– ថាយកប្ដីចាស់ មិនជួបកម្មក្រាស់ ប្ដីដើររកក្រៅ
តែផ្ទុយទៅវិញ ទ្រូងមានដំបៅ ប៉ះលើចាស់ឆៅ
ស្ទើរឆ្អិនស្ទើរខ្លោច ។
– ជួលឈ្នួលមិនបាន ឃើញស្រីក្បែរប្រាណ ជ្រួលដូចស្រមោច
មិនដឹងខ្លួនចាស់ មិនខ្លាចអាសោចន៍ លូកលាន់បេះបោច
ឱ្យគេរត់អស់ ។
– ចាប់បានភ័ស្ដុតាង នៅស្រែកក្អេងក្អាង អួតខ្លួនចិត្ដស្មោះ
គ្រាន់តែលេងសើច មួយគ្រាប៉ុណ្ណោះ ព្រោះជាតិជាប្រុស
លែងអីខិលខូច?
– ចាស់ណាស់ព្រើលណាស់ មុខនោះសែនក្រាស់ គ្មានអ្វីប្រដូច
ស្រីក្រៅក៏មាន តាចាស់កំហូច ទៅច្របាច់ក្រូច(១)
គ្មានលោះថ្ងៃណា ។
– ដេញទាន់ជាន់កែង ឃើញច្បាស់ជាក់ស្ដែង នៅនិងនេត្រា
ខ្ញុំឆ្អែតដល់ក លែងចេញវាចា កាត់ផ្ដាច់ស្នេហា
ស្មាលាប្ដីកម្ម ។
– ទៅឱ្យឆ្ងាយចុះ មិនបាច់ស្រណោះ មិនបាច់ផ្ដែផ្ដាំ
ប្ដីរបៀបនេះ កាប់ថ្មចំណាំ ធ្វើបុណ្យប្រចាំ
កុំឱ្យជួបទៀត ។
១-នៅម្ដុំសួនច្បារជិតវត្ដបុទុមរាល់ល្ងាច គឺតែងមានអ្នកទូលថាសលក់ក្រូចច្របាច់ ហើយក៏មានស្ដ្រីរកស៊ីផ្លូវភេទដែរ។ ដូច្នេះហើយទើបពួកប្រុសៗដែលដឹងរឿងចូលចិត្ដចំអន់គ្នាលេងសើចថា “ ហ្នឹង ប្រាកដជាទៅរកច្របាច់ក្រូចហើយ មិនមែនទៅរកក្រូចច្របាច់ទេ” ។
ដោយ ព្រុំ គឹម ជឿន prumkimchoeun@gmail.com
ចែករំលែកព័តមាននេះ