យោងតាមទិន្នន័យភ្នាក់ងារប៉ូលិសជាតិឱ្យដឹងថា ចំនួនករណីនៃអំពើហិង្សាក្នុងគ្រួសាររវាងប្តីប្រពន្ធនៅក្នុងប្រទេសជប៉ុនដែលបានរាយការណ៍សម្រាប់៦ខែដំបូងក្នុងឆ្នាំនេះបានកើនឡើងដល់ ៤៦,៣%ធៀបនឹងឆ្នាំ២០១១ ។ទូរទស្សន៍ Ashahiបានរាយការណ៍ថា ភ្នាក់ងារប៉ូលិសជាតិបាននិយាយឱ្យដឹងថា ចំនួនករណីនៃអំពើហិង្សារវាងគូស្វាមីភរិយាដែលបានរៀបការរួច និងស្វាមីភរិយារស់នៅជាមួយគ្នាដោយមិនទាន់បានរៀបការមាន២.០១៦ករណី ។
បើធៀបទៅនឹងចន្លោះពេលពីខែមករាដល់ មិថុនាឆ្នាំ ២០១១ឃើញថា កើនឡើង៦រយករណី ហើយភាគច្រើននៃជនរងគ្រោះ ៩៤%គឺជាស្ត្រី ។ តាមអ្នកវិភាគមួយចំនួនជឿថា ការកើនឡើងយ៉ាងគំហុកបែបនេះក៏ព្រោះតែជនរងគ្រោះដោយអំពើនេះភ្ញាក់ខ្លួនទៅរាយការណ៍ជូនប៉ូលិស ។ ភាគច្រើននៃអំពើហិង្សាកើតមាននៅក្នុងបណ្តាខេត្តមួយចំនួនមានដូចជា Saitama, Chibaនិង Gunma ។ ទូរទស្សន៍ដដែលបានរាយការណ៍ទៀតថា ទន្ទឹមនឹងការកើនឡើងនៅខេត្ត៣ខាងលើ អំពើហិង្សាក្នុងគ្រួសារបែរជាមានការថយចុះនៅក្នុងខេត្ត៣ដែលរងផលប៉ះពាល់ដោយរលកយក្ស ស៊ូណាមិមានដូចជា Iwate, Miyagiនិង Fukushima។
ក្នុងបណ្តាខេត្តទាំងនេះ អំពើហិង្សាចំនួន ១.៥០០ករណីបានថយចុះនៃអំពើហិង្សាសរុប ១៩.០៨៦ករណី ។ មូលហេតុមួយពីការថយចុះនេះត្រូវបានគេមើលឃើញថា ដោយសារមានការបន្ថែមប៉ុស្តិ៍ប៉ូលិសប្រចាំការនិងការបង្កើនការដើរល្បាតរបស់ប៉ូលីស ៕
ចែករំលែកព័តមាននេះ