សហគមន៍អន្តរជាតិនៅតែពុំទាន់ចុះសំរុងគ្នាលើការធ្វើអន្តរាគមន៍យោធានៅលីប៊ី។ ការប្រយុទ្ធគ្នាមានការកើនឡើងពីមួយថ្ងៃទៅមួយថ្ងៃដែលកងកម្លាំងស្និទ្ធលោកកាដាហ្វី បានធ្វើការវាយបកក្នុងតំបន់ឈូងសមុទ្រ SYRTE។ នាថ្ងៃទី៧ មីនា មានការវាយប្រហារតាមអាកាសប្រឆាំងកំពង់ផែប្រេង RAS LANOUF ។ ទន្ទឹមនឹងនេះមានការខិតខំប្រឹងប្រែងនានាដើម្បីប៉ុនប៉ងជួយដល់ប្រជាជនស៊ីវិល និងទប់ស្កាត់ការរត់ភៀសខ្លួនរបស់ពួកគេ។
យោងតាមអ.ស.បថា មនុស្សជាង១លាននាក់បានរត់ភៀសខ្លួនចេញពីលីប៊ី ឬជាប់ក្នុងអំពើហិង្សានៅខាងក្នុងប្រទេសដោយពួកគេត្រូវការជំនួយបន្ទាន់។ អ.ស.ប វាយតម្លៃថា មនុស្ស២០០.០០០នាក់ បានរត់ភៀសខ្លួនចេញពីលីប៊ីរួចហើយ និងគ្រោងពីការចាកចេញរបស់មនុស្ស២០០.០០០នាក់ទៀត ហើយយល់ថា មនុស្សដល់ទៅ៦០០.០០០នាក់កំពុងស្ថិតក្នុងគ្រោះថ្នាក់នៅលីប៊ី។ កងកម្លាំងរបស់លោកកាដាហ្វី មានវត្តមាននៅលើគ្រប់រណសិរ្សទាំងអស់។ នៅលើរណសិរ្សភាគខាងកើតប្រទេស កងកម្លាំងលោកកាដាហ្វី ក្រោយដណ្តើមយកបានមូលដ្ឋាន BIN DJAOUAD បានចូលទៅកាន់ទីក្រុង RAS LANOUF ។ ប្រជាជននៃក្រុងកំពង់ផែ RAS LANOUF ដែលបញ្ឈប់សកម្មភាពចាប់ផ្តើមចាកចេញពីទី ក្រុងនេះ ហើយពួកបះបោរនិយាយថា នាំពួកគេទៅរកជម្រកនានានៅវាលខ្សាច់។ មានការទម្លាក់គ្រាប់បែកជាច្រើននៅទីក្រុងនេះ។ ពួកបះបោរបានស្នើដល់សហគមន៍អន្តរជាតិឱ្យធ្វើការវាយឆ្មក់តាមអាកាសប្រឆាំងនឹងកងកម្លាំងលោកកាដាហ្វី។ ពួកបះបោរបានទប់ទល់វិញជាមួយនឹងកាំភ្លើងធំព្រមទាំងកាំភ្លើងការពារអាកាស ៕
ចែករំលែកព័តមាននេះ