រាជធានីភ្នំពេញ ៖ សន្និសីទទស្សនវិស័យកម្ពុជាឆ្នាំ២០១១ ៖ ភាពជាដៃគូរវាងវិទ្យាស្ថានបណ្តុះបណ្តាលនិងស្រាវជ្រាវដើម្បីអភិវឌ្ឍន៍កម្ពុជា (CDRI) និងធនាគារ ANZ Rayal ស្តីពី «ការជំរុញកំណើនសេដ្ឋកិច្ចខ្ពស់ និងការអភិវឌ្ឍប្រកបដោយចីរភាពនៅកម្ពុជា៖ ឱកាស និងបញ្ហាប្រឈម» ជាការឆ្លើយតបក្រោមការដឹកនាំប្រកបដោយគតិបណ្ឌិតរបស់សម្តេចតេជោនាយករដ្ឋមន្ត្រី។ រាជរដ្ឋាភិបាលបានអនុវត្តជម្រើស គោលនយោបាយ និងវិធានការជាក់ស្តែងមួយចំនួន ទាំងក្នុងវិស័យសេដ្ឋកិច្ច និងសង្គមកិច្ច ដោយបញ្ចៀសបានដោយជោគជ័យនូវបច្ច័យអាក្រក់មកលើការអភិវឌ្ឍសេដ្ឋកិច្ច សង្គមកិច្ច កម្ពុជា ។ ពិធីបើកសន្និសីទទស្សនវិស័យកម្ពុជា ឆ្នាំ២០១១ នេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី១៦ មីនា ឆ្នាំ២០១១ នៅសណ្ឋាគារភ្នំពេញ ។
សម្តេចតេជោនាយករដ្ឋមន្ត្រីមានប្រសាសន៍ថា របៀបវារៈនៃកិច្ចប្រជុំថ្ងៃនេះ បង្ហាញអំពីបញ្ហាប្រឈមនិងកាលានុវត្តភាពមួយចំនួនដែលកម្ពុជាកំពុងជួបប្រទះ ក្នុងការធានាឱ្យបានជាវិជ្ជមាននូវបរិស្ថានល្អក្នុងគោលដៅសម្រេចនូវកំណើន និងការអភិវឌ្ឍប្រកបដោយចីរភាព ដោយឈរលើមូលដ្ឋាននៃសមិទ្ធផលដែលសម្រេចបានប្រកបដោយជោគជ័យ និងជំនះឧបសគ្គនានា ដើម្បីពង្រឹងសមត្ថភាពរបស់កម្ពុជា ក្នុងគោលដៅសម្រេចឱ្យបាននូវគោលដៅអភិវឌ្ឍន៍របស់កម្ពុជា ។
ប្រទេសកម្ពុជានៅតែជាប្រទេសមួយមានសេដ្ឋកិច្ចបើកចំហ ក្នុងចំណោមប្រទេសដែលមានសេដ្ឋកិច្ចបើកចំហនានា ។ គោលនយោបាយជំរុញការនាំចេញអង្ករ និងការបង្កើនផលិតកម្មស្រូវរបស់រាជរដ្ឋាភិបាល នឹងផ្តល់នូវកាលានុវត្តភាពសម្រាប់ប្រជាកសិករ ម្ចាស់រោងម៉ាស៊ីនកិនស្រូវ និងក្រុមហ៊ុននាំចេញទាំងឡាយ និងជាគំរូដ៏ល្អមួយសម្រាប់ដំណាំកសិកម្មផ្សេងទៀត និងសម្រាប់ការអភិវឌ្ឍវិស័យកសិ-ឧស្សាហកម្ម ។ ការស្ថិតនៅចំទីតាំងភូមិសាស្ត្រយុទ្ធសាស្ត្រ ដែលមានការធ្វើសមាហរណកម្មកាន់តែខ្លាំងក្លា គឺស្ថិតនៅក្នុងមហាអនុតំបន់មេគង្គ សហគមន៍អាស៊ាន និងការស្ថិតនៅកៀកនឹងប្រទេសចិន ដែលទើបតែក្លាយជាមហាអំណាចសេដ្ឋកិច្ចធំជាងគេទីពីរ និងជាទីផ្សារធំជាងគេនៅលើពិភពលោក សម្រាប់ស្រូបនូវអតិរេកនៃផលិតកម្មកសិកម្ម គឺជាកត្តាមួយដ៏សំខាន់សម្រាប់ការអភិវឌ្ឍវិស័យឯកជននិងការវិនិយោគ ។
