រាជធានីភ្នំពេញ ៖ សមត្ថកិច្ចកងរាជអាវុធហត្ថរាជធានី កាលពីថ្ងៃទី២៧ មីនា បានបញ្ជូនលោកព្រិន្ទបាលឯកម្នាក់នៅអង្គភាពកងទ័ពឆត្រយោងទៅកាន់អយ្យការតុលាការយោធាប្រយោជន៍សម្រេចឃុំខ្លួនដាក់ពន្ធនាគារជាបណ្តោះអាសន្នពីបទបាញ់បោះសេរីគ្មានបទបញ្ជា ។ មន្ត្រីយោធាឆត្រយោងខាងលើឈ្មោះពេជ្រ អារុណ ភេទប្រុស អាយុ៤៤ឆ្នាំ មានទីលំនៅផ្ទះជួល ផ្លូវលំ ក្រុមទី៣ ភូមិមានជ័យ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ជាយោធានៅអង្គភាពកងទ័ពឆត្រយោងលេខ៩១១ មានឋានៈព្រិន្ទបាលឯកអត្តលេខ០៥០០០៩ ។
ដើមចមបណ្តាលឱ្យមានការឃាត់ខ្លួនយោធាឆត្រយោងបញ្ជូនទៅតុលាការយោធានេះត្រូវបានមន្ត្រីកងរាជអាវុធហត្ថរាជធានីភ្នំពេញ ឱ្យដឹងថា កាលពីថ្ងៃទី២៥ មីនា ឈ្មោះពេជ្រ អារុណ បានទៅផឹកស៊ីក្រៅផ្ទះបាត់តាំងពីព្រលប់ រហូតដល់ម៉ោង១១និង៣០នាទីយប់ទើបត្រឡប់មកវិញក្នុងសភាពស្រវឹងជោក ។ លុះពេលមកដល់ផ្ទះឈ្មោះពេជ្រ អារុណ បានស្រែកហៅប្រពន្ធឱ្យបើកទ្វារតែប្រពន្ធមិនបើក ធ្វើឱ្យរូបគេខឹងយ៉ាងខ្លាំងក៏បានដកកាំភ្លើងខ្លីម៉ាកប៉េអាកុលបាញ់ឡើងលើចំនួន៥គ្រាប់ ប៉ុន្តែការផ្ទុះអាវុធនោះមិនបណ្តាលឱ្យនរណាម្នាក់រងគ្រោះថ្នាក់ទេ។ ទោះបីជាផ្ទុះអាវុធមិនធ្វើឱ្យប៉ះពាល់ដល់អ្នកដទៃក្តី ក៏សមត្ថកិច្ចចាត់ទុកថា នេះជាសកម្មភាពបាញ់បោះសេរីដែលច្បាប់ហាមឃាត់ ។ ប្រការនេះហើយបានជាកម្លាំងកងរាជអាវុធហត្ថខណ្ឌមានជ័យ ចុះទៅឃាត់ខ្លួនឈ្មោះពេជ្រ អារុណ នាំទៅកាន់ទីបញ្ជាការកងរាជអាវុធហត្ថរាជធានីភ្នំពេញ ទាំងមនុស្សទាំងអាវុធ ហើយបានកសាងសំណុំរឿងបញ្ជូនទៅកាន់តុលាការយោធាដោយចោទប្រកាន់ពីបទបាញ់បោះសេរីគ្មានបទបញ្ជា ។
ទាក់ទិនករណីខាងលើនេះលោកវរសេនីយ៍ត្រី ចាន់ ហេង ប្រធានការិយាល័យសន្តិសុខ ព្រហ្មទណ្ឌកងរាជអាវុធហត្ថរាជធានីភ្នំពេញ បានឱ្យដឹងថា រាល់កិច្ចប្រជុំប្រចាំខែ ឬសប្តាហ៍ លោកឧត្តមសេនីយ៍ទោ យ៉ា គឹមអ៊ី មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ តែងតែណែនាំជាប្រចាំដល់មន្ត្រីកងរាជអាវុធហត្ថឱ្យប្រកាន់ខ្ជាប់វិន័យរបស់កងកម្លាំង និងយល់អំពីនីតិវិធីច្បាប់ក្រមព្រហ្មទណ្ឌថ្មីដែលចូលជាធរមាន ។ មន្ត្រីយោធាកងរាជអាវុធហត្ថមានភារកិច្ចប្រើប្រាស់អាវុធ ខណៈពេលចុះបំពេញបេសកកម្មតែប៉ុណ្ណោះ ពុំមានសិទ្ធិយកអាវុធទៅប្រើប្រាស់ខុសពីបម្រើការងារនោះឡើយ ។ ម្យ៉ាងវិញទៀត ទោះបីអាវុធមានច្បាប់អនុញ្ញាតឱ្យប្រើប្រាស់ក៏ដោយ តែបើអ្នកប្រើអាវុធនោះធ្វើឱ្យផ្ទុះ ឬមានចេតនាបាញ់បោះសេរីពុំធ្វើឱ្យប៉ះពាល់ ឬគ្រោះថ្នាក់ដល់អ្នកដទៃក្តី ច្បាប់ត្រូវបានអនុម័តថា អ្នកនោះប្រើប្រាស់អាវុធខុសច្បាប់ហើយ ។ ដូចករណីនេះ លោកមេបញ្ជាការដាច់ខាតមិនរួញរាក្នុងការបញ្ជូនខ្លួនឈ្មោះពេជ្រ អារុណ ទៅតុលាការយោធាឡើយ ព្រោះពេជ្រ អារុណ មានកំហុសឆ្គងពីបទបាញ់បោះសេរីគ្មានបទបញ្ជា ៕
ចែករំលែកព័តមាននេះ