រាជធានីភ្នំពេញ ៖ ជនជួញដូរគ្រឿងញៀនពីរនាក់មានល្បិចខ្ពស់លាក់គ្រឿងញៀននៅក្នុងនំប៉ាវយកទៅលក់និងចែកចាយឱ្យអ្នកទោសនៅពន្ធនាគារព្រៃស ខណៈពួកគេទៅសួរសុខទុក្ខ ត្រូវបានឆ្មាំគុកសង្ស័យធ្វើការត្រួតពិនិត្យឃើញ ក៏ចាប់ខ្លួនរួមជាមួយរថយន្តម៉ាកឡិចស៊ីស RX300 មួយគ្រឿងប្រគល់ឱ្យប៉ូលិសព្រហ្មទណ្ឌខណ្ឌដង្កោ ដើម្បីចាត់ការតាមច្បាប់តែម្តង ។
ហេតុការណ៍នោះបានកើតឡើងកាលពីវេលាម៉ោង១និង១៥នាទីរសៀលថ្ងៃទី២៨ ខែមីនា ឆ្នាំ២០១១ នៅមណ្ឌលកែប្រែ ម១ ពន្ធនាគារ ព្រៃស ស្ថិតក្នុងភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ ។ ជនសង្ស័យទាំងពីរនាក់នោះម្នាក់ឈ្មោះព្រំ វាសនា ភេទប្រុស អាយុ៣៣ឆ្នាំ ជាគ្រូបង្រៀន មានទីលំនៅផ្ទះលេខ៩៩ ផ្លូវមុនីរ៉េត ភូមិថ្មី សង្កាត់ស្ទឹងមានជ័យ ខណ្ឌមានជ័យ និងម្នាក់ទៀតឈ្មោះហូ ចន្ធី ភេទប្រុស អាយុ២៩ឆ្នាំ ជាអ្នកមើលការខុសត្រូវផ្ទះសំណាក់យីហោ សុខ ហេង ស្នាក់នៅផ្ទះលេខ៤Eo ផ្លូវលេខ១៥៨ ភូមិ១០ សង្កាត់បឹងរាំង ខណ្ឌដូនពេញ រាជធានីភ្នំពេញ ។
ក្រោយពេលចាប់ខ្លួនឆ្មាំគុកដកហូតបានរថយន្តម៉ាកឡិចស៊ីស RX300 ពណ៌ស្ករ១គ្រឿងពាក់ស្លាកលេខភ្នំពេញ 2M-5499 ថ្នាំញៀនប្រភេទតំហ្វេតាមីន ទម្ងន់០,៥៣ក្រាម លុយចំនួន៩៩ម៉ឺនរៀល និង១១៨ដុល្លារ ព្រមទាំងទូរស័ព្ទដៃ៤គ្រឿងផងដែរ ។
តាមប្រភពព័ត៌មានបានឱ្យដឹងថា នៅមុនពេលមានការចាប់ឃាត់់ខ្លួន ជនសង្ស័យទាំងពីរនាក់នោះបានជិះរថយន្តឡិចស៊ីស RX300 មួយគ្រឿងទៅកាន់ពន្ធនាគារព្រៃស ហើយបានសុំអ្នកយាមនៅទីនោះចូលសួរសុខទុក្ខអ្នកទោសដែលស្គាល់គ្នា ដោយមានយកនំប៉ាវច្រកថង់យួរទៅជាមួយផង ។ ប្រភពដដែលបានបន្តទៀតថា ពេលនោះអ្នកយាមមានការសង្ស័យក៏បានធ្វើការត្រួតពិនិត្យដោយចាប់យកនំប៉ាវកាច់ហែកមើលស្រាប់តែប្រទះឃើញកញ្ចប់ថ្នាំញៀននៅក្នុងនោះទើបឃាត់ខ្លួនពួកគេប្រគល់ឱ្យប៉ូលិសព្រហ្មទណ្ឌខណ្ឌដង្កោតែម្តង ។
ក្រោយពេលចាប់ខ្លួនប៉ូលិសបាននាំជនសង្ស័យទាំងពីរនាក់ទៅធ្វើការសាកសួរនិងកសាងសំណុំរឿងដើម្បីបញ្ជូនទៅតុលាការ ។ ជន២នាក់នេះមានល្បិចខ្ពស់ណាស់ បង្កប់ថ្នាំញៀននៅក្នុងនំប៉ាវមានបំណងយកទៅលក់ចែកចាយឱ្យអ្នកទោសនៅក្នុងពន្ធនាគារនោះប្រើប្រាស់ ប៉ុន្តែទោះបីជាបែបណាមិនអាចលាក់បាំងភ្នែកអ្នកយាមបានឡើយ៕
ចែករំលែកព័តមាននេះ