សម្តេចតេជោនាយករដ្ឋមន្ត្រីបញ្ជាក់ថា សេដ្ឋកិច្ចបើកទូលាយ និងផ្តោតលើទីផ្សារនាំចេញដែលបានកសាងលើភាពជោគជ័យនៃពាណិជ្ជកម្ម និងវិនិយោគកន្លងមក នឹងក្លាយជាកម្លាំងសំខាន់មួយសម្រាប់ការធ្វើដំណើរឆ្ពោះទៅមុខ ។ ពាណិជ្ជកម្មកម្ពុជាជាមួយចិន-កូរ៉េខាងត្បូង និងវៀតណាម បានកើនឡើងខ្លាំងក្នុងឆ្នាំ២០១០ ដោយសារតែការងើបឡើងវិញនៃការនាំចេញសម្លៀកបំពាក់ទៅកាន់ប្រទេសសហគមន៍អឺរ៉ុប និងប្រទេសអាមេរិកខាងជើង ។
គោលនយោបាយនាំចេញអង្កររបស់រាជរដ្ឋាភិបាល ឆ្លុះបញ្ចាំងពីសក្តានុពលខ្ពស់របស់កម្ពុជា ក្នុងផលិតកម្មកសិកម្ម និងភាពចាំបាច់បន្តជំរុញ និងទាក់ទាញអ្នកវិនិយោគទុន ដើម្បីវិនិយោគក្នុងវិស័យកសិកម្ម ទាំងផលិតកម្មស្រូវ និងដំណាំសម្រាប់នាំចេញដែលមានតម្រូវការខ្ពស់ក្នុងតំបន់ ដូចជា ដំឡូងមី សណ្តែកសៀង កៅស៊ូ និងការកែច្នៃចំណីអាហារ និងវិស័យកសិ-ឧស្សាហកម្ម កាន់តែទូលំទូលាយថែមទៀត ។ ជាមួយគ្នានេះដែរ កម្ពុជាចាំបាច់ផ្តោតកិច្ចខិតខំប្រឹងប្រែងពីការបង្កើតឧស្សាហកម្មថ្មីដូចជា ការដំឡើងរថយន្ត ឧបករណ៍អគ្គិសនី និងឧស្សាហកម្មធុនស្រាលផ្សេងទៀត ដើម្បីសម្រួលពាណិជ្ជកម្ម និងបរិយាកាសវិនិយោគ ដោយអនុវត្តឱ្យមានប្រសិទ្ធភាពខ្ពស់នូវគោលនយោបាយឧស្សាហកម្ម ។ ដើម្បីធានានូវបរិស្ថានដ៏ល្អប្រសើរសម្រាប់ចរាចរណ៍ឱ្យបានសេរីនូវកម្លាំងពលកម្ម និងទំនិញទាំងនៅក្នុងប្រទេស និងទាំងឆ្លងកាត់ព្រំដែនរបស់ខ្លួន កម្ពុជានឹងបន្តពង្រឹងនូវវឌ្ឍនភាពដែលកម្ពុជាសម្រេចបានក្នុងការស្តារ និងកសាងផ្លូវ ស្ពាន ផ្លូវដែក កំពង់ផែ និងប្រព័ន្ធធារាសាស្ត្រនានា ដោយផ្តោតអាទិភាពទៅលើការធានាឱ្យបាននូវការផលិតថាមពលប្រកបដោយប្រសិទ្ធភាពខ្ពស់ និងការគោរពនូវស្តង់ដាបរិស្ថាន ។ កម្ពុជានឹងអនុវត្តនូវគម្រោងដែលមានទឹកប្រាក់ចំនួន១៤១លានដុល្លារអាមេរិក តភ្ជាប់បណ្តាញផ្លូវដែកប្រវែង៦៥០គីឡូម៉ែត្រ ពីរាជធានីភ្នំពេញ ទៅដល់ព្រំដែនប្រទេសវៀតណាម និងថៃ ហើយនិងកំពុងស្តារឡើងវិញ និងពង្រីកនូវប្រព័ន្ធផ្លូវដែកក្នុងប្រទេសទាំងមូល ។
សម្តេចតេជោនាយករដ្ឋមន្ត្រីគូសបញ្ជាក់ទៀតថា វិស័យអាទិភាពមួយទៀត គឺការកសាងហេដ្ឋារចនាសម្ព័ន្ធផលិតថាមពលអគ្គិសនីបង្កើនអត្រាគ្របដណ្តប់ការប្រើប្រាស់ថាមពលអគ្គិសនី ដើម្បីជំរុញការអភិវឌ្ឍសេដ្ឋកិច្ចនៅតាមទីជនបទ ។ នៅក្នុងរយៈពេលវែង កម្ពុជានឹងអាចទាញយកផលប្រយោជន៍ពីអាជីវកម្មធនធានប្រេង និងឧស្ម័ននៅក្នុងសមុទ្រ ក៏ប៉ុន្តែនៅក្នុងរយៈពេលខ្លី កម្ពុជានឹងផ្តោតការយកចិត្តទុកដាក់ជាសំខាន់លើការបង្កើនយ៉ាងខ្លាំងក្លានូវសមត្ថភាពផលិតអគ្គិសនី តាមរយៈការសាងសង់ស្ថានីយវារីអគ្គិសនី និងការគ្រប់គ្រងផលប៉ះពាល់បរិស្ថានឱ្យបានល្អប្រសើរ ។
