បណ្តាទីតាំងប្រេង និងឧស្ម័នគឺទីក្រុង BREGA និងក្រុង GAS LANOUF ដែលផ្គង់ផ្គង់ពិសេសឧស្ម័នដល់មជ្ឈមណ្ឌលអគ្គិសនីជាច្រើននាភាគខាងកើតលីប៊ី ពេលនេះស្ថិតក្នុងការត្រួតត្រារបស់កងកម្លាំងលោកកាដាហ្វី វិញ ហើយ។ រដ្ឋាភិបាលក្រុងទ្រីប៉ូលី ក្រោយដណ្តើម យកបានទីក្រុងទាំង២នោះវិញអាចផ្តាច់ភ្លើងក្នុងបណ្តាទីក្រុងស្ថិតក្រោមការកាន់កាប់របស់ពួកបះបោរនៅភាគខាងកើតលីប៊ី ។
ពីទីក្រុង RAS LANOUF ប្រេងឆៅចម្រាញ់ដល់២២០.០០០ធុង ក្នុងមួយថ្ងៃចេញពីទីនោះ ព្រមទាំងឧស្ម័នជាច្រើនតោនផងដែរ ។ មេដឹកនាំលីប៊ី លោកកាដាហ្វី បានគំរាមពីការធ្វើសង្គ្រាមប្រេងកាតមួយដែលប្រការនេះធ្វើឱ្យប៉ះ ពាល់ភ្លាមៗដល់ផ្សារភាគហ៊ុន និងធ្វើឱ្យតម្លៃប្រេងឡើងខ្ពស់បន្តិចទៀត ដែលនោះជាការគាបសង្កត់វិញលើបណ្តាប្រទេសលោកខាងលិច ដែលចំណុះលើការនាំចូលប្រេងកាត ។
ការវាយប្រហារតាមអាកាស និងការវាយប្រហារទាំងឡាយអាចឱ្យកងទ័ពរបស់លោកកាដាហ្វីវាយបណ្តេញកាលពីថ្ងៃទី១០ មីនា នូវពួកឧទ្ទាមជាច្រើនរយនាក់ចេញពីកំពង់ផែប្រេងយុទ្ធសាស្ត្រ RAS LANOUF ខណៈដែលការពិភាក្សាជាអន្តរជាតិលើមធ្យោបាយបញ្ឈប់ការបង្ក្រាបបង្ហូរឈាមនៅបន្តទៀតដោយមានការមិនចុះសម្រុងគ្នា ។ ក៏ប៉ុន្តែពួកប្រឆាំងបានទទួលជោគជ័យលើរណសិរ្សការទូត ។ ប្រទេសបារាំង បានក្លាយជាប្រទេសដំបូងគេដែលទទួលស្គាល់ក្រុមប្រឹក្សាជាតិលីប៊ី ជាតំណាងស្របច្បាប់ របស់ប្រជាជន ហើយការផ្លាស់ប្តូរឯកអគ្គរដ្ឋទូតគ្រោងរវាងក្រុងប៉ារីស និងក្រុងបេនហ្គាហ្ស៊ីជាទីក្រុងសំខាន់នៅភាគខាងកើតលីប៊ី ស្ថិតក្នុងកណ្តាប់ដៃពួកឧទ្ទាម ។ ចំណែករដ្ឋការលោកអូបាម៉ាវិញប្រកាសផ្អាកទំនាក់ទំនងជាមួយស្ថានទូតលីប៊ីប្រចាំក្រុងវ៉ាស៊ីនតោនដោយរដ្ឋមន្ត្រីការបរទេសអាមេរិកលោកស្រីហ៊ីលឡារីគ្លីនតុនបញ្ជាក់ថា លោកស្រីនឹងជួបនាសបា្តហ៍ខាងមុខនេះ ជាមួយបណ្តាមេដឹកនាំប្រឆាំងនៅសហរដ្ឋអាេមរិក អេហ្ស៊ីប និងទុយនីស៊ី ។
សម្រាប់ពេលនេះនៅពុំទាន់មានអ្វីប្រាកដ ដែលគូសបញ្ជាក់ថា ពួកលោកខាងលិចនឹងអាចផ្តល់ ជំនួយខាងយោធាដល់ពួកបះបោរ ក៏ដូចជាការបង្កើតតំបន់ហាមហោះហើរមួយពីលើដែនដីលីប៊ី ដែរ ។
រងការវាយប្រហារនៅក្រុង RAS LAN-OUF ចម្ងាយ៦២០គ.ម ខាងកើតក្រុងទ្រីប៉ូលី ពួកឧទ្ទាមបានរត់គេចខ្លួនជាច្រើនរយនាក់សំដៅ ទៅកាន់ទិសខាងកើតតាមរថយន្ត ។ ឧទ្ទាមម្នាក់ និយាយថា គ្រាប់រ៉ុក្កែត និងគ្រាប់កាំភ្លើងផ្លោងបាញ់ចេញពីរថក្រោះធ្លាក់ដូចទឹកភ្លៀងលើទីក្រុង នេះដែលហាក់ដូចជាការវាយលុកពេញបន្ទុករបស់កងកម្លាំងលោកកាដាហ្វី ។ នៅភាគខាងលិចប្រទេសលោកកាដាហ្វីអះអាងពីការវាយដណ្តើមយកបានវិញនូវទីក្រុង ZAOUIAH ជាទីក្រុងស្ថិតនៅក្បែរក្រុងទ្រីប៉ូលី ។
យោងតាមកាកបាទក្រហមអន្តរជាតិថា ជនស៊ីវិលជាច្រើនសិបនាក់ត្រូវស្លាប់ និងរបួសរយៈពេលប៉ុន្មានថ្ងៃចុងក្រោយនេះក្នុងការប្រយុទ្ធគ្នា រវាងកងទ័ពលោកកាដាហ្វី និងពួកឧទ្ទាម ៕
ចែករំលែកព័តមាននេះ