រាជធានីភ្នំពេញ ៖ ជ័យ ប៊ុនសង់ មកពីក្លិបខេមរិន្ទប្ញទ្ធិ បានវាយផ្តួលកីឡាករ ថាន់ ថាត មកពីក្លិបបូរីរាជសីហ៍មានប្ញទ្ធិឱ្យសន្លប់នៅមុនស្នូរជួងបញ្ចប់ទឹកទី៥នៅលើសង្វៀនស្ថានីយទូរទស្សន៍ CTN កាលពីថ្ងៃអាទិត្យ ទី១៥ កក្កដា កន្លងមកនេះ ។ការជួបគ្នារវាងជើងថ្មីទាំង២លើកនេះ ប៊ុនសង់ មានប្រៀបជាង ថាន់ ថាត តាំងពីទឹកទី២មកម៉្លេះ ។ ស្នៀតជង្គង់របស់ ប៊ុនសង់ បានវាយប្រហារទៅលើពោះទឹកថាន់ ថាត ពេញៗ ខណៈដែល ថាន់ ថាត ព្យាយាមបញ្ចេញស្នៀតកណ្តាប់ដៃវាយបកសងវិញយ៉ាងលំបាកបំផុត ។ ថាន់ ថាត ចាប់ផ្តើមដកថយគេចចេញពីការវាយលុករបស់ ប៊ុនសង់ ទាំងព្រលឹងចុងសក់នៅទឹកទី៤ និងទឹកទី៥ ប៉ុន្តែមិនអាចគេចផុតពីផ្លៃជង្គង់របស់ប៊ុនសង់ បានឡើយ ។
អីុ ប៊ុនថា មកពីក្លិបអេភូថងកីឡា បានផ្តួលអ្នកប្រដាល់ចាស់វស្សា ហួន សុខនីម ឱ្យសន្លប់នៅត្រឹមទឹកទី៣ ។ សុខនីម ថ្វីដៃប្រកួតរបស់គេពិតជាមិនអន់ឡើយ ប៉ុន្តែពេលមកប៉ះ ប៊ុនថា លើកនេះ បែរជាបង្ហាញនូវភាពអន់ខ្សោយយ៉ាងខ្លាំងចាប់ពីទឹកទី២រហូតទៅ ដោយគេឃើញប៊ុនថា ទាត់ត្រូវជើងឱ្យដួលជាច្រើនលើកច្រើនសា ។ ចូលដល់ទឹកទី៣ ប៊ុនថា បានបញ្ចេញស្នៀតកែង និងជង្គង់វាយសម្រុកទៅលើ សុខនីម ដូចព្យុះរហូតធ្វើឱ្យ សុខ នីម មិនអាចតស៊ូប្រកួតបានតទៅទៀត ។
រ៉ាក់ វិឆ័យ មកពីក្លិបកងពលតូចលេខ៧០ និង ចៅ ផលឌឿ មកពីក្លិបតេជរាជសីហ៍បង្ក្រាបគ្រឿងញៀនខេត្តក្រចេះ ត្រូវអាជ្ញាកណ្តាលសម្រេចមិនប្រកាសលទ្ធផល ខណៈពួកគេត្រូវបានមើលឃើញថា ប្រកួតមិនអស់ពីសមត្ថភាពនៅត្រឹមទឹកទី៣ ។
កន ចន្ថា មកពីក្លិបអាជ្ញាធរជាតិអាវុធគីមី ប្រកួតចាញ់ពិន្ទុ ផុន ផុល មកពីក្លិបតាព្រហ្មមានជ័យបង្ក្រាបគ្រឿងញៀន ៕
ចែករំលែកព័តមាននេះ