ខេត្តរតនគិរី ៖ មន្ត្រីសាលាខេត្តម្នាក់ ២ខ្នងជាប់គ្នាត្រូវអគ្គិភ័យឆាបឆេះជះអណ្តាតភ្លើងសន្ធោសន្ធៅបង្កឱ្យមានការរន្ធត់ និងភ្ញាក់ផ្អើលកាលពីវេលាម៉ោងជាង១១យប់ថ្ងៃទី២៩ មេសា ២០១២ ស្ថិតក្នុងសង្កាត់ឡាបានសៀក ក្រុងបានលុង ទល់មុខបន្ទាយប៉េអឹមខេត្ត គឺឆេះរហូតសល់តែផេះផង់។
តាមប្រភពព័ត៌មានពីម្ចាស់ផ្ទះឈ្មោះឃេន ភោស៊ី ភេទប្រុស អាយុជាង៥០ឆ្នាំបានឱ្យដឹងថា គាត់ធ្វើការជាមន្ត្រីសាលាខេត្ត នៅផ្នែកអន្តរវិស្ស័យ ហើយផ្ទះដែលភ្លើងឆេះនេះជាផ្ទះធំមានទំហំ១២ម៉ែត្របួនជ្រុង ផ្ទះតូចមានទំហំ៦ម៉ែត្រគុណ៨ម៉ែត្រ ផ្ទះពីរជាប់គ្នាបានត្រូវភ្លើងឆេះផ្ទះតូចមុន ខណៈរូបគាត់ និងក្រុមគ្រួសារទទួលទានដំណេកលង់លក់យ៉ាងស្រួល ។ ផ្ទះគាត់ទាំងពីរខ្នងរស់នៅ៥គ្រួសារ កូនៗរៀបការហើយ៤នាក់ រស់នៅជាមួយគាត់ទាំងអស់ ដោយឡែកមនុស្សដេកក្នុងផ្ទះគ្មាននរណាម្នាក់បានរងគ្រោះដោយសារភ្លើងឆេះផ្ទះនេះទេ គ្រាន់តែរបស់របរប្រើប្រាស់ក្នុងផ្ទះភ្លើងឆេះអស់ខ្ទេចខ្ទីអស់គ្មានសល់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