ខេត្តកំពង់ស្ពឺ ៖ ឈើអុសរស់ត្រូវបានគេនាំគ្នាកាប់ធ្វើអាជីវកម្មយ៉ាងអនាធិបតេយ្យ និងដឹកជញ្ជូនតាមរថយន្តយ៉ាងគគ្រឹងគគ្រេងជារៀងរាល់ថ្ងៃដូចរដូវហែបុណ្យកឋិន ចេញពីស្រុកឱរ៉ាល់ តាមផ្លូវលេខ៤២ និងលេខ៥២។
ប្រភពពីស្ត្រីម្នាក់បាននិយាយថា រថយន្តកូរ៉េរបស់គាត់ចំណុះ១តោនកន្លះ ផ្ទុកបានឈើអុសពី៦ទៅ៧ម៉ែត្រគូប ហើយក្នុងអុសមួយម៉ែត្រគូប ទិញគេជាង២ម៉ឺនរៀល លក់ចេញបាន៧ម៉ឺនរៀលទៅ៨ម៉ឺនរៀល ។ ការដឹកជញ្ជូនអុសនេះចំណាយទៅលើការបង់តាមដងផ្លូវមួយកន្លែងៗមានពី១ម៉ឺនរៀលទៅ២ម៉ឺនរៀល ជាហូរហែតាំងពីលើកអុសនៅឯឃុំត្រពាំងជោរ ស្រុកឱរ៉ាល់ ទម្រាំដល់គោលដៅគឺស្ទើរអស់ចំណេញទៅហើយ គឺកាប់ឈើមែន តែដូចរកស៊ីចិញ្ចឹមតែមេព្រៃ ។ ចំណែកបុរសម្ចាស់រថយន្តទួរីសម្នាក់ដែលរកស៊ីដឹកជញ្ជួនឈើអុសរស់ តាមផ្លូវលេខ៤២ ចេញពីស្រុកឱរ៉ាល់ យកមកលក់នៅទីរួមខេត្តកំពង់ស្ពឺ ក៏បាននិយាយដូចគ្នានេះដែរ ។ គាត់និយាយថា កាលពី៣ទៅ៤ឆ្នាំមុន កាប់តែឈើអុសងាប់ហៅអុសក្រាក់ទេ តែបច្ចុប្បន្នគឺដឹកតែឈើអុសរស់ប៉ុណ្ណោះ ព្រោះអស់ឈើគ្រាក់ងាប់ហើយ ។
ប្រជាពលរដ្ឋនៅភូមិអូរផ្តៅ ឃុំរស្មីសាមគ្គី ស្រុកឱរ៉ាល់ បានឱ្យដឹងថា ពួកគាត់នាំគ្នាកាប់ឈើរស់ដឹកជញ្ជូនពីព្រៃជិតៗភូមិតាមគោយន្ត ឬរទេះគោ មកកាត់តំរៀបដាក់តាមផ្លូវថ្នល់មុខផ្ទះសម្រាប់លក់យកប្រាក់ដោះស្រាយជីវភាពគ្រួសារ ។ ក្នុងមួយថ្ងៃបើមានគ្នាពី២ទៅ៣នាក់ អាចកាប់ និងដឹកបានប្រហែល៣ម៉ែត្រគូប។ បើគិតទៅអាចបានប្រាក់ប្រហែល៦ម៉ឺនរៀលដែរ តែក៏មានអ្នកខ្លះដែលយកប្រាក់គេមុន គឺបានតែត្រឹម១ម៉ែត្រគូប ១៥.០០០រៀលទៅ១៧.០០០រៀលប៉ុណ្ណោះ ។
លោកវ៉ែន លី មេភូមិអូរផ្តៅ និយាយថា ពលរដ្ឋក្នុងភូមិប្រហែលជាង១០០គ្រួសារ បានចាប់យករបរកាប់អុសស្ទើរតែទាំងអស់ ដោយសារឃើញគេរកបានក៏ចេះតែនាំគ្នាទៅរកតាមដែរទៅ។ កាលពីកន្លងទៅថ្មីៗនេះ មន្ត្រីសាលាខេត្ត បានចុះមកប្រកាសជាសាធារណៈជូនដល់ប្រជាពលរដ្ឋឱ្យបានដឹងថា គោលការណ៍ជាយុទ្ធសាស្ត្ររបស់សាលាខេត្តនាពេលខាងមុខនេះ នឹងបង្កើតដីតំបន់សម្រាប់រស់នៅ ដីតំបន់សម្រាប់វិនិយោគ ដីតំបន់សម្រាប់ព្រៃឈើសហគមន៍ ។
លោកថោង ភាព មន្ត្រីអង្គការការពារបរិស្ថាននិងធនធានធម្មជាតិ ដែលបំពេញបេសកកម្មក្នុងភូមិសាស្ត្រស្រុកឱរ៉ាល់ឱ្យដឹងថា ខាងអង្គ ការរបស់លោកក៏ធ្លាប់ចុះណែនាំប្រជាពលរដ្ឋអ្នកប្រកបរបរកាប់អុសនេះឱ្យផ្លាស់ប្តូរទៅរកមុខរបរផ្សេងដែរ ហើយលោកនឹងបន្តប្រឹងប្រែងសហការជាមួយអាជ្ញាធរមូលដ្ឋាន ព្រមទាំងមន្ត្រីជំនាញ ដើម្បីចុះទៅអប់រំដល់ប្រជាពលរដ្ឋឱ្យយល់ច្បាស់ពីផលប្រយោជន៍ព្រៃឈើ កុំឱ្យកាប់បំផ្លាញព្រៃឈើយ៉ាងអនាធិបតេយ្យបន្តទៀត ។ កោះសន្តិភាព មិនអាចសុំការបំភ្លឺពីមន្ត្រីជំនាញសង្កាត់រដ្ឋបាលព្រៃឈើ និងផ្នែករដ្ឋបាលព្រៃឈើប្រចាំស្រុកឱរ៉ាល់បានទេ ជុំវិញការកាប់ព្រៃឈើយ៉ាងអនាធិបតេយ្យនេះ៕
ចែករំលែកព័តមាននេះ