សារព័ត៌មានបរទេសផ្សាយឱ្យដឹងថា ក្មេងប្រុសសូទូគូម៉ា ជនជាតិឥណ្ឌាអាយុ៦ឆ្នាំ បានរត់ដេញបៅដោះឆ្កែដើម្បីបំបាត់ការស្រេកឃ្លាន និងគួរឱ្យចម្លែកដែលឆ្កែនោះយល់ព្រមឱ្យមនុស្សបៅដូចជាកូនរបស់វា ។ ក្មេងប្រុសសូទូ មិនបានចូលរៀន និងគ្មានមិត្តភក្តិទេបានបៅដោះឆ្កែអស់រយៈពេល២ឆ្នាំមក ហើយ ។ ក្មេងនេះបញ្ជាក់ប្រាប់អ្នកយកព័ត៌មានអង់គ្លេសថា «គ្រួសាររបស់ខ្ញុំក្រីក្រ ពេលខ្លះខ្ញុំហេវក៏បៅដោះឆ្កែ ។ វាមិនខាំខ្ញុំទេ ហើយខ្ញុំពេញចិត្តវា ឯវាក៏ចូលចិត្តខ្ញុំដែរ ។ ឆ្កែនេះចិញ្ចឹមខ្ញុំដូចកូនរបស់វាដែរ ។
ខ្ញុំចូលចិត្តប្រលែងលេងជាមួយសត្វឆ្កែ ពួកវាប្រៀបដូចជាមិត្តភក្តិរបស់ខ្ញុំ ។ ខ្ញុំបៅដោះឆ្កែក្នុងមួយថ្ងៃ៣ដងដោយមានរសជាតិផ្អែមដូចស្ករ ។ អ្នកភូមិជាច្រើននាក់មិនចូលចិត្តដែលខ្ញុំប្រលែងលេងជាមួយឆ្កែ ប៉ុន្តែខ្ញុំមានសេចក្តីសុខ ហើយវាចិត្តល្អលើខ្ញុំ រួមទាំងផ្តល់ទឹកដោះឱ្យខ្ញុំបៅ» ។
ក្មេងប្រុសសូទូរស់នៅជាមួយអ្នកស្រីសានីសារី ដេវីជាម្តាយអាយុ៣៧ឆ្នាំ លោកយាយអាមីយ៉ា សេវី អាយុ៦០ឆ្នាំ និងជាមួយបងប្រុសចំនួន២នាក់ អាយុ១៤ឆ្នាំ និង១៣ឆ្នាំ នៅក្នុងឃុំថាហ្គាន ភាគខាងកើតប្រទេសឥណ្ឌា ។ ក្រោយពីឪពុករបស់សូទូស្លាប់កាលពី៤ឆ្នាំមុន ជីវភាពរស់នៅរបស់ក្រុមគ្រួសារនោះមានសភាពក្រ លំបាក ។ បូឡា ជាកូនបងត្រូវចេញទៅរកការងារធ្វើសម្រាប់ចិញ្ចឹមគ្រួសារនៅក្បែរសណ្ឋាគារមួយក្នុងទីក្រុង ប៉ុន្តែទទួលបានប្រាក់ខែតិចជាង៣០ដុល្លារ ។ ទោះជាយ៉ាងណាក្តី ការបង្ហាញពីជីវិតក្មេងប្រុសម្នាក់នោះវាមិនឆ្លុះបញ្ចាំងជាទូទៅសម្រាប់ក្មេងនៅឥណ្ឌាឡើយ ។
ចំណែកម្តាយនិងលោកយាយចូលព្រៃទៅរកអុសលក់សម្រាប់យកប្រាក់ទិញអាហារចម្បងគឺបន្លែ និងនំប៉័ង ។ នៅពេលម្តាយឃើញកូនប្រុសបៅដោះឆ្កែជាលើកដំបូង ព្យាយាមទាញចេញ ប៉ុន្តែនៅពេលដឹងថាកូនឃ្លានខ្លាំងទើបបណ្តែតបណ្តោយតាមចិត្តគេ ។ អ្នកស្រុកបារម្ភថា ក្មេងប្រុសនោះនឹងឆ្លងជំងឺឆ្កែឆ្កួត និងបង្កគ្រោះថ្នាក់ដល់ជីវិត រួមទាំងអាចចម្លងរោគដល់ក្មេងៗដទៃទៀតផង។ តាមទិន្នន័យរបស់អង្គការយូនីសេហ្វ (UNICEF) បញ្ជាក់ថា ប្រហែល៩០% នៃកុមារអាយុទាបជាង៣ឆ្នាំនៅឃុំថាហ្គាន ស្ថិតក្នុងសភាពអត់ឃ្លាននិងមានក្មេងស្លាប់បាត់បង់ជីវិត២៥.០០០នាក់ក្នុងមួយឆ្នាំ ៕
ចែករំលែកព័តមាននេះ