ក្រោយពីសង្គ្រាមកូរ៉េបានបញ្ចប់នៅក្នុងឆ្នាំ១៩៥៣ មានជនជាតិកូរ៉េខាងជើងគេចពីភាពអត់ឃ្លាន និងការកៀបសង្កត់របស់រដ្ឋាភិបាលទៅកូរ៉េខាងត្បូងជាង២៣.៥០០នាក់ ដោយភាគច្រើនរត់គេចតាមព្រំដែនជាប់ជាមួយចិន ។ក្នុងអំឡុងពេលចុងក្រោយនេះ រដ្ឋាភិបាលកូរ៉េខាងជើង បានបើកគម្រោងការបញ្ចុះបញ្ចូលពលរដ្ឋឱ្យត្រឡប់មកប្រទេសវិញដោយសន្យាថា នឹងផ្តល់ឱ្យពួកគេមានជីវភាពរស់នៅសប្បាយរីករាយ និងគ្មានការយកទោសពៃរ៍អ្វីឡើយ ។ តាមរយៈការបញ្ចុះបញ្ចូលនេះ ក្នុងឆ្នាំ២០១២ មានជនជាតិកូរ៉េខាងជើងធ្វើដំណើរត្រឡប់មកស្រុកកំណើតជាង១០០នាក់ ដោយអ្នកខ្លះទទួលបានលំនៅឋាន និងតំណែងការងារក្នុងទីក្រុងព្យុងយ៉ាង ជារង្វាន់ពីរដ្ឋាភិបាល ។
ចំណែកក្រសួងបង្រួបបង្រួមជាតិកូរ៉េខាងត្បូងដែលគ្រប់គ្រងលើការឆ្លងដែនរវាងកូរ៉េទាំង២ បញ្ជាក់ថា ជនភៀសខ្លួនដែលធ្វើដំណើរទៅកូរ៉េខាងជើងមានចំនួនតិច មិនដល់១០០នាក់ ប៉ុន្តែគ្មានព័ត៌មានលម្អិតណាមួយបញ្ជាក់បន្ថែមទេ។
ផែនការទាក់ទាញពលរដ្ឋកូរ៉េខាងជើងត្រឡប់ទៅស្រុកវិញ ចាប់ផ្តើមលេចឮព័ត៌មានកាលពីសម្តាហ៍មុន ក្រោយពីជនជាតិកូរ៉េខាងជើងម្នាក់ គឺលោក ចន យ៉ុងឈុល អះអាងថា អ្នកស៊ើបការណ៍សម្ងាត់របស់ក្រុងសេអ៊ូលមួយក្រុមសន្យាថា នឹងផ្តល់រង្វាន់យ៉ាងសន្ធឹកសន្ធាប់ ប្រសិនបើយល់ព្រមត្រឡប់ទៅកូរ៉េខាងត្បូង និងដាក់គ្រាប់បែកបំផ្លាញរូបសំណាកអតីតប្រធានាធិបតី គីម អុីលស៊ុង ។
លោក ចន បានថ្លែងក្នុងទីក្រុងព្យុងយ៉ាងថា រូបលោកត្រូវគេជួលឱ្យប្រតិបត្តិតួនាទីនោះក្រោយពីចូលទៅតាំងលំនៅឋានក្នុងកូរ៉េខាងត្បូង ប៉ុន្តែភ្នាក់ងារព័ត៌មានកូរ៉េខាងត្បូង បានបដិសេធភ្លាមៗថា មិនមែនជាការពិតទេ ។
កាលពីខែមុន អតីតជនភៀសខ្លួនលោកស្រី ប៉ាក់ ជុងស៊ុក បានបង្ហើបឱ្យដឹងនៅកូរ៉េខាងជើង ក្នុងលក្ខណៈស្រដៀងគ្នានេះ ទោះបីជាធ្លាប់រស់នៅកូរ៉េខាងត្បូងដល់ទៅ៦ឆ្នាំក៏ដោយ ។ គាត់បញ្ជាក់ថា «ជីវិតនៅក្រុងសេអ៊ូល ស្ទើរតែមិនខុសពីទាសករ ដោយខិតខំធ្វើការជាថ្នូរនឹងប្រាក់» ។ លោកស្រីប៉ាក់ បានអះអាងថា គាត់ត្រូវអ្នកស៊ើបការណ៍កូរ៉េខាងត្បូងអូសទាញឱ្យគេចពីកូរ៉េខាងជើងកាលពីឆ្នាំ២០០៦ ប៉ុន្តែក្រុមសកម្មជន និងអង្គការជនភៀសខ្លួនបែរជាបញ្ជាក់ថា រដ្ឋាភិបាលព្យុងយ៉ាងគំរាមធ្វើបាបកូនប្រុសរបស់នាង ប្រសិនបើមិនព្រមត្រឡប់ទៅវិញ ។
ទោះបីជាការធ្វើដំណើររវាងកូរ៉េខាងត្បូង និងកូរ៉េខាងជើងមិនអាចដំណើរការបាន ប៉ុន្តែជនភៀសខ្លួនដែលមានលិខិតឆ្លងដែនកូរ៉េខាងត្បូងស្រាប់ អាចធ្វើដំណើរទៅប្រទេសទី៣ដូចជាចិនជាដើម នៅមុនពេលបន្តដំណើរទៅក្រុងព្យុងយ៉ាង។ក្រុមបញ្ញវន្តកូរ៉េខាងជើងសាមគ្គី ជាអង្គការជនភៀសខ្លួនក្នុងកូរ៉េខាងត្បូង ឱ្យដឹងថា កាលពីសប្តាហ៍មុនរដ្ឋាភិបាលព្យុងយ៉ាងបានព្យាយាមទាក់ទងក្រុមគ្រួសារជនជាតិកូរ៉េខាងជើងនៅកូរ៉េខាងត្បូងដោយសន្យាថា «នឹងអភ័យទោស ប្រសិនបើពួកគេយល់ព្រមត្រឡប់ទៅស្រុកកំណើតវិញ» ៕
ចែករំលែកព័តមាននេះ