ខេត្តបន្ទាយមានជ័យ ៖ ស្ត្រីម្នាក់បង្ហូរទឹកភ្នែករៀបរាប់ប្រាប់គេឯងថា គាត់ពិតជារងកម្មណាស់ ខំស្កាត់ពីស្រុកមកជួបប្តី ដឹងអីគ្រាន់តែជួបគ្នា៨ថ្ងៃ ប្តីវាយធ្វើបាប២ដង ព្រោះមានស្រីចុង (ប្រពន្ធក្រោយ) ។…
ខេត្តបន្ទាយមានជ័យ ៖ ស្ត្រីម្នាក់បង្ហូរទឹកភ្នែករៀបរាប់ប្រាប់គេឯងថា គាត់ពិតជារងកម្មណាស់ ខំស្កាត់ពីស្រុកមកជួបប្តី ដឹងអីគ្រាន់តែជួបគ្នា៨ថ្ងៃ ប្តីវាយធ្វើបាប២ដង ព្រោះមានស្រីចុង (ប្រពន្ធក្រោយ) ។ ស្ត្រីរូបនេះឈ្មោះ ម ព អាយុ៣៦ឆ្នាំ ដើររើសអេតចាយ ស្នាក់នៅសង្កាត់ប៉ោយប៉ែត ក្រុងប៉ោយប៉ែត ។
ស្ត្រីរូបនេះបានសម្រក់ទឹកភ្នែករៀបរាប់ថា ៖ គាត់មានប្តីឈ្មោះ ស សុផាត អាយុ៣៩ឆ្នាំ បច្ចុប្បន្នបើករថយន្តដឹកសំរាមឲ្យក្រុមហ៊ុនកាស៊ីណូមួយនៅក្រុងប៉ោយប៉ែត និងមានកូន៥នាក់ ប្រុស១ស្រី៤នាក់ ។
ស្ត្រីដដែលបន្តថា ៖ គាត់មកពីស្រុកស្មាច់មានជ័យ ខេត្តកោះកុង ហើយថា កូនគាត់ទាំង៥នាក់ រស់ដូចរងកម្ម២នាក់ ទៅនៅជាមួយគេម្នាក់ នៅខេត្តកោះកុង ម្នាក់នៅភ្នំពេញ នាងជាកូនច្បងមានគ្រួសារ ឯកូនស្រី២នាក់ទៀត ម្នាក់អាយុ១១ឆ្នាំ និងម្នាក់អាយុ៨ឆ្នាំ រស់នៅជាមួយគាត់ មិនបានរៀនសូត្រ ព្រោះតែភាពក្រីក្រ ។ អ្វីដែលស្តាប់ទៅគួរឲ្យសង្វេគ និងអាណិតពន់ពេកនោះ គាត់រៀបរាប់ថា គាត់មានប្តីដូចអត់ប្តី ពោលគឺប្តីគាត់ខូចខិលលួចមានប្រពន្ធចុងជាបន្តបន្ទាប់ ។ គាត់បន្តថា កាលពីមុន ប្តីគាត់ធ្លាប់លួចមានប្រពន្ធចុងម្នាក់ នៅឯក្រុងភ្នំពេញបាន២ឆ្នាំ លុះនាងចុងនោះដឹងរឿង ម្យ៉ាងគាត់ទៅអង្វរសុំប្តីវិញ នាងនោះក៏លែងទាក់ទងប្តីរបស់គាត់ ។ ដោយមិនកែចរិត គាត់ថាកាលពីប៉ុន្មានខែមុននេះ ប្តីគាត់លួចមានស្រីចុងម្នាក់ទៀត ជាកម្មកររោងចក្រ ខណៈធ្វើជាសន្តិសុខក្លឹបនៅខេត្តកោះកុងនោះ ។
គាត់បន្តថា ៖ គាត់តាមទាន់ឃើញនឹងភ្នែក ហើយកើតជាជម្លោះហិង្សាទាំងយប់ នៅផ្ទះស្រីចុងនោះ គឺប្តីវាយធ្វើបាបគាត់ ពេលចូលដល់បន្ទប់ ដែលគេកំពុងឡើងឋានសួគ៌ ។ គាត់បន្តថា ដោយសាគាត់តាមរករឿងជាបន្តបន្ទាប់ បុរសជាប្តីក៏នាំនាងចុងមករស់នៅក្រុងប៉ោយប៉ែតជិត៣ខែហើយ ។
ទឹកភ្នែកបណ្តើររៀបរាប់បណ្តើរទាំងអួលដើមក ស្ត្រីរូបនេះនិយាយថា មុនឈានជើងមកតាមប្តី គាត់ហៅតាមទូរស័ព្ទឲ្យមករស់នៅប៉ោយប៉ែត គេសុខចិត្តយកទាំង២ ។ គាត់ថា ថ្ងៃដំបូងពេលមកដល់ក្រុងប៉ោយប៉ែត បុរសជាប្តីឲ្យគាត់ទៅដេកផ្ទះសំណាក់ ពេលគាត់ប្រកែកមិនព្រម ព្រោះខ្លាចម្យ៉ាងមិនដែលដេកផ្ទះសំណាក់ម្នាក់ឯង ស្រាប់តែបុរសជាប្តីវាយធ្វើបាបភ្លាមៗ ។
ក្រោយមកពេលគាត់ទៅតាមដល់បន្ទប់ស្នាក់នៅ ស្រាប់តែបុរសជាប្តីវាយធ្វើបាបគាត់ទាំងយប់ មុខប្រពន្ធចុងម្តងទៀត នៅក្រុងប៉ោយប៉ែតនេះ ។ គាត់ថា ចាប់ពីថ្ងៃនេះទៅឈប់ទទួលយកប្តីរងកម្មនេះទៀតហើយ គឺសុខចិត្តរស់នៅតាមវាសនាកម្មទៅចុះ ។ គាត់ប្រាថ្នា ចង់ឲ្យកូនចូលរៀននឹងគេ ប៉ុន្តែខ្វះលទ្ធភាពគ្រប់បែបយ៉ាង ព្រោះទើបមករស់នៅក្រុងប៉ោយប៉ែតបាន៨ថ្ងៃ សូម្បីតែអូសរទេះដើររើសអេតចាយ ក៏វង្វេងផ្លូវម្តងៗដែរ ពោលគឺរកមួយថ្ងៃបានត្រឹមតែហូប១ថ្ងៃ៣នាក់ម្តាយកូន ស្ទើរមិនគ្រប់ផង ខណៈបុរសជាប្តីនោះ មិនដែលគិតដល់គាត់ និងកូនៗឡើយ ។
ករណីខាងលើ គេពុំដឹងថា ជាការពិត ឬយ៉ាងណានោះទេ ខណៈបុរសជាប្តីឈ្មោះ ស សុផាត មិនអាចទាក់ទងសុំការបំភ្លឺបាន ព្រោះមិនស្គាល់លេខទូរស័ព្ទ ៕
ចែករំលែកព័តមាននេះ