ខេត្តព្រះសីហនុ ៖ ព្រះពុទ្ធបដិមាចំនួន១៥អង្គ រួមជាមួយរូបសំណាកលោកយាយម៉ៅចំនួន២ ក្នុងនោះមានមួយព្រះអង្គធំប្រក់នាគ កំពស់១៣,៧ម៉ែត្រ ព្រះភ្នែន៣,៩ម៉ែត្រ កំពស់អង្គុយ៣,៩ម៉ែត្រ កសាងអំពីថ្មភក់នៅស្រុកភ្នំសន្ទុក ខេត្តកំពង់ធំ និងរូបសំណាកព្រះសាវ័កចំនួន១៤អង្គ ក្នុងមួយអង្គកំពស់៣ម៉ែត្រ រួមជាមួយគ្រែថ្ម១ត្រូវបានលោកស្បោង សារ៉ាត អភិបាលខេត្ត លោកជំទាវជាភរិយាចំណាយថវិកាផ្ទាល់ខ្លួនជាវយកមកតំកល់នៅសួនច្បារវិមានឯករាជ្យស្ថិតក្នុងភូមិ៣ សង្កាត់លេខ៣ ក្រុងព្រះសីហនុ ។
ព្រះពុទ្ធបដិមា និងរូបសំណាកលោកយាយម៉ៅបានដឹកមកដល់កាលពីល្ងាចថ្ងៃទី១៩ មករា កន្លងមកនេះ សំរាប់ពុទ្ធសាសនិកក្នុងនិងក្រៅខេត្តគោរពបូជា និងដើម្បីជួយលើកតំកើងវិស័យព្រះពុទ្ធសាសនាឱ្យកាន់តែមានការរីកចំរើន។ អ្នកម៉ៅការកសាងរូបសំណាកបានឱ្យដឹងថា រូបសំណាកទាំងនេះ គឺបានកសាងចាប់តាំងពីខែកុម្ភៈ ឆ្នាំ២០១០ មកម្ល៉េះ និងមានគំរោងធ្វើបុណ្យអភិសេកជាផ្លូវការនៅក្នុងអំឡុងខែផល្គុនត្រូវនឹងខែមីនា ខាងមុខនេះ។
សូមបញ្ជាក់ថា ដោយគោរពទៅតាមបវេណីជាទំនៀមទំលាប់ នៅពេលរថយន្តស្ទូចព្រះពុទ្ធបដិមាចេញពីរថយន្ត គេឃើញមានការប្រគំភ្លេងពិណពាទ្យ៧បទ និងធ្វើពិធីសមាទានសីល និងមានធម្មកថិតសំដែងធម៌ទេសនានៅល្ងាចថ្ងៃទី១៩ មករា ឆ្នាំ២០១១ ដោយមានការចូលរួមពីយាយជី តាជី និងព្រះសង្ឃជាច្រើនអង្គ ព្រមទាំងពុទ្ធបរិស័ទយ៉ាងច្រើនកុះករ។
យោងតាមលោកអ៊ំម្នាក់ដែលបានចូលរួមក្នុងពិធីនេះនិយាយថា នេះជាលើកទីមួយហើយរបស់ខេត្តមាត់សមុទ្រនេះដែលមានព្រះពុទ្ធបដិមាជាច្រើនអង្គរួមជាមួយព្រះអង្គធំប្រក់នាគមួយអង្គមានកំពស់រហូតដល់១៣,៧ម៉ែត្រ ត្រូវបានដាក់តំកល់នៅសួនច្បារដែលជាកន្លែងលំហែកាយហាត់ប្រាណរបស់ប្រជាពលរដ្ឋ និងងាយស្រួលដល់ការគោរពបូជាដែលជាសីលធម៌សំរាប់ពុទ្ធសាសនិក។ គាត់បន្តដោយក្តីរីករាយថា ចាប់ពីពេលនេះតទៅ ប្រជាពលរដ្ឋទាំងអស់ដែលមកទីនេះបានទាំងលំហែកាយ ហាត់ប្រាណ និងគោរពព្រះពុទ្ធជាព្រះបរមគ្រូផងដែរ ៕
ចែករំលែកព័តមាននេះ