ខេត្តក្រចេះ ៖ ក្រុមមន្ត្រីជំនាញរដ្ឋបាលព្រៃឈើក្រចេះបានបន្តសកម្មភាពបង្ក្រាបបទល្មើសឈើអារខុសច្បាប់ និងទីតាំងរោងសិប្បកម្មកែច្នៃនៅក្នុងព្រៃជាច្រើនកន្លែងក្នុងដែនសមត្ថកិច្ចផ្នែករដ្ឋបាលព្រៃឈើ។
មន្ដ្រីផ្នែករដ្ឋបាលព្រៃឈើក្រចេះឱ្យដឹងថា ការរុករកសកម្មភាពអារច្រៀកឈើខុសច្បាប់ ធ្វើឡើងរយៈពេលជាច្រើនថ្ងៃ គឺតាំងពីថ្ងៃទី២៨ កុម្ភៈ រហូតមកដល់ថ្ងៃទី៧ មីនា ។ សកម្មភាព នេះ ដឹកនាំដោយពីមន្ដ្រីតុលាការខេត្ដ កងកំលាំងប្រដាប់អាវុធគ្រប់ប្រភេទ រួមទាំងនាយរងផ្នែករដ្ឋបាលព្រៃឈើក្រចេះ មន្ដ្រីរដ្ឋបាលព្រៃឈើតាមបណ្ដាសង្កាត់មួយចំនួនទៀត ។ សមត្ថកិច្ចបានរុករកតាមព្រៃជ្រៅក្នុងដែនសមត្ថកិច្ចផ្នែករដ្ឋបាលព្រៃឈើក្រចេះ ក្នុងនោះមានស្រុកចំនួនពីរ គឺស្រុកសំបូរ និងស្រុកចិត្របុរី ហើយបានរឹបអូសឈើគ្រប់ប្រភេទ ព្រមទាំងម៉ាស៊ីនអារច្រៀកមួយចំនួនទៀត។
លោកព្រាប សុធារ៉ា នាយផ្នែករដ្ឋបាលព្រៃឈើក្រចេះឱ្យដឹងកាលពីថ្ងៃទី៧ មីនា ថា នៅក្នុងយុទ្ធនាការនេះ សមត្ថកិច្ចបានរឹបអូសឈើអារលេខ១ លេខ២ និងលេខ៣ បានចំនួនជា៥០ម៉ែត្រគូប ក្នុងនោះបានដកហូតសំភារមួយចំនួនធំដូចជាម៉ាស៊ីនត្រង់ស៊ីន័រ៤គ្រឿង ម៉ាស៊ីនគោយន្ដសំរាប់កាត់ អារច្រៀកចំនួន៦គ្រឿង ។ កាលពីថ្ងៃទី១ មីនា បន្ទាប់ពីទទួលបានព័ត៌មានច្បាស់ កំលាំងជំនាញបានរុករកដល់ព្រៃជ្រៅក្នុងភូមិសាស្ដ្រភូមិអូរព្រះ ឃុំអូរគ្រៀង ស្រុកសំបូរបង្ក្រាបរោងសិប្បកម្មខុសច្បាប់ចំនួន៦កន្លែង ។ ទីតាំងសិប្បកម្មនេះត្រូវគេដឹងថា លួចលាក់ធ្វើអាជីវកម្មអារឈើខុសច្បាប់យកមកធ្វើជាអាជីវកម្មទ្វារបង្អួចក្នុងព្រៃជ្រៅ ក្នុងនោះសមត្ថកិច្ចរឹបអូសបានម៉ាស៊ីន និងសំភារ ជាច្រើនគ្រឿង ព្រមទាំងឈើគ្រប់ប្រភេទរាប់សិបម៉ែត្រគូប។
លោកនាយផ្នែករដ្ឋបាលបន្ដថា នៅក្នុងយុទ្ធនាការបង្ក្រាបទីតាំងលួចធ្វើអាជីវកម្មឈើខុសច្បាប់ និងលាក់ឈើក្នុងព្រៃនេះគឺសមត្ថកិច្ចមិនបានឃាត់ខ្លួនជនណាម្នាក់ទេ ដោយត្រូវរត់គេចខ្លួនអស់ តែទោះបីជាយ៉ាងណា ក៏ជំនាញកំពុងកសាងសំណុំរឿងទៅតុលាការ។ មិនទាន់មានតួលេខបញ្ជាក់អំពីចំនួនឈើដែលត្រូវរឹបអូសបានក្នុងរយៈពេល៧ថ្ងៃនេះថាមានចំនួនប៉ុន្មានម៉ែត្រគូបនៅឡើយទេ ដោយឈើ និងសំភារទាំងនេះបានដឹកជញ្ជូនមកកាន់ផ្នែករដ្ឋបាលព្រៃឈើ ក្រចេះ ដើម្បីវាស់វែង និងចាត់វិធានការបន្ដ ៕
ចែករំលែកព័តមាននេះ