ក្រុងប៉ោយប៉ែត ៖ ល្បែងស៊ីសងយូគីមួយកន្លែងត្រូវបានគេបើកលេងយ៉ាងគគ្រឹកគគ្រេងនៅក្នុងប្លុកក្លឹបឌីស្កូថេក ហូលីវូត ស្ថិតនៅក្នុងភូមិក្បាលស្ពាន សង្កាត់ប៉ោយប៉ែត ។ តាមប្រភពពីអ្នកញៀនល្បែងយូគីនោះបានបង្ហើបឱ្យដឹងថា ល្បែងយូគីកន្លែងនេះទើបតែបើកលេងបានរយៈពេលប្រមាណ១០ថ្ងៃប៉ុណ្ណោះ និងមានម្ចាស់ឈ្មោះស្មី ភេទប្រុស អាយុប្រមាណ៤០ឆ្នាំ ដែលទើបតែមកពីខេត្តកំពត ហើយបានស្គាល់កូនអ្នកមានអំណាចនៅកន្លែងនេះ ទើបគេហ៊ានបើកលេងបែបនេះ។
ប្រភពដដែលបានបញ្ជាក់ថា ល្បែងស៊ីសងយូគីនេះ មួយរយៈពេលកន្លងមកក៏មានមេបនល្បែងមួយចំនួននៅក្នុងក្រុងប៉ោយប៉ែត នេះ បានព្យាយាមសុំការអនុញ្ញាតពីអាជ្ញាធរមានសមត្ថកិច្ចបើកលេងដែរប៉ុន្តែមិនអាចទៅរួច ដោយសារអ្នករត់ការពេលនោះខ្សែតូចពេក ។ ចំពោះបនល្បែងយូគីដែលពួកគេបើកលេងយ៉ាងគគ្រឹកគគ្រេងនៅពេលនេះ គឺពួកគេមានខ្សែរយៈធំ ។ បើតាមប្រភពបានបង្ហើបឱ្យដឹងថា អ្នកធំធ្វើខ្នងបង្អែកកាងបនល្បែងយូគីនេះ គឺជាខ្សែរបស់កាស៊ីណូនៅក្នុងក្រុងប៉ោយប៉ែតនេះតែម្តង ។ គេឃើញបនល្បែងយូគីនេះបានបើកលេងយ៉ាងចំហ និងមានអ្នកចាក់ភ្នាល់ដាក់លុយរាប់លានរៀលផងដែរ ដោយពួកគេបើកលេងជាប្រចាំចាប់តាំងពីម៉ោង៧ព្រឹក រហូតដល់ពេលយប់ គឺលុះត្រាតែអស់អ្នកចាក់ទើបពួកគេឈប់លេង ។
ជុំវិញបញ្ហាមានការបើកលេងល្បែងស៊ីសងខុសច្បាប់ទាំងអស់នេះ បានធ្វើឱ្យពលរដ្ឋនៅក្នុងក្រុងប៉ោយប៉ែតមិនសប្បាយចិត្តឡើយ ហើយបានរិះគន់អាជ្ញាធរមានសមត្ថកិច្ចថា បណ្តែតបណ្តោយឱ្យមានល្បែងស៊ីសង ទើបកន្លងមកកើតមានអំពើលួចឆក់ប្លន់កាប់សម្លាប់ប្រជាពលរដ្ឋស្លូតត្រង់យកទ្រព្យសម្បត្តិទៅលេងល្បែង និងសេពគ្រឿងញៀនជាដើម។ ជាក់ស្តែងគេសង្កេតឃើញមានកាស៊ីណូច្រើនកន្លែងនៅក្នុងក្រុងប៉ោយប៉ែតដែលមួយចំនួនបើកឱ្យពលរដ្ឋខ្មែរចូលលេងជារៀងរាល់ថ្ងៃ ដោយពុំមានការទប់ស្កាត់ពីអាជ្ញាធរមានសមត្ថកិច្ចឡើយ។ ចង់អនុវត្តគោលនយោបាយភូមិ-ឃុំមានសុវត្ថិភាព ត្រូវតែបង្ក្រាបបនល្បែងនេះ ៕
ចែករំលែកព័តមាននេះ