រាជធានីភ្នំពេញ ៖ លោកជំទាវឧកញ៉ា ភាព ហៀក ប្រធានក្រុមប្រឹក្សាភិបាលក្រុមហ៊ុន Khmer Brewery Limited ទទួលបានប័ណ្ណសរសើរពីក្រសួងបរិស្ថាន ដែលមានស្នាដៃល្អក្នុងការបំពេញការងារក្នុងឆ្នាំ២០១១ ។ ប័ណ្ណសរសើរនេះក្រុមហ៊ុនទទួលបានក្នុងឱកាសប្រារព្ធសន្និបាតបូកសរុបលទ្ធផលការងារបរិស្ថានឆ្នាំ២០១១ និងទិសដៅការងារឆ្នាំ២០១២ នៅសាលសន្និសីទចតុមុខ កាលពីរសៀលថ្ងៃទី២៦ មេសា ។
លោក ជា សាន នាយកគ្រប់គ្រងគុណភាពស្រាបៀរប្រចាំនៅក្រុមហ៊ុន Khmer Brewery Limited មានប្រសាសន៍ឱ្យដឹងថា ក្រុមហ៊ុន Khmer Brewery Limited មានទីតាំងនៅភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ ជាក្រុមហ៊ុនដែលមានអាយុកាលថ្មី ទើបនឹងចេញផលិតស្រាបៀរកម្ពុជាលក់នៅលើទីផ្សារកាលពីខែវិច្ឆិកា ឆ្នាំ២០១១ កន្លងមកនេះ។ ក្រុមហ៊ុនបានយកចិត្តទុកដាក់ជាសំខាន់នៅក្នុងការរក្សាបរិស្ថាន ជាពិសេសរាល់សំណល់ទាំងអស់ដែលកើតចេញពីសង្វាក់ផលិតកម្មត្រូវបានគ្រប់គ្រងត្រឹមត្រូវទៅតាមប្រភេទសំណល់ ។
ជាក់ស្តែងកាកសំណល់ក្រុមហ៊ុនយកទៅលក់ឱ្យកសិដ្ឋានចិញ្ចឹមសត្វយកទៅច្នៃធ្វើជាចំណីសត្វ។ ចំណែកសំណល់ប្រភេទមេស្រាយកលក់ឱ្យកសិដ្ឋានជីកំប៉ុស្ត ហើយសំណល់រឹង សំណល់ក្នុងផ្ទះ និងសំណល់រាវ មុននឹងបញ្ចេញទៅតាមប្រព័ន្ធសាធារណៈ ក្រុមហ៊ុនមានអាងប្រតិកម្មទំនើបមួយដែលប្រើប្រព័ន្ធបច្ចេកវិទ្យាពីរបញ្ចូលគ្នា ដើម្បីសម្អាតកាកសំណល់ជាមុន ទើបបញ្ចេញទៅតាមប្រពន័ន្ធសាធារណៈនានា ។ ដោយសារតែក្រុមហ៊ុនយកចិត្តទុកដាក់ក្នុងការគ្រប់គ្រងបរិស្ថាន ដើម្បីកុំឱ្យមានផលប៉ះពាល់ដល់បរិស្ថាន ក៏ដូចជាសង្គមជាតិទាំងមូល ទើបក្រុមហ៊ុន Khmer Brewery Limited ទទួលបានប័ណ្ណសរសើរពីក្រសួងបរិស្ថាន ដែលមានស្នាដៃល្អក្នុងការបំពេញការងារក្នុងឆ្នាំ២០១១ ។
ក្នុងឱកាសនោះ លោកឧកញ៉ា លាង ម៉េង អគ្គនាយកក្រុមហ៊ុន ជីបម៉ុង តំណាងដ៏ខ្ពង់ខ្ពស់របស់លោកជំទាវឧកញ៉ា ភាព ហៀក ប្រធានក្រុមប្រឹក្សាភិបាលក្រុមហ៊ុន Khmer Brewery Limited ជាអ្នកទៅទទួលប័ណ្ណសរសើរពីឧបនាយករដ្ឋមន្ត្រីនៃព្រះរាជាណាចក្រកម្ពុជា យឹម ឆៃលី ៕
ចែករំលែកព័តមាននេះ