ខេត្តតាកែវ ៖ ភ្នំជីសូរជារមណីយដ្ឋាន វប្បធម៌ និងប្រវត្តិសាស្ត្រសំខាន់មួយរបស់ខេត្តតាកែវក្នុងចំណោមរមណីយដ្ឋានមួយចំនួនទៀត ដូចជា ទន្លេបាទី និងភ្នំដាជាដើម ។ ភ្នំជីសូរទាក់ទាញទាំងភ្ញៀវជាតិ និងអន្តរជាតិឱ្យទៅទស្សនាកម្សាន្ត តែនៅក្នុងរដូវភ្លៀងនេះភ្ញៀវមានការស្រកស្រុតចុះ ។
ទីតាំងប្រាសាទបុរាណនៅលើកំពូលភ្នំនេះស្ថិតនៅឃុំរវាង ស្រុកសំរោង ។ ស្ត្រីឈ្មោះ សា រឿន រស់នៅភូមិដកពរ ឃុំរវាង ជាអ្នកលក់ភេសជ្ជៈ និងបាយម្ហូបនៅច្រកផ្លូវឡើងទៅលើកំពូលភ្នំជីសូរប្រាប់ឱ្យដឹងកាលពីថ្ងៃទី២១ កក្កដា ២០១២ ថា គាត់ទទួលបានប្រាក់ចំណូលចាប់ពី៤ម៉ឺនទៅ៦ម៉ឺនរៀលក្នុងមួយថ្ងៃ តែបើថ្ងៃបុណ្យជាតិសំខាន់ៗមានភ្ញៀវទៅកម្សាន្តច្រើនធ្វើឱ្យគាត់ទទួលបានចំណូលច្រើនជាងនេះ ។
ដោយឡែកក្នុងរដូវវស្សានេះមិនសូវមានភ្ញៀវទៅកម្សាន្តនៅភ្នំជីសូរទេ ព្រោះមានភ្លៀងធ្លាក់ ពិបាកក្នុងការធ្វើដំណើរ និងម៉្យាងទៀតដោយសារតែភ្ញៀវជាតិជាប់រវល់ធ្វើស្រែចម្ការ។ ក្នុងអំឡុងខែកក្កដា សីហា និងកញ្ញា មិនសូវមានទាំងភ្ញៀវជាតិ និងភ្ញៀវបរទេស ។ ស្រ្តីដដែលនោះ ប្រកបរបរជាអ្នកលក់ភេសជ្ជៈនៅភ្នំជីសូរអស់រយៈពេលជាងដប់ឆ្នាំមកហើយ ។ គាត់ប្រាប់ថា កាលពីមុនមានអ្នកលក់ច្រើនព្រោះមានភ្ញៀវចូលមកទស្សនាច្រើន តែពេលនេះអ្នកលក់ភាគច្រើនលក់តែថ្ងៃសៅរ៍ និងថ្ងៃអាទិត្យប៉ុណ្ណោះ ដោយសារតែពីថ្ងៃចន្ទដល់ថ្ងៃសុក្រ មិនសូវមានភ្ញៀវចូលមកទស្សនា ។
យោងតាមប្រសាសន៍លោក ស៊ិន រ៉ែន ដែលជាបុគ្គលិកមន្ទីរទេសចរណ៍ខេត្តតាកែវ និងជាអ្នកប្រចាំការនៅរមណីយដ្ឋានភ្នំជីសូរឱ្យដឹងថា អំឡុងដើមឆ្នាំ២០១២នេះ ចំនួនភ្ញៀវទេសចរថយចុះដោយសារតែរមណីយដ្ឋានភ្នំជីសូរមានទំហំតូច និងម៉្យាងទៀតបណ្តាភ្ញៀវទេសចរភាគច្រើននិយមទៅលេងនៅតំបន់ឆ្នេរមានដូចជា ឆ្នេរកំពង់សោម ក្រុងកែប កោះកុង និងមួយចំនួនទៀតទៅតំបន់ទេសចរណ៍ទើបអភិវឌ្ឍន៍មានដូចជា ភ្នំបូកគោជាដើម ឯអ្នកខ្លះទៅទស្សនានៅតំបន់ភូមិភាគឦសាន ។
លោក ស៊ិន រ៉ែន បញ្ជាក់ថា ក្នុងឆ្នាំ២០១២ ខុសប្លែកពីឆ្នាំមុនៗព្រោះមានការថយចុះភ្ញៀវចូលមកទស្សនាភ្នំជីសូរ គឺកាលពីឆ្នាំមុនសម្បូរទាំងភ្ញៀវជាតិ និងអន្តរជាតិ ។ បើនៅរដូវបុណ្យទានវិញដូចជាពិធីបុណ្យចូលឆ្នាំ និងបុណ្យកាន់បិណ្ឌជាដើម សម្បូរទៅដោយភ្ញៀវជាតិយ៉ាងច្រើនកុះករតាំងពីព្រលឹមដល់យប់ ។ប្រាសាទភ្នំជីសូរកសាងនៅសតវត្សរ៍ទី១១ ដោយព្រះបាទសុរិយវរ្ម័នទី២ ។ ទោះបីរងការខូចខាតដោយអន្លើ តែប្រាសាទនេះនៅតែមានការទាក់ទាញភ្ញៀវទៅទស្សនា និងស្រាវជ្រាវពីប្រវត្តិសាស្ត្រ ៕
ចែករំលែកព័តមាននេះ