ខេត្តកណ្តាល ៖ កម្មករឡឥដ្ឋ៣នាក់ ក្នុងចំណោមបក្សពួក៤នាក់ ត្រូវបានសមត្ថកិច្ចនគរបាលនៃការិយាល័យព្រហ្មទណ្ឌខេត្ត សហការជាមួយនគរបាលស្រុកមុខកំពូលឃាត់ខ្លួនកាលពីថ្ងៃទី២៨ កុម្ភៈ បន្ទាប់ពីពួកគេបានផឹកស៊ីស្រវឹងហើយដកកាំភ្លើងខ្លីម៉ាកកា៥៤ បាញ់ភ្ជុចដីមួយគ្រាប់នៅក្បែរឡឥដ្ឋព្រាបកុយ ស្ថិតក្នុងភូមិក្រោម ឃុំព្រែកអញ្ចាញ ស្រុកមុខកំពូល កាលពីវេលាម៉ោង៦និង៣០នាទីល្ងាចថ្ងៃទី២៥ ខែកុម្ភៈ ឆ្នាំ២០១១នៅចំណុចជាប់របងឡឥដ្ឋព្រាបកុយ។
លោកវរសេនីយ៍ត្រី ស៊ឹង សេងលី នាយការិយាល័យនគរបាលព្រហ្មទណ្ឌកំរិតស្រាលខេត្តបានឱ្យដឹងថា ការឃាត់ខ្លួនយុវជនទាំងបីនាក់ក្នុងចំណោមបក្សពួកបួននាក់គឺធ្វើឡើងក្រោមការដឹកនាំផ្ទាល់ពីលោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្ត និងព្រះរាជអាជ្ញាអមសាលាដំបូងខេត្ត សហការជាមួយនគរបាលស្រុកមុខកំពូល។
ជនសង្ស័យដែលសមត្ថកិច្ចឃាត់ខ្លួន១-ឈ្មោះនាង រតនា ភេទប្រុស អាយុ២៣ឆ្នាំ ជាកម្មករឡឥដ្ឋ និងអ្នកកាន់កាំភ្លើងដែលលួចយកមកពីខេត្តកំពង់ចាម មានស្រុកកំណើតនៅភូមិទន្លេអុំ ឃុំបឹងកុក ស្រុកកំពង់ចាម ខេត្តកំពង់ចាម (ឃាត់ខ្លួននៅថ្ងៃទី២៧ ខែកុម្ភៈ) ២-ឈ្មោះឡាត់ កុសល ភេទប្រុស អាយុ១៩ឆ្នាំ ជាកម្មករឡឥដ្ឋ មានស្រុកកំណើតនៅភូមិក្រាំងត្រយ៉ង ឃុំក្រាំងផ្តៅ ស្រុកពាមជរ ខេត្តព្រៃវែង (ឃាត់ខ្លួន ថ្ងៃទី២៨ ខែកុម្ភៈ) ៣-ឈ្មោះថាន ថន ភេទប្រុស អាយុ២៦ឆ្នាំ មុខរបរកម្មករឡឥដ្ឋ មានស្រុកកំណើតនៅភូមិស្វាយបាង ឃុំគ្រោះ ស្រុកព្រះស្តេច ខេត្តព្រៃវែង (ឃាត់ខ្លួនថ្ងៃទី២៨ ខែកុម្ភៈ) និង៤-ឈ្មោះមុំ ផា ភេទប្រុស អាយុ៣០ឆ្នាំ ជាកម្មករលើកឥដ្ឋដាក់រថយន្ត និងជាអ្នកបាញ់បានរត់គេចខ្លួនបាត់។ ជន សង្ស័យទាំងបួននាក់នេះរស់នៅកន្លែងឡឥដ្ឋព្រាបកុយ ស្ថិតក្នុងភូមិក្រោម ឃុំព្រែកអញ្ចាញ ស្រុកមុខកំពូល។ ក្រោយពេលឃាត់ខ្លួនសមត្ថកិច្ចដកហូតបានកាំភ្លើងខ្លីម៉ាកកា៥៤ផលិតនៅប្រទេសសូវៀតចំនួន១ដើម ដែលមានលេខ EK 1349 បង់មួយមាន៧គ្រាប់ ។
