ក្រុងប៉ោយប៉ែត ៖ តាមប្រភពព័ត៌មានពីច្រកតំបន់បឹងត្រកួនស្ថិតក្នុងស្រុកថ្មពួក ខេត្តបន្ទាយមានជ័យឱ្យដឹងថា អាជ្ញាធរ និងសមត្ថកិច្ចសៀមរបស់ខេត្តស្រះកែវនៅថ្ងៃទី២៣ មីនា បានចូលមកពិនិត្យបង្គោលឡាក់ព្រំដែនលេខ៣៦ចំនួន២ដងផ្ទួនៗគ្នាដោយឯកតោភាគី និងមិនផ្តល់សេចក្តីជូនដំណឹងដល់ភាគីកម្ពុជាទេ ហើយថែមទាំងមានក្រុមប្រដាប់អាវុធមួយចំនួនមកជាមួយផង។
ជុំវិញព័ត៌មាននេះបើតាមការឱ្យដឹងពីលោកប្រាក់ សាំ ប្រធានប៉ុស្តិ៍នគរបាលព្រំដែនច្រកតំបន់បឹងត្រកួនប្រាប់កោះសន្តិភាពតាមទូរស័ព្ទថា ពិតជាមានហេតុការណ៍នោះមែន។ នៅវេលាម៉ោង៨ និង៥០នាទីព្រឹក ថ្ងៃទី២៣ មីនា ក្រុមការងារសៀមមានប៉ូលិសការពារព្រំដែនសៀមវរសេនាតូចលេខ១២៤ចំនួន១៧នាក់ ភ្ជាប់មកជាមួយអាវុធM16ចំនួន២ដើម និងអាវុធខ្លីចំនួន២ដើមបានចូលមកពិនិត្យបង្គោលឡាក់លេខ៣៦។ ក្រុមការងារមកពីខេត្តស្រះកែវនេះដឹកនាំដោយលោកអភិបាលរងខេត្ត និងស្នងការប៉ូលិសខេត្ត ព្រមទាំងសហការីចំនួន១០នាក់ និងអ្នកយកព័ត៌មាន៥នាក់។ ក្រុមនោះបានពិនិត្យចំនួន២៥នាទីក៏ត្រឡប់ទៅវិញនៅម៉ោង៩ និង១៥នាទីថ្ងៃដដែល។
លោកនាយប៉ុស្តិ៍បន្តឱ្យដឹងទៀតថា លុះដល់ម៉ោង៣រសៀលមេបញ្ជាការ មេបញ្ជាការរង វរសេនាតូចលេខ១២៤ចំនួន៦នាក់ទៅពិនិត្យបង្គោលឡាក់លេខ៣៦នេះម្តងទៀត។ ខណៈមានការចុះមកពិនិត្យចំណុចបង្គោលឡាក់លេខ៣៦ពីក្រុមការងាររបស់សៀមនេះខាងលោកបានទៅជួបទំនាក់ទំនងសួរនាំ ហើយប្រាប់ពួកគេឱ្យផ្តល់ព័ត៌មានផងមុនពេលចុះមកពិនិត្យបង្គោលឡាក់ព្រំដែន។ ពេលក្រុមការងារខាងកម្ពុជាយើងសួររកហេតុផល ភាគីសៀមប្រាប់ថា គ្រាន់តែពិនិត្យបង្គោលឡាក់ព្រំដែនប៉ុណ្ណោះ។
បង្គោលឡាក់ព្រំដែនមួយនេះស្ថិតនៅភូមិបន្ទាយមានរឹទិ្ធ ឃុំគោករមៀត ស្រុកថ្មពួក ខេត្តបន្ទាយមានជ័យឈមនឹងភូមិថៃ គឺភូមិចាប់សាន់ ឃុំថាត់ថៃ ស្រុកតាប់ប្យា ខេត្តស្រះកែវ និងមានចំងាយប្រមាណ៥០ម៉ែត្រពីច្រកតំបន់បឹងត្រកួន។ តាមប្រភពព័ត៌មានឱ្យដឹងថា ក្នុងការចូលមកពិនិត្យបង្គោលឡាក់ព្រំដែនរបស់ពួកសៀមដោយគ្មានការជូនដំណឹងនេះក៏បានធ្វើឱ្យកំលាំងជួរមុខភាគីកម្ពុជាយើងមានការប្រុងជើងការខ្ពស់ដើម្បីការពារបូរណភាពទឹកដីផងដែរ ៕
ចែករំលែកព័តមាននេះ