ជារៀងរាល់ឆ្នាំ នៅថ្ងៃទី២៦ កក្កដា គឺជាថ្ងៃខួបកំណើតរបស់លោកថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ ។ សម្រាប់សកម្មភាពក្រុមសកម្មជនផ្សេងៗក្នុងឆ្នាំនេះ អ្វីៗគ្រប់យ៉ាងហាក់ដូចជាមានភាពអធឹកអធមក្នុងអាយុគម្រប់៦៣ឆ្នាំ របស់លោកថាក់ស៊ីន ហើយកាសែតថៃរ៉ាត់ បានលើកយកសម្តីរបស់ហោរាល្បីឈ្មោះធ្វើការទស្សន៍ទាយពីជោគជតារាសីរបស់បុរសដ៏មានឥទ្ធិពលរូបនេះ។
លោកពីនយ៉ូ ពង្សចារើន នាយកសមាគមហោរាសាស្ត្រអន្តរជាតិថ្លែងថា លោកថាក់ស៊ីន ដែលមានអាយុ៦៣ឆ្នាំ ជាអំឡុងពេលគ្មានអ្វីគួរឱ្យលេចធ្លោ ក្រៅពីសុខភាព ការប៉ងធ្វើឃាត និងការធ្វើដំណើរប្រឈមមុខនឹងឧប្បត្តិហេតុ ។ នាយកសមាគមហោរាសាស្ត្រខាងលើបានថ្លែងបន្តដោយសង្កត់ធ្ងន់លើអតីតអ្នកដឹកនាំម្នាក់នេះឱ្យប្រុងប្រយ័ត្នពីរឿងសុវត្ថិភាព ព្រោះជោគជតារាសីបច្ចុប្បន្ន កំពុងមានមនុស្សមានបំណងអាក្រក់ ជាពិសេសចំពោះជនបរទេសត្រូវប្រុងប្រយ័ត្ន ព្រោះអាចទទួលរងការធ្វើឃាតលើមូលហេតុមាសប្រាក់ ។
ចំណែករឿងរ៉ាវដែលមានលេចឮថា លោកថាក់ស៊ីន ស៊ីណាវ៉ាត្រា នឹងត្រឡប់ចូលប្រទេសថៃក្នុងឆ្នាំនេះ លោកពីនយ៉ូ ពង្សចារើន បញ្ជាក់ថា គួរកុំប្រញាប់ប្រញាល់ពេក ព្រោះជោគជតារាសីមិនទាន់ល្អ ។ នៅពេលត្រឡប់មកនឹងមានឧបសគ្គជាច្រើន គួរអូសបន្លាយពេលបន្តទៀត បើចូលក្នុងឆ្នាំនេះនឹងមានគ្រោះថ្នាក់ ។ ស្របពេលជាមួយគ្នានេះដែរគ្រូជំនាញផ្នែកលើកជតារាសី(ចិនសែ) លោកផានូវ៉ាត ផាន់វីឆាតគុល ថ្លែងថា អ្នកដែលកើតក្នុងឆ្នាំឆ្លូវគឺជាមនុស្សមានជំនឿលើខ្លួនឯងខ្ពស់ ចិត្តឆេវឆាវ តែទន់ភ្លន់ ។ ជោគជតារាសីស្ថិតក្នុងភាពគ្រោះថ្នាក់តាំងពីពាក់កណ្តាលឆ្នាំមុន ធ្វើអ្វីក៏មិនសមតាមបំណង។
តាមហោរាសាស្ត្រចិន បង្ហាញថា ជោគជតារបស់លោកថាក់ស៊ីន បច្ចុប្បន្នមិនទាន់ល្អប្រសើរត្រូវរង់ចាំឱ្យឆ្លងផុតគម្រប់ខួបរយៈពេល១០០ថ្ងៃ ទើបផុតគ្រោះ ។ ក្នុងឆ្នាំនេះត្រូវស្ថិតក្នុងសភាពស្ងប់ស្ងៀម ធ្វើអ្វីក៏មិនសមបំណង ប៉ុន្តែត្រូវប្រុងប្រយ័ត្នលើរឿងសុខភាព និងឧប្បត្តិហេតុផ្សេងៗទៀត ក្នុងអំឡុងពេល៣ខែខាងមុខ ត្រូវប្រុងប្រយ័ត្នខ្លួន ។
ជាចុងក្រោយ អ្នកជំនាញខាងចិនសែដ៏ល្បីឈ្មោះបាននិយាយពីអតីតមេដឹកនាំរូបនេះដែលនឹងត្រឡប់មកប្រទេសថៃថា នៅមិនទាន់មានជោគជតារាសីល្អសម្រាប់ការត្រឡប់មកប្រទេសវិញក្នុងឆ្នាំនេះ ព្រោះជោគជតាចាប់ពីពេលនេះទៅបើមិនស្ថិតក្នុងសភាពស្ងប់ស្ងៀម និងមិនដកថយ មានន័យថានឹងមិនបានត្រឡប់មកវិញឡើយ ៕
ចែករំលែកព័តមាននេះ