លោកស៊ឹង សេងលី បានឱ្យដឹងទៀតថា នៅថ្ងៃទី២ ខែកុម្ភៈ ឆ្នាំ២០១១ ត្រូវនឹងថ្ងៃចូលឆ្នាំចិន ជនសង្ស័យបានទៅលេងផ្ទះបងស្រី ឈ្មោះនាង ដានី នៅភូមិដីថ្មី ស្រុកកំពង់ចាម ខេត្តកំពង់ចាម និងបានស្នាក់នៅទីនោះចំនួន២ថ្ងៃ ហើយបានទៅធ្វើជាកម្មករលាងរថយន្តឱ្យឈ្មោះប៉េង មាន ស្ថិតនៅជិតផ្សារមេមត់។ លុះដល់ថ្ងៃទី១៩ ខែកុម្ភៈ វេលាម៉ោង១២ថ្ងៃត្រង់ មានរថយន្តឆ្លាមពណ៌សមួយគ្រឿងបើកបរដោយទាហានម្នាក់ បានមកលាងរថយន្ត ពេលកំពុងលាងនោះជនសង្ស័យបានប្រទះឃើញកាំភ្លើងខ្លីម៉ាកកា៥៤ ទុកនៅទ្វាររថយន្តផ្នែកខាងមុខ ឃើញដូចនោះជនសង្ស័យបានលួចយកមកសៀតនៅចង្កេះ ហើយបានគេចខ្លួនមកឡឥដ្ឋព្រាបកុយវិញ ។
លោកនាយការិយាល័យនគរបាលព្រហ្មទណ្ឌកំរិតស្រាលខេត្ត បានឱ្យដឹងទៀតថា នៅថ្ងៃទី២៥ ខែកុម្ភៈ វេលាម៉ោង៥ល្ងាចជនសង្ស័យឈ្មោះនាង រតនា ឈ្មោះមុំ ផា ឈ្មោះថាន ថន និងឈ្មោះ ឡាត់ កុសល បាននាំគ្នាផឹកស៊ីនៅកន្លែងដីខ្សាច់ជាប់ខាងត្បូងរបងឡឥដ្ឋព្រាបកុយ រហូតដល់ម៉ោង៦និង៣០នាទី។ ពេល នោះនាង រតនា បានដកកាំភ្លើងខ្លីពីចង្កេះដែលគេលួចយកមកពីខេត្តកំពង់ចាមបង្ហាញឱ្យបក្សពួករបស់គេមើល ភ្លាមនោះឈ្មោះមុំ ផា បានយកកាំភ្លើងខ្លីពីដៃ នាង រតនា រួចបានបាញ់ភ្ជុចដីចំនួន១គ្រាប់ ហើយក៏នាំគ្នាដើរចូលទៅក្នុងទីតាំងឡឥដ្ឋព្រាបកុយវិញ ។
ក្រោយមកសមត្ថកិច្ចបានធ្វើការស្រាវជ្រាវ ហើយបានឃាត់ខ្លួនជនសង្ស័យឈ្មោះនាង រតនា កាលពីវេលាម៉ោង៣រសៀលថ្ងៃទី២៧ ខែកុម្ភៈ យកមកសាកសួរ រួចក៏ឈានទៅចាប់បានបក្សពួកពីរនាក់ទៀត គឺឈ្មោះថាន ថន និងឈ្មោះឡាត់ កុសល កាលពីវេលាម៉ោង៩ព្រឹកថ្ងៃទី២៨ ខែកុម្ភៈ។ ចំណែកជនសង្ស័យឈ្មោះមុំ ផា ដែលជាអ្នកបាញ់បានរត់គេចខ្លួនបាត់ ហើយសមត្ថកិច្ចកំពុងតាមចាប់ខ្លួនជននេះផងដែរ ។ លោកស៊ឹង សេងលី បានបញ្ជាក់ថា ក្រោយការឃាត់ខ្លួននិងសាកសួរ គឺក្រុមនេះពេលដែលលួចយកកាំភ្លើងបានហើយ ពួកគេបានរៀបចំគម្រោងប្លន់ដែលគោលដៅទីមួយ គឺនៅខេត្តកំពង់ចាម គោលដៅទី២នៅខេត្តព្រៃវែង និងគោលដៅទី៣ នៅស្រុកមុខកំពូល ខេត្តកណ្តាលនេះតែម្តង ៕
ចែករំលែកព័តមាននេះ