របាយការណ៍មួយរបស់ព្រឹទ្ធសភាអាមេរិកចេញផ្សាយកាលពីថ្ងៃទី១៦កក្កដាបង្ហាញថា ធនាគារអង់គ្លេសHSBC បានជួយដល់បណ្តាអតិថិជនក្នុងការលាងលុយកខ្វក់បានមកពីតំបន់គ្រោះថ្នាក់បំផុតនិងសម្ងាត់បំផុតទាំងឡាយនៃពិភពលោក ។ ការស៊ើបអង្កេតរបស់ព្រឹទ្ធសភាអាមេរិកសង្កត់ធ្ងន់នាពេលនេះលើការចូលរួួមរបស់ធនាគារនោះក្នុងការលាងលុយកខ្វក់និងលើអសមត្ថភាពរបស់អាជ្ញាធរត្រួតពិនិត្យធនាគារក្នុងការត្រួតពិនិត្យឱ្យបានត្រឹមត្រូវលើធនាគារ HSBC ។ ឥរិយាបថរបស់ធនាគារនោះត្រូវបានគេដឹងចាប់តាំងពីច្រើនឆ្នាំមកហើយ ។
លោក CARL LEVIN ព្រឹទ្ធសមាជិកដែលដឹកនាំអនុគណៈកម្មការអចិន្ត្រៃយ៍ព្រឹទ្ធសភាទទួលបន្ទុកខាងស៊ើបអង្កេតនិយាយថា នៅធនាគារ HSBC វប្បធម៌បែបនេះមានចាប់តាំងពីយូរមកហើយ ។ របាយការណ៍នេះធ្វើឡើងក្នុងកាលៈទេសៈ អាក្រក់បំផុតសម្រាប់ធនាគារខណៈពេលក្លាយជាកម្មវត្ថុនៃការស៊ើបអង្កេតយ៉ាងទូលំទូលាយមួយផ្តោតលើការក្លែងបន្លំអត្រាប្តូរប្រាក់រវាងបណ្តាធនាគារ ។
ធនាគារនេះបានយល់ព្រមកាលពីខែមុនបង់ប្រាក់៤៥៣លានដុល្លារ ដល់អាជ្ញាធរអាមេរិកនិងអង់គ្លេសដើម្បីបញ្ចប់ការតាមដានដែលខ្លួនជាកម្មវត្ថុនៃការនៃការស៊ើបអង្កេតនោះ ។របាយការណ៍ចេញផ្សាយកាលពីថ្ងៃទី១៦កក្កដា ពឹងផ្អែកលើការសិក្សាឯកសារដល់ទៅ១,៤លាន និងការធ្វើសវនកម្មលើអ្នកទទួលខុសត្រូវរបស់ HSBC និងរបស់អាជ្ញាធរត្រួតពិនិត្យចំនួន៧៥រូប ។ សវនកម្មថ្មី គ្រោងធ្វើនាថ្ងៃទី១៧កក្កដាទៀត ៕
ចែករំលែកព័តមាននេះ