ខេត្តមណ្ឌលគិរី ៖ នៅភូមិស្ពានមានជ័យ សង្កាត់សែនរមនា ក្រុងមនោរម្យ នៅតាមដងផ្លូវជាតិលេខ៧៨A ចម្ការដើមស្រ្តប៊ើរី បានលាតសន្ធឹងដេរដាសបើមិនបានចូលទៅពិនិត្យជិតទេ គេប្រាកដជាស្មានថា ជាដំណាំបន្លែផ្សេងមិនខាន ព្រោះដើមវារាងតូចល្អិត និងទាបៗជាប់នឹងដីលើរង ។
ខេត្តមណ្ឌលគិរី ៖ នៅភូមិស្ពានមានជ័យ សង្កាត់សែនរមនា ក្រុងមនោរម្យ នៅតាមដងផ្លូវជាតិលេខ៧៨A ចម្ការដើមស្រ្តប៊ើរី បានលាតសន្ធឹងដេរដាសបើមិនបានចូលទៅពិនិត្យជិតទេ គេប្រាកដជាស្មានថា ជាដំណាំបន្លែផ្សេងមិនខាន ព្រោះដើមវារាងតូចល្អិត និងទាបៗជាប់នឹងដីលើរង ។
ស្ត្រប៊ើរីជាផ្លែឈើម្យ៉ាងដែលគេឃើញមានដាំនៅក្នុងតំបន់ដែលមានអាកាសធាតុត្រជាក់ក្រោម២០អង្សាសេ តែបច្ចុប្បន្នដំណាំប្រភេទនេះក៏ត្រូវបានយកមកដាំនៅប្រទេសកម្ពុជាផងដែរ ជាពិសេសគឺនៅខេត្តមណ្ឌលគិរីតែម្តង ដែលមានអាកាសធាតុត្រជាក់ជាងបណ្តាខេត្តនានា ។
អ្នកថែទាំចម្ការស្រ្តប៊ើរីឱ្យដឹងថា ស្រ្តប៊ើរីដែលកំពុងដាំក្នុងចម្ការនេះបាននាំមកពីប្រទេសអាមេរិក និងអូស្រ្តាលី ដែលមានច្រើនពូជ ដូចជាពូជស្តេលា វេស្ទីវល ។ល។ ស្រ្តប៊ើរី ជាដំណាំ រើសដីផង និងរើសអាកាសធាតុផង វាត្រូវការសីតុណ្ហភាពត្រជាក់ពី១៦អង្សាទៅ១៧អង្សា ទើបរស់បាន ហើយជាធម្មតាចេញផ្កានិងផ្តល់ផ្លែបានល្អ ។ ស្រ្តប៊ើរីត្រូវការថែទាំជាពិសេសឱ្យត្រូវតាមបច្ចេកទេស វាមិនត្រូវការដីដក់ទឹកឬភ្លៀងធ្លាក់ជោកជាំនោះទេ ។
អ្នកថែទាំដដែលបានបន្តថា ស្រ្តប៊ើរីចាញ់កម្តៅថ្ងៃខ្លាំងណាស់ ព្រោះវាជារុក្ខជាតិមានដើមតូចល្អិត ។ ដើមស្រ្តប៊ើរីត្រូវការអាកាសធាតុត្រជាក់ ហើយនៅពីលើដើមដែលទើបនឹងដាំត្រូវគ្របដំបូល និងក្រោមដើមត្រូវយកស្រកីដូងមកគ្របគល់វាដើម្បីឱ្យជក់ទឹកធ្វើឱ្យដើមស្រ្តប៊ើរីនោះត្រជាក់ផង ហើយជួយបន្ថយកម្តៅទើបវាដុះល្អ និងហុចផលជាផ្លែធំៗ ។ បើនៅរដូវធ្លាក់ភ្លៀងពិបាកក្នុងការថែទាំបន្តិច ព្រោះសម្បូរសត្វល្អិត និងត្រូវទឹកភ្លៀងច្រើន ។
ប្រភពក៏បានបញ្ជាក់ថា ការដាំស្រ្តប៊ើរីអាចដាំលាតលើដីរាបស្មើក៏បានដែរ តែបើដាំលើដីចំណោតចាំបាច់ត្រូវលើករងដើម្បីការពារទឹកដក់តាមរងផង និងការពារដីបាក់មកលើដើមផង ។រងរបស់ស្រ្តប៊ើរីត្រូវលើកដូចរងស្ពៃ ហើយការដាំគឺយកកូនទៅដាំទុកឃ្លាតពីដើមមួយទៅដើមមួយ គឺ២០សង់ទីមែ៉ត្រ ។ ដាំកូនស្ត្រប៊ើរីដូចដាំកូនស្ពៃដែរ តែចាំបាច់ពេលដាំដំបូងត្រូវគ្របកូនវា គឺអាចធ្វើដំបូលពីលើ បើនៅក្រោមគល់គេអាចគ្របវាដោយស្រកីដូងសម្រាប់បន្ថយកម្តៅនិងឱ្យវាសើម ។ តាមរងនីមួយៗត្រូវរាយទុយោទឹកដើម្បីបន្តក់ទឹកតាមរងនៅពេលដីស្ងួតគ្មានភ្លៀង ។
ស្ត្រប៊ើរីចាប់ផ្តើមផ្កាពីខែសីហា ដល់ខែកញ្ញា ផ្លែវាទុំអាចបេះប្រមូលផលបាន គឺនៅក្រោយការដាំបានអាយុកាល៧៥ថ្ងៃ ទៅ៩០ថ្ងៃ ។ គុណប្រយោជន៍របស់ស្ត្រប៊ើរី មានវីតាមីន២០មុខ សម្រាប់ជំនួយសុខភាពដល់អ្នកទទួលទាន ។ ចំណែកតម្លៃអាចមានការប្រែប្រួលទៅតាមទីផ្សារ តែជាមធ្យមវាមានតម្លៃ២០ដុល្លារក្នុងមួយគីឡូក្រាម ៕
ចែករំលែកព័តមាននេះ