សារព័ត៌មានបរទេស ផ្សាយឱ្យដឹងថា រដ្ឋាភិបាលឥណ្ឌាបានប្រកាសពីនយោបាយ ចែកថ្នាំដោយឥតគិតថ្លៃដល់ប្រជាពលរដ្ឋក្នុងតម្លៃសរុប៥.៤០០លានដុល្លារ តាមរយៈមន្ទីរពេទ្យរហូតដល់គ្លីនិកខ្នាតតូចៗនៅជនបទ ។ គ្រូពេទ្យអាចចែកថ្នាំដោយឥតគិតថ្លៃទាំងនេះដល់អ្នកជំងឺគ្រប់រូប ។
មន្ត្រីម្នាក់ឱ្យដឹងថា ផែនការរបស់រដ្ឋាភិបាលនេះកើតឡើងយ៉ាងស្ងៀមស្ងាត់កាលពីឆ្នាំកន្លងមក ប៉ុន្តែគ្មានការផ្សព្វផ្សាយ ។ ថវិកាដំណាក់កាលដំបូងសម្រាប់ប្រើប្រាស់ក្នុងគម្រោងការនេះបានឆ្លងកាត់ការអនុម័តក្នុងអំឡុងពេលជាច្រើនសប្តាហ៍កន្លងទៅ ។
គម្រោងនេះ វេជ្ជបណ្ឌិតត្រូវចែកចាយតែលើឱសថដែលមាននៅក្នុងបញ្ជី ហើយក៏ត្រូវដាក់ទោសប្រសិនបើមានចែកចាយឱសថប្រភេទដូចគ្នាដែលមានស្លាកសញ្ញាពាណិជ្ជដល់អ្នកជំងឺ ។ គម្រោងនេះអាចបង្កឱ្យមានផលប៉ះពាល់យ៉ាងធ្ងន់ដល់ក្រុមហ៊ុនផលិតឱសថដ៏ធំនៅលើពិភពលោក ។
រដ្ឋាភិបាលឥណ្ឌាឱ្យដឹងទៀតថា គម្រោងការនេះនឹងធ្វើឱ្យជនជាតិឥណ្ឌាប្រហែលពាក់កណ្តាលនៅក្នុងប្រទេស នឹងបានទួលប្រយោជន៍ពីការចែកជូនឱសថក្នុងអំឡុងពេល៥ឆ្នាំខាងមុខ ។ កាលពីខែមីនា កន្លងមក រដ្ឋាភិបាលឥណ្ឌាបានអនុម័តឱ្យក្រុមហ៊ុនផលិតថ្នាំក្នុងប្រទេស ផលិតឱសថសម្រាប់ព្យាបាលមហារីករូបមន្តតែមួយដូចគ្នានឹងឱសថ«នេសាវ៉ា» ដែលផលិតដោយក្រុមហ៊ុន «បាយយ័រ» ដូច្នេះអាចធ្វើឱ្យថ្នាំប្រភេទនេះប្រឈមមុខនឹងការធ្លាក់ចុះថ្លៃ ៕
ចែករំលែកព័តមាននេះ