ខេត្តកណ្តាល ៖ បុរសជាជាងថតរូបក្នុងមង្គលការ និងពិធីផ្សេងៗត្រូវសមត្ថកិច្ចប៉ូលិសស្រុកកណ្តាលស្ទឹងឃាត់ខ្លួនពីបទរាយខ្សែភ្លើងតដាក់ហ្វាដើម្បីថតរូបក្នុងពិធីកាត់សក់នៃមង្គលការមួយបណ្តាលឱ្យចរន្តអគ្គិសនីឆក់ក្មេងប្រុសអាយុ៤ឆ្នាំម្នាក់សន្លប់ស្តូកស្តឹង។ ហេតុការណ៍នេះកើតឡើងកាលពីវេលាម៉ោង១០ និង៣០នាទីព្រឹក ថ្ងៃទី២០ មីនា នៅមុខផ្ទះការស្ថិតក្នុងភូមិអំពៅ ព្រៃទី២ ឃុំអំពៅព្រៃ ស្រុកកណ្តាលស្ទឹង។
បុរសនោះឈ្មោះវង្ស រិន អាយុ៤៨ឆ្នាំ មានទីលំនៅក្នុងភូមិអំពៅព្រៃទី២ ចំណែកក្មេងប្រុសរងគ្រោះឈ្មោះឃី ចាន់រាម មានទីលំនៅក្នុងភូមិអំពៅព្រៃទី២ដែរ។
តាមសាក្សីឱ្យដឹងថា ឈ្មោះវង្ស រិន បានទៅថតរូបក្នុងពិធីមង្គលការរបស់កូនអ្នកស្រីគង់ មឿន ។ នៅវេលាម៉ោង១០ និង៣០នាទីព្រឹកពេលរៀបចំកាត់សក់កូនកំលោះ កូនក្រមុំ ឈ្មោះវង្ស រិន បានរាយខ្សែភ្លើងចេញពីក្នុងផ្ទះការទៅរោងកាត់សក់ដើម្បីបើកភ្លើងហ្វាថតរូបភាព។ នៅពេលនោះកុមារឈ្មោះឃី ចាន់រាម ដែលមានផ្ទះនៅចំងាយប្រមាណជិត១០០ម៉ែត្របានទៅឈរនៅ មុខទ្វារចូលរោងការ ហើយប៉ះខ្សែភ្លើងបណ្តាលឱ្យឆក់រងរបួសដួលសន្លប់នៅនឹងកន្លែង។ ភ្លាមនោះគេនាំគ្នាស្រែកឆោឡោឡើង ឈ្មោះវង្ស រិន ស្ទុះរត់ទៅបិទបារ៉ែតភ្លើងក្នុងផ្ទះ រួចហើយជួយធ្វើចលនាឱ្យក្មេងប្រុសរងគ្រោះ។
ឪពុកម្តាយកុមារារងគ្រោះបានយកកូនទៅមណ្ឌលសុខភាពឃុំអំពៅព្រៃ តែដោយឃើញសភាពធ្ងន់ពេកគ្រូពេទ្យមិនហ៊ានពិនិត្យក៏បញ្ជូនទៅមន្ទីរពេទ្យគន្ធបុប្ផានៅឯរាជធានីភ្នំពេញ។ ឪពុក ម្តាយក្មេងប្រុសរងគ្រោះបានដាក់ពាក្យបណ្តឹង ហើយសមត្ថកិច្ចប៉ូលិសស្រុកកណ្តាលស្ទឹងបានឃាត់ខ្លួនបុរសឈ្មោះវង្ស រិន កសាងសំណុំរឿងបញ្ជូនទៅសាលាដំបូងខេត្តកណ្តាលដើម្បីចាត់ការតាមច្បាប់ ៕
ចែករំលែកព័តមាននេះ