រាជធានីភ្នំពេញ ៖ នៅព្រឹកថ្ងៃទី២១ មិថុនា លោកសុខ សម្បត្តិ ជំនួយការសម្តេចអគ្គមហាសេនាបតីតេជោហ៊ុន សែន និងជាអភិបាលខណ្ឌដូនពេញ ដឹកនាំចៅសង្កាត់ទាំង១១ និងមន្ត្រីសាលាខណ្ឌប្រមាណជា១រយនាក់ប្រដាប់ដោយកាំបិតបានចុះកាប់ឆ្ការព្រៃត្រែងនៅតាមច្រាំងទន្លេមុខផ្សាររាត្រី ស្ថិតក្នុងសង្កាត់វត្តភ្នំ ខណ្ឌដូនពេញ ព្រមទាំងបាញ់ទឹកលាងសំអាតច្រាំងទន្លេដែលជនអគតិបន្ទោបង់អនាធិបតេយ្យ ។
លោកអភិបាលខណ្ឌដូនពេញបានមានប្រសាសន៍ថា បើទោះបីជាសាលាខណ្ឌដូនពេញបានដាក់កម្លាំងឃ្លាំមើលជនអគតិដែលបន្ទោបង់អនាធិបតេយ្យដាក់ព្រៃត្រែង និងច្រាំងទន្លេមុខផ្សាររាត្រីជាប្រចាំក៏ដោយ នៅតែមានជនមួយចំនួនតូចលួចបន្ទោបង់ដដែលធ្វើឱ្យជះក្លិនឆ្អេះឆ្អាប ប៉ះពាល់ដល់ភ្ញៀវជាតិ និងអន្តរជាតិដែលមកកម្សាន្តតាមមាត់ទន្លេ ។
មើលឃើញបែបនេះហើយទើបលោកដឹកនាំកម្លាំងចៅសង្កាត់ទាំង១១ និងមន្ត្រីសាលាខណ្ឌទាំងអស់ឱ្យមកកាប់ឆ្ការព្រៃត្រែងដុតកម្ទេចចោល និងបាញ់ទឹកលាងសំអាតច្រាំងទន្លេរហូតដល់មុខព្រះបរមរាជវាំង ហើយកន្លងមកយើងតែងតែចុះធ្វើអនាម័យតាមសួនច្បារ រមណីយដ្ឋានជាប្រចាំ មិនតែប៉ុណ្ណោះក៏បានផ្សព្វផ្សាយដល់ប្រជាពលរដ្ឋឱ្យយល់ដឹងក្នុងការទុកដាក់សំរាមឱ្យបានត្រឹមត្រូវ ។ ជាមួយនេះដែរ តាមបណ្តាសង្កាត់ក៏មានវិធានការចំពោះប្រជាពលរដ្ឋណាដែលបោះចោលសំរាមលើផ្លូវសាធារណៈ និងធ្វើការផាកពិន័យ ។
លោកសុខ សម្បត្តិ ជំនួយការសម្តេចអគ្គមហាសេនាបតីតេជោហ៊ុន សែន និងជាអភិបាលខណ្ឌដូនពេញ បានបញ្ជាក់ថា បន្ទាប់ពីកាប់ឆ្ការព្រៃត្រែង នៅចំណុចខាងលើ និងបាញ់ទឹកលាងសំអាតច្រាំងទន្លេហើយនោះ លោកនឹងដាក់កម្លាំងឃ្លាំមើលចំពោះជនណាដែលបន្ទោបង់តាមច្រាំងទន្លេ បើឃើញរត្រូវឃាត់ខ្លួនបញ្ជូនទៅសាលាខណ្ឌដើម្បីផាកពិន័យ និងផ្សព្វផ្សាយតាមទូរទស្សន៍ ព្រមទាំងសារព័ត៌មានជាការព្រមាន ។
ជាមួយគ្នានេះដែរ លោកបានសំណូមពរដល់ប្រជាពលរដ្ឋដែលមកកម្សាន្តតាមមាត់ទន្លេ និងរមណីយដ្ឋានមេត្តាចូលរួមថែរក្សាបរិស្ថានឱ្យបានល្អប្រសើរសមនិងពាក្យស្លោក«ទីក្រុងស្អាត រមណីយដ្ឋានស្អាត សេវាល្អ» ៕
ចែករំលែកព័តមាននេះ