រាជធានីភ្នំពេញ ៖ នៅភ្នំពេញមានកន្លែងទេសចរណ៍ជាច្រើនសម្រាប់ទាក់ទាញភ្ញៀវ ជា ពិសេសភ្ញៀវបរទេសដូចជាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ព្រះបរមរាជវាំងជាដើម ។ ដោយឡែកសារមន្ទីរជាតិកម្ពុជាជាកន្លែងដែលភ្ញៀវទាំងជាតិនិងបរទេសចង់ចូលទស្សនាដែរ ហើយបើតាមរបាយការណ៍ពីទីនោះឱ្យដឹងថា ក្នុងរយៈពេលមួយឆមាសនៃឆ្នាំនេះភ្ញៀវចូល
រាជធានីភ្នំពេញ ៖ នៅភ្នំពេញមានកន្លែងទេសចរណ៍ជាច្រើនសម្រាប់ទាក់ទាញភ្ញៀវ ជា ពិសេសភ្ញៀវបរទេសដូចជាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ព្រះបរមរាជវាំងជាដើម ។ ដោយឡែកសារមន្ទីរជាតិកម្ពុជាជាកន្លែងដែលភ្ញៀវទាំងជាតិនិងបរទេសចង់ចូលទស្សនាដែរ ហើយបើតាមរបាយការណ៍ពីទីនោះឱ្យដឹងថា ក្នុងរយៈពេលមួយឆមាសនៃឆ្នាំនេះភ្ញៀវចូលទស្សនាមានការកើនឡើងបើប្រៀបធៀបរយៈពេលដូចគ្នានៃឆ្នាំមុន ។
តាមរបាយការណ៍របស់លោកប្រាក់ ខេមរិន្ទ ប្រធានរដ្ឋបាល និងហិរញ្ញវត្ថុសារមន្ទីរជាតិឱ្យដឹងថា ភ្ញៀវជាតិចូលទស្សនាក្នុងសារមន្ទីរជាតិរយៈពេល៦ខែនៃឆ្នាំ២០១២សរុបមានចំនួន១៣.០៩៨នាក់ ចំណែកភ្ញៀវអន្តរជាតិមានចំនួនសរុប៥៤.៥៨២នាក់ ។ បើប្រៀបធៀបទៅនឹងឆ្នាំ២០១១ឃើញថាភ្ញៀវជាតិនិងអន្តរជាតិចូលទស្សនានៅសារមន្ទីរជាតិយើងមានការកើនឡើងប្រមាណជាង១០%។ កាលពីឆ្នាំ២០១១ ភ្ញៀវជាតិចូលទស្សនានៅសារមន្ទីរសរុបមានត្រឹមតែ១២.៩៨៣នាក់ប៉ុណ្ណោះ ក្នុងឆមាសទី១ ចាប់ពីខែមករាដល់ដំណាច់ខែមិថុនា ចំណែកភ្ញៀវអន្តរជាតិមានសរុបចំនួន៤៥.៦៧៤នាក់ ។
ភ្ញៀវជាតិ និងអន្តរជាតិចូលទស្សនានៅក្នុងសារមន្ទីរជាតិភាគច្រើនគេចាប់អារម្មណ៍ទៅលើវត្ថុបុរាណគ្រប់ប្រភេទ ជាពិសេសព្រះនារាយណ៍ និងរូបសំណាកព្រះបាទជ័យវរ្ម័នទី៧ ។ លោកប្រាក់ ខេមរិន្ទ ឱ្យដឹងថា នៅក្នុងសារមន្ទីរជាតិពីមួយថ្ងៃទៅមួយថ្ងៃ ក្រុមការងារមិនត្រឹមតែថែរក្សាវត្ថុបុរាណដែលមានដាក់តម្កល់តាំងពីសារមន្ទីរបង្កើតឡើងមកនោះទេ គឺកន្លងមកតែងតែទទួលវត្ថុបុរាណផ្សេងៗនាំមកពីខេត្តនានាទូទាំងព្រះរាជាណាចក្រកម្ពុជារៀបចំថែរក្សាទុក ។ ក្រៅពីនេះទៀត ក្រុមការងារបានជួសជុលជាបន្តបន្ទាប់ចំពោះវត្ថុបុរាណណាបាក់បែកខូចខាត ។
លោកសុខ ភិរម្យ ជានិស្សិតនៅសាកលវិទ្យាល័យមួយក្នុងរាជធានីភ្នំពេញដែលចូលទស្សនាសារមន្ទីរជាតិកាលពីថ្ងៃទី១១ កក្កដា និយាយថា លោកចូលទស្សនាសារមន្ទីរជាតិ នេះ ព្រោះចង់ឃើញវត្ថុបុរាណដែលជាកេរដូនតា ហើយលោកយល់ថា វត្ថុនីមួយៗមានភាពវិចិត្រ និងមានតម្លៃបេតិកភណ្ឌខ្ពស់ ។ ទន្ទឹមនេះលោកភិរម្យ មានមោទនភាពដែលឃើញភ្ញៀវជាតិ និងភ្ញៀវបរទេសចូលទស្សនា សារមន្ទីរជាតិច្រើន ហើយសុទ្ធតែកោតសរសើរស្នាដៃសិល្បៈដូនតាខ្មែរ ៕
ចែករំលែកព័តមាននេះ