ទាំងនេះ គឺជាកាលានុវត្តភាពសំខាន់ៗនិងបញ្ហាប្រឈមនានាដែលយើងទាំងអស់គ្នាបានជួបប្រទះ ។ កម្ពុជានឹងខិតខំប្រឹងប្រែងធានាឱ្យបាននូវកំណើនសេដ្ឋកិច្ចខ្ពស់ដែលអាចចែករំលែកផ្លែផ្កាដល់ប្រជាជនគ្រប់ស្រទាប់ និងធានាឱ្យបាននូវការអភិវឌ្ឍប្រកបដោយចីរភាពនៅព្រះរាជាណាចក្រកម្ពុជា ។ កម្ពុជាមានសុទិដ្ឋិនិយមចំពោះទស្សនវិស័យអនាគត ដោយកំណើនសេដ្ឋកិច្ចត្រូវបានព្យាករណ៍ថា កើនចន្លោះពី៦ទៅ៧ភាគរយជាមធ្យមក្នុងមួយឆ្នាំ ។ ដូច្នេះ កម្ពុជាត្រូវធ្វើពិពិធកម្មរចនាសម្ព័ន្ធសេដ្ឋកិច្ចរបស់កម្ពុជា ដោយមិនត្រឹមតែផ្តោតលើទីផ្សារអាមេរិក និងអឺរ៉ុបប៉ុណ្ណោះទេ តែត្រូវផ្តោតលើទីផ្សារអាស៊ីផងដែរ ។
លោកបណ្ឌិត ហង់ ជួនណារ៉ុន ប្រធានក្រុមប្រឹក្សាភិបាលនៃវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) បានថ្លែងថា ឆ្លងតាមបទពិសោធន៍ពីវិបត្តិហិរញ្ញវត្ថុពិភពលោក បានកត់សំគាល់ឃើញថា កម្ពុជាបានឆ្លងកាត់ប្រកបដោយជោគជ័យនូវវិញ្ញាសាសេដ្ឋកិច្ចសំខាន់មួយទៀត គឺ ការដោះស្រាយការគ្រប់គ្រងស្ថានការណ៍វិបត្តិ និងការស្តារសេដ្ឋកិច្ចឱ្យមានការរីកលូតលាស់ឡើងវិញ ។
លោកប្រធានក្រុមប្រឹក្សាភិបាលថ្លែងបន្តថា សម្រាប់សន្និសីទថ្ងៃនេះ យើងពិភាក្សាលើប្រធានបទបីសំខាន់ ដើម្បីត្រួសត្រាយផ្លូវសម្រាប់ការងើបឡើងវិញ នៃសេដ្ឋកិច្ចកម្ពុជាឆ្ពោះទៅរកមាគ៌ាអភិវឌ្ឍន៍ប្រកបដោយចីរភាព គឺទី១-ការជំរុញកំណើនខ្ពស់ និងការអភិវឌ្ឍប្រកបដោយចីរភាពនៅកម្ពុជា ទី២-កត្តាសំខាន់ៗដើម្បីធានាបរិយាកាសក្នុងការជំរុញកំណើនខ្ពស់ និងការអភិវឌ្ឍប្រកបដោយចីរភាពនៅកម្ពុជា និងទី៣-ការត្រៀមរៀបចំរបស់កម្ពុជាសម្រាប់កំណើនខ្ពស់ និងការអភិវឌ្ឍប្រកបដោយចីរភាព តាមរយៈការពង្រីកកត្តាជោគជ័យ និងការបំបាត់កត្តារាំងស្ទះ ។ ទស្សនៈដែលយល់ឃើញរួមគ្នា នឹងប្រែក្លាយជាសកម្មភាពជាក់ស្តែងរៀងៗខ្លួនទៅតាមតួនាទីរបស់តួអង្គនីមួយៗ ប៉ុន្តែបំពេញឱ្យគ្នាទៅវិញទៅមក ប្រទាក់ក្រឡាគ្នា និងឆ្លើយឆ្លងគ្នា សំដៅសម្រេចឱ្យបាននូវគោលដៅនៃកំណើនសេដ្ឋកិច្ចខ្ពស់ និងការអភិវឌ្ឍប្រកបដោយចីរភាពដែលជាបំណងប្រាថ្នារបស់យើងគ្រប់ៗគ្នា ៕
ចែករំលែកព័តមាននេះ