រាជធានីភ្នំពេញ ៖ យុវជន៥នាក់បាននាំគ្នា ប្រព្រឹត្ត និងសេពគ្រឿងញៀន កាលពីម៉ោង១១ និង៣០នាទីយប់ថ្ងៃទី៨ មីនា ត្រូវសមត្ថកិច្ចកងរាជអាវុធហត្ថខណ្ឌ៧មករាឃាត់ខ្លួន ខណៈពេលដែលពួកគេកំពុងប្រមូលផ្តុំនៅច្រកឌឿងហែម សំយាបផ្ទះប្រជាពលរដ្ឋផ្លូវលេខ២១៣ ស្ថិតក្នុងសង្កាត់វាលវង់ ។ ជាមួយនឹងការឃាត់ខ្លួនយុវជនទាំង៥នាក់នោះ សមត្ថកិច្ចដកហូតម្សៅថ្នាំញៀន១កញ្ចប់តូច និងឧបករណ៍ប្រើប្រាស់មួយចំនួន ។
យុវជនទាំង៥នាក់១-ឈ្មោះម៉ៅ សុវណ្ណឧត្តម អាយុ២០ឆ្នាំ ជាសិស្ស ស្នាក់នៅផ្ទះលេខ១៩៤E1 ផ្លូវលេខ៩៣ សង្កាត់ផ្សារថ្មី ខណ្ឌដូនពេញ ។ ២-ឈ្មោះឈឹម សុវឌ្ឍនា អាយុ២១ឆ្នាំ ជាសិស្ស ស្នាក់នៅផ្ទះលេខ៩E2Z ផ្លូវលេខ២១៧ សង្កាត់ផ្សារថ្មីទី២ ខណ្ឌដូនពេញ ៣-ឈ្មោះមុត ចាន់ធឿន អាយុ២៤ឆ្នាំ ជាជាងឈើ ស្នាក់នៅផ្ទះលេខ១Eo ផ្លូវលេខ២១៣ សង្កាត់វាលវង់ ខណ្ឌ៧មករា ៤- ឈ្មោះជា បូរិទ្ធ អាយុ២០ឆ្នាំ ជានិស្សិតស្នាក់នៅផ្ទះលេខ៣Eo ផ្លូវលេខ២១៧ សង្កាត់ផ្សារថ្មីទី២ ខណ្ឌដូនពេញ និង៥-ឈ្មោះឆឹង ឃួន ថាវី អាយុ២៤ឆ្នាំ មុខរបរមិនពិតប្រាកដ ស្នាក់នៅផ្ទះលេខ២៨០E4 ផ្លូវលេខ២០០ សង្កាត់បឹងរាំង ខណ្ឌដូនពេញ ។
តាមការអះអាងពីលោកវរសេនីយ៍ត្រីសយ ចាន់ឌី មេបញ្ជាការកងរាជអាវុធហត្ថខណ្ឌ៧មករាឱ្យដឹងថា នៅវេលាម៉ោងខាងលើ កម្លាំងល្បាតដែលជាមន្ត្រីកងរាជអាវុធហត្ថខណ្ឌបានល្បាតជួបប្រទះឃើញក្រុមយុវជនទាំង៥នាក់បានប្រមូលផ្តុំគ្នាទទូរភួយជក់គ្រឿងញៀន នៅតាមសំយាបផ្ទះប្រជាពលរដ្ឋ ។ ដោយឃើញដូច្នេះ មន្ត្រីកងរាជអាវុធហត្ថដែលបានដើរល្បាតក្នុងមូលដ្ឋាននោះក៏បានឃាត់ខ្លួនទាំង៥នាក់នាំទៅកាន់ទីបញ្ជាការ ជាមួយនោះក៏ឆែកឆេរទៅឃើញមានម្សៅគ្រឿងញៀន និងឧបករណ៍ប្រើប្រាស់មួយចំនួនផង ។
លោកសយ ចាន់ឌី បានឱ្យដឹងទៀតថា ក្រោយពេលយើងឃាត់ខ្លួនពួកគេបានសារភាពថា ថ្នាំញៀនដែលបានយកមកប្រើប្រាស់នេះគឺឈ្មោះឆឹង ឃួនថាវី ជាអ្នកទិញ និងលក់បន្តឱ្យពួកគេ ។ ដូច្នេះឈ្មោះឆឹង ឃួនថាវី មានភារកិច្ច២ គឺទិញគ្រឿងញៀនយកមកលក់ឱ្យយុវជន៤នាក់ប្រើប្រាស់ផង និងខ្លួនឯងក៏ប្រើប្រាស់ផង ។ ចំណុចនេះហើយដែលលោកចាត់ទុកថា យុវជនទាំង៥នាក់មានអ្នកប្រព្រឹត្តបទល្មើសជួញដូរ និងមានអ្នកប្រើប្រាស់គ្រឿងញៀន ។ ក្រោយពីឃាត់ខ្លួន ទាំងមនុស្ស ទាំងវត្ថុតាងត្រូវបានបញ្ជូនទៅកាន់ទីបញ្ជាការកងរាជអាវុធហត្ថរាជធានីភ្នំពេញដើម្បីកសាងសំណុំរឿងបញ្ជូនទៅកាន់សាលាដំបូងតាមផ្លូវច្បាប់៕
ចែករំលែកព័តមាននេះ