ការប្រកួតបាល់ទាត់អង់គ្លសេឆេមពានស៊ីប ត្រូវបានបញ្ចប់ហើយកាលពីរាត្រីថ្ងៃសៅរ៍ទី២៨ មេសា ឆ្នាំ២០១២ ហើយវាគឺជាការបើកទំព័រប្រវត្តិសាស្ត្រថ្មីមួយសម្រាប់ក្លឹប Southampton ដែលបានបំបាក់ក្លឹប Coventry ដោយលទ្ធផល ៤-០ កក់បានកៅអី១ រួមដំណើរជាមួយក្រុមកំពូលតារាង Reading ឡើងទៅលេងនៅក្នុងក្របខណ្ឌអង់គ្លេសប្រឺមីញេលីកនៅរដូវកាលក្រោយ ។
គ្រាប់បាល់៤គ្រាប់ដែលបានមកពីកីឡាករ៤រូបគឺ Sharp, Jose Fonte, Jos Hooiveld និង Adam បានជួយឱ្យក្លឹប Southampton មានឱកាសបង្ហាញវត្តមាននៅក្នុងក្របខណ្ឌអង់គ្លេសប្រឺមីញេលីកជាលើកទី១ គិតចាប់តាំងពីឆ្នាំ២០០៥ ។
លោកAdkins គ្រូបង្វឹកក្លឹប Southampton បានឱ្យដឹងថា ខ្ញុំមានការសប្បាយរីករាយ និងមានមោទនភាពខ្លាំងណាស់ដែលបានជួយឱ្យក្លឹបនេះវិលត្រឡប់មកលេងនៅក្នុងក្របខណ្ឌអង់គ្លេសប្រឺមីញលីកវិញ ។
ចំណែកឯកីឡាករ ចាំទី Kelvin Davis បាននិយាយក្រោយពីទទួលបានជ័យជម្នះថា បាល់ទាត់អង់គ្លេសប្រឺមីញេលីកគឺជាក្របខណ្ឌកំពូលរបស់អង់គ្លេសដែលយើងគ្រប់ៗគ្នាប្រាថ្នាចង់មកលេង ឥឡូវនេះក្តីប្រាថ្នារបស់យើងបានសម្រេចហើយ ។គួររំលឹកដែរថា ការប្រកួតបាល់ទាត់អង់គ្លេសឆេមពានស៊ីបបានបញ្ចប់ហើយ កាលពីរាត្រីថ្ងៃសៅរ៍ទី២៨ មេសា ឆ្នាំ២០១២ ។ ក្រុមReading និង Southampton ដឹកដៃគ្នាឡើងទៅលេងនៅប្រឺមីញេលីក ចំណែកឯក្រុម West Ham, Birmingham, Blackpool និង Cardiff រង់ចាំលេងវគ្គ Play off ដណ្តើមគ្នាយកកៅអី១ ឡើងទៅលេងនៅប្រឺមីញេលីក ។
ដោយឡែកក្រុមបាតតារាងបីគឺ Portsmouth, Coventry និង Doncaster ត្រូវធ្លាក់ទៅលេងនៅលីកវ័ននារដូវកាលក្រោយ ៕
ចែករំលែកព័តមាននេះ