មូលនិធិសត្វព្រៃពិភពលោក ឬអង្គការអភិរក្សសត្វព្រៃ(WWF) បានបង្ហាញរបាយការណ៍រៀបចំណាត់ថ្នាក់នៃការព្យាយាមរបស់ប្រទេស នានា ដើម្បីទប់ស្កាត់ការជួញដូរសត្វជិតផុតពូជ ដោយបញ្ជាក់ថា ការទាក់ដំរីនៅអាហ្វ្រិកកណ្តាលកំពុងស្ថិតក្នុងវិបត្តិ ខណៈពេលដែលការរស់រានរបស់សត្វរមាសក៏ទទួលការគំរាមកំហែងយ៉ាងធ្ងន់នៅអាហ្វ្រិកខាងត្បូង ។
នៅអាសីុ កុយរមាសមានតម្លៃខ្ពស់បំផុត ព្រោះគេយកទៅ ប្រើប្រាស់ជាឱសថ ។ អ្នកខ្លះទៀតមានជំនឿថា អាចយកទៅព្យាបាលជំងឺមហារីក ខណៈពេលភ្លុកដំរីត្រូវមើលឃើញថា ជាគ្រឿងតុបតែងលម្អដ៏មានតម្លៃ ។ WWF បញ្ជាក់ថា ទោះបីជាមានកិច្ចខិតខំប្រឹងប្រែងទប់ស្កាត់ការជួញដូរបំណែកសត្វទាំងនេះ ដែលដំណើរការអស់រយៈពេលជាច្រើនឆ្នាំក៏ដោយ ប៉ុន្តែប្រទេសចិន ថៃ និងវៀតណាម នៅតែបណ្តោយឱ្យមានទីផ្សារជួញដូរសត្វជិតផុតពូជជាច្រើនប្រភេទ ដោយអាជ្ញាធរមិនបានត្រួតពិនិត្យ និងទប់ស្កាត់ឱ្យបានដិតដល់ ។
របាយការណ៍របស់ WWF បញ្ជាក់បន្ថែមទៀតថា វៀតណាមជាប្រទេសមួយក្នុងបណ្តាប្រទេសជាច្រើនគួរឱ្យបារម្ភបំផុត ព្រោះស្ទើរតែមិនអាចទប់ស្កាត់ការជួញដូរកុយរមាស និងអវយវៈសត្វខា្លបាន រួមទាំងជំរុញឱ្យវៀតណាមបង្ក្រាបការជួញដូរដោយខុសច្បាប់ទាំងនេះ។
WWF ឆ្លុះបញ្ចាំងថា អាហ្វ្រិកខាងត្បូង គឺជាមជ្ឈមណ្ឌលនៃវិបត្តិសម្លាប់រមាស ទោះបីជារដ្ឋាភិបាលព្យាយាមយ៉ាងខ្លាំងសម្រាប់ទប់ស្កាត់ការសម្លាប់សត្វជិតផុតពូជប្រភេទនេះ ឆ្នាំ២០០៩ ក៏ដោយ ប៉ុន្តែតួលេខស្ថិតិបង្ហាញថាមានរមាសអាហ្វ្រិកខាងត្បូងត្រូវសម្លាប់ដល់ទៅ៤៤៨ក្បាលក្នុងឆ្នាំ ២០១១ និងក្នុងឆ្នាំ២០១២ មានរមាសត្រូវសម្លាប់ចំនួន២៦២ក្បាល ។ WWF ថែមទាំងចោទប្រកាន់ថា ប្រទេសចិន និងថៃ ជាប្រទេសដ៏សំខាន់ដែលធ្វើឱ្យមានការជួញដូរភ្លុកដំរីខុសច្បាប់ ។ ក្នុងមួយឆ្នាំៗមានដំរីអាហ្វ្រិកត្រូវសម្លាប់ជាច្រើនម៉ឺនក្បាលដើម្បីយកភ្លុក ដោយចិន និងថៃ គឺជាទិសដៅដ៏សំខាន់សម្រាប់ការជួញដូរភ្លុកដំរីទាំងនេះ ។
WWF បន្តទៀតថា នៅក្នុងប្រទេសថៃ បញ្ហាសំខាន់គឺច្បាប់យល់ព្រមឱ្យមានការលក់ភ្លុកដំរីនៅក្នុងប្រទេសបានដោយស្របច្បាប់ និងចាត់ទុកថា ជាការខ្វះចន្លោះដែលធ្វើឱ្យមានការជួញដូរ ការលួចលក់ភ្លុកដំរីនៅអាហ្វ្រិក ៕
ចែករំលែកព័តមាននេះ