ខេត្ដឧត្ដរមានជ័យ ៖ មានការប៉ះទង្គិចគ្នាដោយអាវុធចំនួន២លើកដោយកាំភ្លើង គាំទ្រ និងកាំភ្លើងដៃរវាងកងទ័ពកម្ពុជា និងទាហានសៀមនៅតំបន់អូរស្មាច់ ។ តាមសេចក្ដីរាយការណ៍បានឱ្យដឹងថា ការប៉ះទង្គិចគ្នានេះកើតឡើងនៅវេលាម៉ោង៧ និង៤៨ នាទីព្រឹក ថ្ងៃទី១៧ មេសា មានរយៈពេលប្រមាណ១៥នាទី និងមួយឈុតទៀតនៅ ម៉ោង៩ និង៣០នាទីព្រឹកមានរយៈពេលប្រមាណ១០នាទី ។ ទោះបីជាមានការប៉ះទង្គិចគ្នាដោយអាវុធបែបនេះក្ដី តែមិនបណ្ដាលឱ្យភាគីទាំងសងខាងស្លាប់ និងរបួសទេ ។តាមសំដីមន្ដ្រីយោធា និងប៉ូលិសព្រំដែនខ្មែរប្រចាំការនៅតំបន់នោះឱ្យដឹងថា ការផ្ទុះអាវុធចំនួនពីរឈុតនោះ គឺកើតឡើងខណៈពេលមានការដើរល្បាតនៅតាមខ្សែបន្ទាត់ ព្រំដែនរៀងៗខ្លួន ។
ពេលនោះកងទ័ពកម្ពុជាក្នុងវរការពារព្រំដែនលេខ៤០២បានដើរទៅដល់ខ្សែបន្ទាត់ព្រំដែនស្ថិតក្នុងចំការស្វាយចន្ទីរបស់កងទ័ពកម្ពុជាស្ថិតក្នុងភូមិអភិវឌ្ឍន៍ សង្កាត់អូរស្មាច់ ក្រុងសំរោង ហើយជួបនឹងទាហានឈុតខ្មៅសៀមក្នុងវរសេនាធំលេខ ៨០៩ប្រមាណពី២០ទៅ២៥នាក់ ស្ថិតត្រង់ចំណុចបង្គោលឡាក់លេខ១៤នៅលើចំណុច ផែនVA៦០៦៣៣.៩១៨៩៣ ។ ពួកទាហានឈុតខ្មៅសៀមបានបញ្ជាឱ្យកងទ័ពកម្ពុជារុះរើខ្ទមចំការមួយចេញដោយសំអាង ថា នៅលើដីរបស់គេតែកងទ័ពកម្ពុជាបានប្រាប់ថា ខ្ទម និងដីចំការស្វាយចន្ទីទាំងអស់នោះ គឺស្ថិតនៅលើទឹកដីរបស់ខ្មែរយ៉ាងពិតប្រាកដ ។ប្រភពដដែលបន្ដថា កងទ័ពកម្ពុជា៣០នាក់បាននាំគ្នាឈរជើងរឹងមាំលើចំណុចរបស់ខ្លួន ឯទាហានឈុតខ្មៅសៀមប្រមាណ២៥នាក់បានចាកចេញចូលទៅក្នុងដីរបស់ពួកគេវិញក្នុងជំរៅប្រហែល៣០ម៉ែត្ររួចបាញ់ដោយអាវុធធុន M៧៩ និងអាវុធដៃមកលើចំណុចឈរជើងរបស់កងទ័ពកម្ពុជាយើង។
ដូច្នេះហើយទើបកងទ័ពកម្ពុជាប្រើសិទ្ធិស្វ័យតការពារខ្លួនបាញ់ដោយកាំភ្លើងB៤០ និងកាំភ្លើងអាកាផ្ទួនៗទៅលើកងទ័ពសៀមវិញអស់ជាច្រើនគ្រាប់ក្នុងរយៈពេល១៥នាទីធ្វើឱ្យកងទ័ពសៀមរត់គេចបាត់។ ប្រហែលជិត២ម៉ោងក្រោយមកទើបពួកទាហានសៀមចូលទៅកាន់ចំណុចផ្ទុះអាវុធជាថ្មីម្ដងទៀតនៅម៉ោង៩ និង៣០នាទី ហើយហា់ក់បីដូចជាមានការឈឺចាប់នឹងកងទ័ពកម្ពុជាមិនព្រមរើខ្ទមតាមបញ្ជាពួកគេនោះក៏បាញ់ផ្លោង គ្រាប់M៧៩ ចំនួន៤គ្រាប់ និងB៦៩ ចំនួន១គ្រាប់ចូលក្នុងដីខ្មែរម្ដងទៀត។ ស្របពេលនោះដែរកងទ័ពកម្ពុជាបានបាញ់តទៅវិញភ្លាមៗធ្វើឱ្យកងទ័ពសៀមរត់ចូលជ្រៅទៅក្នុងដីរបស់ខ្លួនវិញ ។ ក្រោយការត្រួតពិនិត្យលើចំណុចផ្ទុះអាវុធកងទ័ពកម្ពុជាប្រមូលបានសំបកគ្រាប់ M៧៩ ចំនួន៦គ្រាប់ មួកទាហាន ឈុតខ្មៅសៀម១ និងតេអូ១គ្រឿង នៅក្នុងទឹកដីរបស់កម្ពុជា ។
ប្រភពព័ត៌មានឱ្យដឹងថា នៅម៉ោងប្រមាណ៣រសៀលមេទ័ពសៀមក្នុងវរសេនាធំលេខ៨០៩ បានចូលមកសុំចរចាជាមួយមេទ័ពខ្មែរនៅចំណុចបង្គោលឡាក់លេខ១៤ ដោយពួកគេសុំកុំឱ្យមានការប្រយុទ្ធគ្នាបន្ដទៀត ។ ក្នុងពេលនោះ មេទ័ពកម្ពុជាបានប្រើភាសាយ៉ាងសឿងទៅកាន់មេទ័ពសៀមថា “បើទ័ពសៀមចង់បន្ដទៀតក៏បានដែរដោយភាគីកងទ័ពកម្ពុជានៅមានលទ្ធភាពគ្រប់គ្រាន់ក្នុងការស្វាគមន៍” ។ស្ថានការណ៍ពេលនេះមានភាពស្ងប់ស្ងាត់ជាធម្មតាវិញហើយបន្ទាប់ពីមេបញ្ជាការ កងទ័ពទាំងពីរភាគីបានជួបគ្នារួចមក ។ មន្ដ្រីយោធា និងប៉ូលិសព្រំដែនកម្ពុជាឱ្យដឹងបន្ថែមនៅព្រឹកថ្ងៃទី១៨ មេសា ថាកងទ័ពទាំងពីរភាគី បើទោះជាមានការប៉ះទង្គិចគ្នា ពីរឈុតនៅក្នុងថ្ងៃទី១៧ មេសា នោះក៏ដោយ តែពុំមានកងទ័ពភាគីណាទទួលរងរបួស និងស្លាប់ឡើយ ហើយស្ថានការណ៍មិនមានអ្វីគួរឱ្យកត់សំគាល់ទៀតទេ ។
ចែករំលែកព័តមាននេះ