ខេត្តបាត់ដំបង ៖ សម្តេចតេជោនាយករដ្ឋមន្ត្រីហ៊ុន សែន បានអំពាវនាវឱ្យប្រជាពលរដ្ឋ ក៏ដូចជាពលករខ្មែរដែលទៅធ្វើជាកម្មករនៅក្រៅប្រទេសដូចជាប្រទេសថៃជាដើម ប្រសិនបើមានការលំបាកពេក គួរបញ្ឈប់ទៅ ពីព្រោះទីផ្សារក្នុងប្រទេសកម្ពុជាកំពុងតែខ្វះខាត និងត្រូវការ ។ សម្តេចបានសង្កត់ធ្ងន់ថា មានកម្មករខ្មែរមួយចំនួនជួបនូវការលំបាក ការប្រមាថមើលងាយជិះជាន់ធ្វើបាបពីសំណាក់ថៅកែរបស់ខ្លួន ហើយក៏មានពលករខ្លះប្រថុយជីវិតថែមទៀត ។ ដូច្នេះគួរពិចារណា និងរកការងារក្នុងប្រទេសវិញ ។
ប្រសាសន៍ថ្លែងរបស់សម្តេចអគ្គមហាសេនាបតីតេជោហ៊ុន សែន យ៉ាងដូច្នេះគឺបានធ្វើឡើងក្នុងពិធីបើកការដ្ឋានស្ថាបនាកំណាត់ផ្លូវលេខ៥៧B ប្រវែងជាង១៧៦គីឡូម៉ែត្រ ក្នុងស្រុកបវេល សំពៅលូន ថ្មគោល ភូមិ៣០ និងស្រុកកំរៀង ស្ថិតក្នុងខេត្តបាត់ដំបង ដែលពិធីបើកការដ្ឋានស្ថាបនាផ្លូវលេខ៥៧Bនេះ ប្រារព្ធធ្វើក្នុងបរិវេណសាលាបឋមសិក្សាភូមិថ្មី ស្ថិតក្នុងឃុំបន្សាយត្រែង ស្រុកបវេល ខេត្តបាត់ដំបង នាព្រឹកថ្ងៃច័ន្ទ ទី២១ មីនា ២០១១ នេះ ។ ការស្ថាបនាផ្លូវនេះបានមកពីប្រាក់កម្ចីប្រទេសចិន បូកនឹងប្រាក់បដិភាគរបស់រាជរដ្ឋាភិបាលកម្ពុជាសរុបជាង៨៩លានដុល្លារអាមេរិក ហើយប្រើប្រាស់ពេលវេលាស្ថាបនាចំនួន៤៨ខែ ៕
ចែករំលែកព័តមាននេះ