ខេត្តកំពត ៖ ក្រោយពីមានសេចក្តីរាយការណ៍ពីប្រជាពលរដ្ឋនៅក្បែរច្រកទ្វារព្រំដែនព្រែកចាកមកថា គេបានឃើញឈ្មួញដឹកឈើគ្រញូងជាច្រើនដុំមកស្តុកទុកនៅផ្ទះលក់គ្រឿងទេសមួយក្បែរច្រកទ្វារព្រំដែនព្រែកចាកស្ថិតក្នុងភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច លោកជួន សារ៉ា នាយផ្នែករដ្ឋបាលព្រៃឈើកំពត ក៏បានរាយការណ៍សុំយោបល់ដល់ខណ្ឌរដ្ឋបាលព្រៃឈើដើម្បីបង្ក្រាប ។
ក្រោយពេលបានដីកាពីព្រះរាជអាជ្ញាសាលាដំបូងហើយ ក៏សហការជាមួយកម្លាំងសមត្ថកិច្ចចុះឆែកឆេរដោយមានមន្ត្រីជំនាញរដ្ឋបាលព្រៃឈើ៤រូប និងកម្លាំងនគរបាលប្រឆាំងបទល្មើសសេដ្ឋកិច្ច១០រូប ចុះដល់ទីតាំងសង្ស័យហើយចូលឆែកឆេរនៅផ្ទះលក់គ្រឿងទេសនោះរកឃើញឈើប្រណីតប្រភេទគ្រញូងជាច្រើនកំណាត់ដែលជនល្មើសស្តុកទុកក្នុងផ្ទះបម្រុងដឹកឆ្លងដែនទៅលក់នៅប្រទេសវៀតណាម ។ លោកជួន សារ៉ា បានឱ្យដឹងកាលពីរសៀលថ្ងៃទី២៩ មីនា ថា ក្រោយពីកម្លាំងសមត្ថកិច្ចសហការជាមួយកម្លាំងរដ្ឋបាលព្រៃឈើចុះពិនិត្យផ្ទះដែលមានម្ចាស់ឈ្មោះកាំង ឡេង ភេទប្រុស អាយុ៦៥ឆ្នាំ ជាផ្ទះលក់គ្រឿងទេស និងទិញឈើខុសច្បាប់ស្តុកទុកដើម្បីនាំចេញទៅលក់នៅប្រទេសវៀតណាមនោះ ម្ចាស់ផ្ទះទាំងពីរនាក់ប្តីប្រពន្ធ បានរត់គេចខ្លួនបាត់ ទុកតែនារីដែលជាអ្នកបម្រើម្នាក់នៅចាំផ្ទះ។
លោកជួន សារ៉ា បន្តថា ឈើដែលសមត្ថកិច្ចរកឃើញនេះមាន៨៤២ដុំ ស្មើនឹង១.៦៦៥គីឡូក្រាម ហើយវត្ថុតាងត្រូវបានរឹបអូសនិងនាំខ្លួននារីម្នាក់មកខណ្ឌរដ្ឋបាលពព្រៃឈើកំពតដើម្បីសួរនាំ ។ នារីដែលសមត្ថកិច្ចនាំមកសួរនាំនោះឈ្មោះអួង សុធា អាយុ៣៩ឆ្នាំ ជាអ្នកស៊ីឈ្នួលជួយលក់ដូរក្នុងផ្ទះនេះ ។ ការសួរនាំអស់រយៈពេលប្រមាណពីរម៉ោងឃើញថា នារីរូបនេះជាអ្នកបម្រើគេគ្មានដឹងអ្វីទាំងអស់ ហើយមានជំងឺប្រចាំកាយទៀត សមត្ថកិច្ចក៏អនុញ្ញាតឱ្យទៅផ្ទះវិញ ។
លោកជួន សារ៉ា បន្តទៀតថា ម្ចាស់ឈើត្រូវតែចូលខ្លួនមកដោះស្រាយដើម្បីធ្វើការផាកពិន័យតាមច្បាប់ ។ ផ្ទុយទៅវិញបើពុំចូលខ្លួនដោះស្រាយទេ ម្ចាស់ឈើអាចប្រឈមមុខចំពោះផ្លួវច្បាប់ ហើយត្រូវបញ្ជូនសំណុំរឿងទៅព្រះរាជអាជ្ញាចោទប្រកាន់តាមនីតិវិធីច្បាប់៕
ចែករំលែកព័តមាននេះ