រាជធានីភ្នំពេញ ៖ នៅសណ្ឋាគារភ្នំពេញ កាលពីថ្ងៃទី១៨ មីនា ក្រសួងកិច្ចការនារី បានរៀបចំពិធីសម្ពោធបើកយុទ្ធនាការកន្លែងធ្វើការគ្មានអំពើហិង្សា ក្រោមអធិបតីភាពលោកជំទាវ ហោ ម៉ាលីន អនុរដ្ឋលេខាធិការក្រសួង។
នៅក្នុងពិធីនោះ លោកជំទាវ ហោ ម៉ាលីន ថ្លែងថា ក្រោមការឧបត្ថម្ភមូលនិធិពីអង្គការសហប្រជាជាតិ UN Trust Fund អង្គការឃែរនៅកម្ពុជា ក្រសួងកិច្ចការនារី បាននិងកំពុងសហការអនុវត្តគម្រោងលើកកម្ពស់សុវត្ថិភាពនិយោជិតស្ត្រីនៅក្នុងឧស្សាហកម្មស្រាបៀរ។ គម្រោងមានទិសដៅបង្កើតជាបរិយាកាសគាំទ្រមួយដែលស្ត្រីផ្សព្វផ្សាយស្រាបៀរ ប្រកបការងារដោយសេចក្តីថ្លៃថ្នូរ និងសុវត្ថិភាព។ យុទ្ធនាការកន្លែងធ្វើការគ្មានអំពើហិង្សា គឺជាសកម្មភាពចម្បងមួយនៅក្នុងចំណោមសកម្មភាពសំខាន់ៗជាច្រើនដែលស្ថិតនៅក្រោមកិច្ចសហការរវាងអង្គការឃែរកម្ពុជា និងក្រសួងកិច្ចការនារី ដែលក្នុងនោះរួមមានការបញ្ជ្រាបយេនឌ័រ ការកៀងគរធនធាន និងស្វែងរកការគាំទ្រមតិនៅកម្រិតថ្នាក់ជាតិ។
ការបៀតបៀន និងអំពើហិង្សានៅនឹងកន្លែងធ្វើការ (ហាងដែលស្ត្រីកំពុងផ្សព្វផ្សាយស្រាបៀរ) មានកម្រិតខ្ពស់ ដូចជាការបៀតបៀនដោយពាក្យសម្តី និងកាយវិការម៉ាក់ងាយ៨៣%។ ការទទួលរងនូវការលូកលាន់ និងបំពានលើរាងកាយ៨០% និងសម្លុតគម្រាមកំហែងដោយពាក្យសម្តី រាងកាយ និងភ្ជង់កាំភ្លើង៦០% នេះបើតាមការស្រាវជ្រាវរបស់អង្គការឃែរឆ្នាំ២០០៥។ ជាមួយនេះ គឺត្រូវតែទទួលស្គាល់នូវការចូលរួមរបស់ក្រុមប្រជាជនបុរស ជាពិសេសអតិថិជននៅក្នុងការកាត់បន្ថយអំពើហិង្សាលើស្ត្រី និងទទួលស្គាល់នូវការចូលរួមរបស់ម្ចាស់គ្រឹះស្ថានកំសាន្តនៅក្នុងការលុបបំបាត់អំពើហិង្សាលើស្ត្រី។ យុទ្ធនាការបានអនុវត្តសាកល្បងនៅក្នុងហាងចំនួន៦ នៅតំបន់ប្រជុំក្នុងរាជធានីភ្នំពេញ និងតំបន់ព្រែកលាបនៅចន្លោះឆ្នាំ២០០៨ និង២០០៩ ហើយយុទ្ធនាការនេះនឹងពង្រីកដល់៤០ហាងថ្មីនៅក្នុងឆ្នាំ២០១១។
លោកជំទាវបញ្ជាក់ថា យុទ្ធនាការកន្លែងធ្វើការគ្មានអំពើហិង្សា ត្រូវបានរៀបចំឡើងភ្ជាប់ជាមួយនឹងមេរៀន និងបទពិសោធន៍ដែលទទួលបានពីការអនុវត្តរបស់គម្រោងកន្លង និងលទ្ធផលការស្រាវជ្រាវរបស់អង្គការឃែរនៅឆ្នាំ២០០៥ ស្តីពីស្ថានភាពរបស់ស្ត្រីផ្សព្វផ្សាយស្រាបៀរនៅកម្ពុជា។ យុទ្ធនាការនេះមានគោលបំណងធ្វើឱ្យកន្លែងធ្វើការកាន់តែមានសុវត្ថិភាព តាមរយៈការលើកកម្ពស់ការយល់ដឹង និងផ្លាស់ប្តូរឥរិយាបថអតិថិជនទាំងបុរស និងស្ត្រី ចំពោះមុខរបរផ្សព្វផ្សាយស្រាបៀរ ដែលស្វែងរកការកំសាន្តនៅតាមគ្រឹះស្ថានកំសាន្តទាំងឡាយ និងភ្ជាប់ក្រុមអតិថិជនបុរសនៅក្នុងការកាត់បន្ថយរាល់ទម្រង់នៃការបៀតបៀនផ្លូវភេទ និងអំពើហិង្សា៕
ចែករំលែកព័តមាននេះ