ខេត្តកំពង់ចាម ៖ ម៉ូតូឌ្រីមសេ១២៥ ចាប់ពីស៊េរី២០០៧ ដល់ស៊េរី២០១២ សុទ្ធតែពណ៌ ខ្មៅ ទាំងអស់ចំនួន១១គ្រឿង ត្រូវបានរឹបអូសខណៈដែលសមត្ថកិច្ចធ្វើរដ្ឋបាលរយៈពេល២ថ្ងៃ គឺថ្ងៃទី១៦ និង១៧ កក្កដា ២០១២ ដោយសង្ស័យថា បានមកពីភាពមិនប្រក្រតីនៅតាមកន្លែងផ្សេងៗ ហើយសមត្ថកិច្ចប្រកាសស្វែងរកម្ចាស់ដែលពេលនេះកំពុងរក្សាទុកនៅអធិការដ្ឋាននគរបាលស្រុកព្រៃឈរ ។
លោកវរសេនីយ៍ឯក ជឹម សេងហុង ស្នងការរងនគរបាលខេត្តទទួលផែនការយុត្តិធម៌មានប្រសាសន៍ឱ្យដឹងថា ក្នុងការពង្រឹងសន្តិសុខ និងសណ្តាប់ធ្នាប់ជូនប្រជាពលរដ្ឋ លោកវរសេនីយ៍ត្រី កែវ ស៊ាងហ៊ន់ អធិការនគរបាលស្រុកព្រៃឈរ បានដឹកនាំកម្លាំងចុះធ្វើរដ្ឋបាលក៏បានប្រទះឃើញម៉ូតូចំនួន១១គ្រឿងខាងលើដែលត្រូវបានគេយកមកលក់ឱ្យប្រជាពលរដ្ឋនៅស្រុកព្រៃឈរ មិនមានលិខិតស្នាមច្បាស់លាស់ ។
លោកវរសេនីយ៍ឯក ជឹម សេងហុង បញ្ជាក់ថា ម៉ូតូទាំង១១គ្រឿងត្រូវបានរឹបអូសយកមកដាក់នៅអធិការដ្ឋាននគរបាលស្រុកព្រៃឈរ ជាបណ្តោះអាសន្ន ហើយសមត្ថកិច្ចបានឃាត់ខ្លួនជនសង្ស័យម្នាក់ផងដែរ។ លោកប្រកាសថា ប្រសិនបើបងប្អូនបាត់ម៉ូតូមានភិនភាគដូចខាងលើ សូមយកឯកសារភ្ជាប់មកជាមួយ ដើម្បីផ្ទៀងផ្ទាត់លេខតួ លេខម៉ាស៊ីន យកម៉ូតូត្រឡប់ទៅវិញ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