រាជធានីភ្នំពេញ ៖ សម្តេចនាយករដ្ឋមន្ត្រីហ៊ុន សែន នឹងអញ្ជើញទៅប្រកាសទ្រព្យសម្បត្តិនៅទីស្តីការអង្គភាពប្រឆាំងអំពើពុករលួយនាវេលាម៉ោង៤រសៀលថ្ងៃសុក្រ ទី១ មេសា ២០១១ ស្អែកនេះ ។ នេះបើយោងតាមប្រធានអង្គភាពប្រឆាំងអំពើពុករលួយ លោកឱម យ៉ិនទៀង ដែលថ្លែងប្រាប់កោះសន្តិភាពតាមទូរស័ព្ទនៅព្រឹកថ្ងៃទី៣១ មីនា ។ លោកបង្ហើបឱ្យដឹងថា មកទល់នឹងពេលនេះមានមន្ត្រីជាន់ខ្ពស់រាជរដ្ឋាភិបាល រដ្ឋសភា និងព្រឹទ្ធសភាកម្ពុជាជាច្រើននាក់ហើយបានចូលមកប្រកាសទ្រព្យសម្បត្តិ និងបំណុលរបស់ខ្លួន ។ ក្នុងនោះលោកប្រធានអង្គភាពប្រឆាំងអំពើពុករលួយ ឱម យ៉ិនទៀង បញ្ជាក់ឱ្យដឹងទៀតថា សម្តេចអគ្គមហាពញាចក្រីហេង សំរិន ក៏បានប្រកាសទ្រព្យសម្បត្តិរួចរាល់ហើយដែរ ។
គួរបញ្ជាក់ថា កាលពីពេលថ្មីៗនេះអង្គភាពប្រឆាំងអំពើពុករលួយបានប្រកាសជូនដំណឹងដោយទុកពេលឱ្យមន្ត្រីជាប់កាតព្វកិច្ចប្រកាសទ្រព្យសម្បត្តិ និងបំណុលត្រឹមថ្ងៃទី៧ មេសា ២០១១ ខាងមុខ ក្នុងការមកប្រកាសទ្រព្យសម្បត្តិ និងបំណុលរបស់ខ្លួន ។ សេចក្តីជូនដំណឹងដដែលក៏បានបញ្ជាក់ទៀតថា មន្ត្រីទាំងឡាយណាដែលជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល ហើយគេចវេះមិនបានប្រកាស ត្រូវផ្តន្ទាទោសជាប់ពន្ធនាគារពី១ខែទៅ១ឆ្នាំ និងពិន័យជាប្រាក់ពី១សែនរៀលទៅ២លានរៀល ។ សូមបញ្ជាក់ផងដែរថា មកទល់នឹងពេលនេះមានមន្ត្រីរាជការ១ភាគ៤ប៉ុណ្ណោះដែលក្លាហានក្នុងការប្រកាសទ្រព្យសម្បត្តិ និងបំណុល ក្នុងចំណោមមន្ត្រី២ម៉ឺន៥ពាន់នាក់ ដែលជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល ។
គួរបញ្ជាក់ដែរថា មន្ត្រីដែលជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល គឺមន្ត្រីរាជការស៊ីវិល ដែលមានឋានៈចាប់ពីប្រធាននាយកដ្ឋាន និងមន្ត្រីយោធា នគរបាល ដែលមានឋានន្តរស័ក្តិចាប់ពីវរសេនីយ៍ឯកឡើងទៅ មន្ត្រីដែលមានអាណត្តិជ្រើសតាំងដូចជាក្រុមប្រឹក្សាឃុំ-សង្កាត់ ស្រុក ខណ្ឌ ខេត្ត-រាជធានី សមាជិករដ្ឋសភា សមាជិកព្រឹទ្ធសភា សមាជិករាជរដ្ឋាភិបាល ចៅក្រមអាសនៈ ចៅក្រមអយ្យការ សារការី ក្រឡាបញ្ជី និងអាជ្ញាសាលា ៕
ចែករំលែកព័តមាននេះ