉ូតូត្រូវបានប៉ូលិសចរាចរយកទៅរក្សាទុកនៅ អធិការដ្ឋាន ខណ្ឌសែនសុខ ៕
ចែករំលែកព័តមាននេះ