រាជធានីភ្នំពេញ ៖ វិទ្យាស្ថានមនុស្សសាស្រ្ត និងវិទ្យាសាស្ត្រសង្គមនៃរាជបណ្ឌិត្យសភាកម្ពុជា បានរៀបចំបើកសន្និសីទជាតិលើកទី៤ ស្តីពីកម្ពុជាឆ្ពោះទៅកាន់ទសវត្សនៃការអប់រំ ដើម្បីការអភិវឌ្ឍប្រកបដោយនិរន្តរភាព២០០៥-២០១៤ ការសិក្សាពេញមួយជីវិត។ សន្និសីទនេះប្រារព្ធធ្វើឡើងរយៈពេលពីរថ្ងៃនៅរាជបណ្ឌិត្យសភាកម្ពុជា គឺនៅថ្ងៃទី២៧-២៨ តុលា និងបានបើកក្រោមអធិបតីភាពលោកស្ត្រី ខ្លួត ធីតា ប្រធានរាជបណ្ឌិត្យសភាកម្ពុជា។
ថ្លែងសុន្ទរកថានៅក្នុងឱកាសបើកសន្និសីទ លោកស្រី ខ្លូត ធីតា បានថ្លែងថា ការអប់រំប្រកបដោយនិរន្តរភាព គឺផ្តើមចេញពីប្រទេសជប៉ុននៅឆ្នាំ១៩៩០ ហើយផ្តើមចេញពីការអប់រំផ្សេងៗគ្នានេះហើយទើបនាំឱ្យកើតចេញនូវការអប់រំដើម្បីការអភិវឌ្ឍប្រកបដោយនិរន្តរភាព។ ដូច្នេះហើយទើបការអប់រំប្រកបដោយនិរន្តរភាព គឺបង្កើតឡើងសំរាប់មនុស្សគ្រប់រូប។
លោកសោម សុមុនី ប្រធានវិទ្យាស្ថានមនុស្សសាស្ត្រ និងវិទ្យាសាស្ត្រសង្គមនៃរាជបណ្ឌិត្យសភាកម្ពុជា បានថ្លែងថា សន្និសីទជាតិរយៈពេល២ថ្ងៃនេះរៀបចំឡើងដើម្បីសំរេចនូវវត្ថុបំណងចំនួនដប់សំខាន់ៗគឺ ១-ការសិក្សាពេញមួយជីវិត តាមរយៈមន្ទីរកិច្ចការនារី ២-ការសិក្សាពេញមួយជីវិត តាមរយៈមន្ទីរកសិកម្ម ៣-ការសិក្សាពេញមួយជីវិត តាមរយៈមន្ទីរសង្គមកិច្ច ៤-ការសិក្សាពេញមួយជីវិត តាមរយៈមន្ទីរបរិស្ថាន ៥-ការសិក្សាពេញមួយជីវិត តាមរយៈមន្ទីរអភិវឌ្ឍន៍ជនបទ ៦-ការសិក្សាពេញមួយជីវិត តាមរយៈមន្ទីរអប់រំ យុវជន និងកីឡា ៧-ការសិក្សាពេញមួយជីវិត តាមរយៈមន្ទីរសុខាភិបាល ៨-ការសិក្សាពេញមួយជីវិត តាមរយៈសង្គមស៊ីវិល ៩-ការសិក្សាពេញមួយជីវិត តាមរយៈមន្ទីរវប្បធម៌ និងវិចិត្រសិល្បៈ និង១០-ការសិក្សាពេញមួយជីវិត ចំពោះជនជាតិដើមភាគតិច។
វត្ថុបំណងខាងលើនេះ នឹងត្រូវបង្ហាញដោយវាគ្មិនចំនួន២០រូប ដែលជាប្រធាន និងអនុប្រធានមន្ទីរនៅទូទាំងព្រះរាជាណាចក្រកម្ពុជា អ្នកស្រាវជ្រាវនៅរាជបណ្ឌិត្យសភាកម្ពុជា ថ្នាក់ដឹកនាំ និងមន្ត្រីក្រសួងអប់រំ យុវជន និងកីឡា ក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន ក្រសួងវប្បធម៌ និងវិចិត្រសិល្បៈ សង្គមស៊ីវិល និងស្ថាប័នពាក់ព័ន្ធដទៃទៀត៕
ចែករំលែកព័តមាននេះ