ខេត្តបន្ទាយមានជ័យ ៖ កាលពីវេលាម៉ោង១ និង១០នាទីរសៀលថ្ងៃទី២០ មីនា កន្លងមក មានប្រជាពលរដ្ឋម្នាក់បានទៅមើលកូនភ្ជួរស្រែប្រទះឃើញគ្រាប់បែកចំនួន៣គ្រាប់ដែលជនមិនស្គាល់មុខយកទៅលាក់ទុកនៅគល់ត្នោតចំងាយពីផ្លូវជាតិលេខ៦ប្រហែល១០០០ម៉ែត្រ ស្ថិតក្នុងភូមិសាលាក្រៅសង្កាត់ភ្នៀត ក្រុងសិរីសោភ័ណ រួចហើយបានរាយការណ៍ឱ្យសមត្ថកិច្ចទៅពិនិត្យមើល ។
បើតាមការឱ្យដឹងពីប្រជាពលរដ្ឋឈ្មោះទេះ ជុច ភេទប្រុស អាយុ៤០ឆ្នាំ រស់នៅភូមិ-ឃុំខាងលើ បានប្រាប់សមត្ថកិច្ចថា មុនដំបូងគាត់បានបើកម៉ូតូទៅមើលកូនប្រុសរបស់គាត់ បើកត្រាក់ទ័រភ្ជួរស្រែនៅក្បែរដើមត្នោតនោះ ពេលគាត់ដើរទៅជិតគល់ត្នោត ក៏ប្រទះឃើញកាបូបពណ៌ខ្មៅមានខ្ចប់ថង់ពណ៌ខៀវ គាត់មានការសង្ស័យក៏វែកមើលក្នុងនោះក៏ប្រទះឃើញគ្រាប់បែក៣គ្រាប់ ហើយប្រញាប់ប្រញាល់ទៅរាយការណ៍ប្រាប់សមត្ថកិច្ចនគរបាលប៉ុសិ៍្តរដ្ឋបាលសង្កាត់ភ្នៀតទៅពិនិត្យមើល ។
តាមប្រភពពីលោកមេប៉ុសិ៍្តសង្កាត់បានឱ្យដឹងថា បន្ទាប់ពីទទួលព័ត៌មាន លោកបានរាយការណ៍ទៅលោក អធិការនគរបាលក្រុងរួចចុះទៅពិនិត្យមើលឃើញគ្រាប់បែកនោះមែន ក្នុងនោះ ប្រភេទគ្រាប់បែកម៉ាកមីនីចំនួន២គ្រាប់ ផលិតនៅប្រទេសចិន និង១គ្រាប់ទៀតជាប្រភេទ គ្រាប់បែកដងឈើផលិតនៅប្រទេសចិនដូចគ្នា ហើយគ្រាប់បែកទាំង៣គ្រាប់នោះមានគុណភាព៤០% មានច្រែះ វាងាយនឹងបង្កឱ្យគ្រោះថ្នាក់ណាស់ ។ លោកវរសេនីយ៍ត្រីរ៉ែម វីរៈ អធិការនគរបាលក្រុងសិរីសោភ័ណបានឱ្យដឹងថា តាមការសន្និដ្ឋានគ្រាប់បែកនេះត្រូវជនមិនស្គាល់មុខយកទៅលាក់ទុក ដើម្បីធ្វើសកម្មភាពអ្វីមួយបង្កឱ្យមានអស្ថិរភាពក្នុងសង្គម ។ ចំពោះគ្រាប់ទាំង៣គ្រាប់នេះ លោកបានទំនាក់ទំនងជាមួយមន្ត្រីអង្គភាព CMAC យកទៅរក្សាទុក ៕
ចែករំលែកព័តមាននេះ