ខេត្តពោធិ៍សាត់ ៖ ស្ត្រីមេម៉ាយកូន៣ម្នាក់ ដោយសាររវល់ទៅធ្វើកម្មករសំណង់ដើម្បីរកប្រាក់ចិញ្ចឹមកូន ស្រាប់តែកូននៅផ្ទះនាំគ្នាលេងដែកកេះឆេះផ្ទះអស់គ្មានសេសសល់អ្វីឡើយ ។ ហេតុការណ៍គ្រោះអគ្គិភ័យនេះបានកើតឡើងកាលពីថ្ងៃទី២៣ មិថុនា ២០១២ វេលាម៉ោង១និង៣០នាទីរសៀល នៅភូមិទួលក្រួស សង្កាត់ចំរើនផល ក្រុងពោធិ៍សាត់ ។
មន្ត្រីប៉ូលិសមូលដ្ឋានឱ្យដឹងថា ផ្ទះដែលក្លាយជាចំណីព្រះអគ្គីនេះ មានទំហំ៣ម៉ែត្រគុណ៤ម៉ែត្រ ធ្វើអំពីឈើប្រក់ស្លឹក ជញ្ជាំងក្តារ ក្រាលក្តារ ។ ម្ចាស់ផ្ទះឈ្មោះហៃ មុំ ភេទស្រី អាយុ៣១ឆ្នាំ មានកូនប្រុសស្រី៣នាក់ ជាកម្មការិនីសំណង់ ។ អគ្គិភ័យនេះបានបំផ្លាញសម្ភារដែលមាននៅក្នុងផ្ទះទាំងស្រុងដូចជាអង្ករ ខោអាវ ចាន ឆ្នាំងជាដើម ។
ស្ត្រីម្ចាស់ផ្ទះបានរៀបរាប់ថា នៅថ្ងៃកើតហេតុនោះគាត់ទៅធ្វើកម្មករសំណង់នៅវត្តគិរីបរវង្សមានជ័យ ក្នុងសង្កាត់ចំរើនផល ដែលមានចម្ងាយពីផ្ទះប្រហែល៤.០០០ម៉ែត្រ ដោយទុកកូនទាំង៣នាក់ឱ្យនៅចាំផ្ទះដែលស្ថិតនៅក្បែរផ្ទះម្តាយដែរ ។ លុះនៅវេលាម៉ោង១និង៣០នាទីរសៀល ស្រាប់តែមានគេរត់ទៅប្រាប់ថា ផ្ទះរបស់នាងត្រូវភ្លើងឆេះ ។ ខណៈឮដូច្នេះគាត់ទន់ដៃជើងស្ទើរសន្លប់ ហើយបានទាញកង់ជិះទៅ ប៉ុន្តែពេលទៅដល់ភ្លើងឆេះខ្ទេចអស់បាត់ទៅហើយ ឯម្តាយរបស់គាត់ដែលនៅផ្ទះក្បែរនោះក៏មិនដឹងពីមូលហេតុច្បាស់ដែរ ព្រោះគាត់កំពុងតែដេកទុកឱ្យចៅៗរត់លេងទៅមកៗផ្ទះទាំងពីរនោះ។ ចំណែកកូនរបស់គាត់នៅតូចៗសួរមិនដឹងអ្វីទាំងអស់ ប៉ុន្តែគាត់សង្ស័យកូនលេងដែកកេះ ព្រោះនៅនឹងដៃឃើញមានកាន់ដែកកេះ ។
ស្ត្រីម្ចាស់ផ្ទះរូបនេះនិយាយថា សព្វថ្ងៃគាត់ជាស្ត្រីមេម៉ាយ ដើរធ្វើកម្មករសំណង់រកប្រាក់មកចិញ្ចឹមកូន៣នាក់ទាំងត្រដាបត្រដួស ឥឡូវនេះស្រាប់តែភ្លើងឆេះផ្ទះអស់ទៀត សល់តែខោអាវដែលស្លៀកជាប់នឹងខ្លួនប៉ុណ្ណោះ ។ ស្ត្រីមេម៉ាយរូបនេះរួមជាមួយកូន និងម្តាយ បានឈរពីមុខផ្ទះដែលឆេះលើកដៃសំពះរកសប្បុរសជនឱ្យជួយ ទោះជាខោអាវ សំពត់ចាស់ៗ អង្ករ ចានឆ្នាំង ឬអ្វីក៏ដោយ ព្រោះទម្រាំតែរកប្រាក់ទិញបានវិញត្រូវចំណាយពេលយូរណាស់ ។ ពាក្យចាស់ពោលថា សូវលិចទូកកណ្តាលទន្លេ កុំឱ្យតែភ្លើងឆេះផ្ទះ ។ ផ្ទះតូចក្រីក្រ ហើយឆេះទៀត សូម្បីកណ្តុរ កន្លាតក៏អត់សល់ដែរ ៕
ចែករំលែកព័តមាននេះ