លទ្ធផលអង្កេតរបស់អាមេរិកដែលត្រៀមផ្សព្វផ្សាយក្នុងអំឡុងខែកញ្ញាខាងមុខ បញ្ជាក់ថាចំនួនជនក្រីក្រក្នុងសហរដ្ឋអាមេរិកមានតម្រុយថាអាចកើនខ្ពស់ជាប្រវត្តិសាស្ត្រក្នុងអំឡុងពេលជិតពាក់កណ្តាលសតវត្ស និងអាចជាកក្តាសំខាន់ដែលមានផលប៉ះពាល់ដល់ការបោះឆ្នោតប្រធានាធិបតីអាមេរិកក្នុងខែវិច្ឆិកាខាងមុខ ។
លទ្ធផលអង្កេតចុងក្រោយដែលរំពឹងថានឹងផ្សព្វផ្សាយក្នុងខែកញ្ញាបញ្ជាក់ថា ចំនួនជនក្រីក្រសហរដ្ឋអាមេរិកអាចកើនខ្ពស់ពី១៥,១%ក្នុងឆ្នាំ២០១០ ទៅ១៥,៧% ដែលជាកម្រិតខ្ពស់បំផុតរបស់ប្រទេសចាប់តាំងពីឆ្នាំ១៩៦៥មក ។ បច្ចុប្បន្នភាពក្រីក្របានរីករាលដាលដល់ក្រុមមនុស្សផ្សេងៗក្នុងសហរដ្ឋអាមេរិកដ៏ទូលំទូលាយរួមទាំងជនវណ្ណៈកណ្តាល ដែលរស់នៅតំបន់ជាយក្រុងធំៗផងដែរ ។
មូលហេតុចម្បងកើតឡើងពីផលប៉ះពាល់នៃស្ថានភាពសេដ្ឋកិច្ច ខណៈពេលអ្នកអត់ការងារធ្វើជាច្រើននាក់ចាប់ផ្តើមអស់សង្ឃឹមលើការរកការងារធ្វើ និងសម្រេចចិត្តសុំប្រាក់ជួយឧបត្ថម្ភពីរដ្ឋាភិបាល ។ក្រៅពីនេះ ក៏នៅមានទិន្នន័យគួរឱ្យបារម្ភថាចំនួនជនក្រីក្ររបស់អាមេរិកក្នុងពេលបច្ចុប្បន្នខ្ពស់ជាងចំនួនជនក្រីក្រក្នុងប្រទេសវៀតណាម ព្រោះមានរបាយការណ៍បង្ហាញថា ជនក្រីក្រក្នុងប្រទេសវៀតណាមចុងក្រោយនេះមានប្រហែល១០,៦% ។
បណ្តាអ្នកវិភាគបញ្ជាក់ថា ជនជាតិអាមេរិកប្រហែល៤៧លាននាក់ ឬ១ភាគ៦នៃប្រជាជនសរុបត្រូវចាត់បញ្ចូលក្នុងចំណោមអ្នកមានជីវភាពក្រីក្រ ឬមានចំណូលទាបជាង១១.១៣៩ដុល្លារក្នុងមួយឆ្នាំ ៕
ចែករំលែកព័តមាននេះ