ខេត្តកំពត ៖ នៅក្នុងភូមិសាស្ត្រព្រៃសហគមន៍មួយ ស្ថិតក្នុងភូមិព្រែកត្នោត ឃុំព្រែកត្នោត ស្រុកទឹកឈូ ខណ្ឌរដ្ឋបាលព្រៃឈើកំពត បានធ្វើពិធីចុះកិច្ចព្រមព្រៀងសហគមន៍ព្រៃឈើ នៅថ្ងៃទី២៦ មេសា ក្រោមអធិបតីភាពលោកហេង វន្ថា អភិបាលរងខេត្ត និងលោកស្រីបណ្ឌិតអ៊ូ ស៊ីរីតា អនុប្រធានរដ្ឋបាលព្រៃឈើ ។
ចូលរួមជាកិត្តិយសក្នុងពិធីចុះកិច្ចព្រមព្រៀងព្រៃសហគមន៍នេះមានលោកស្រី ហ៊ូ កល្យាណ តំណាងអ្នកសម្របសម្រួលកម្មវិធីរបស់រីខូស (RECOFTC) នៅកម្ពុជា តំណាងអង្គការដានីដា (DANIDA) នៅកម្ពុជា លោកនាយអធិការដ្ឋានឈូងសមុទ្រ នាយ-នាយរងខណ្ឌ នាយ-នាយរងផ្នែករដ្ឋបាលព្រៃឈើ នាយ-នាយសង្កាត់រដ្ឋបាលព្រៃឈើ ប្រធានទីប្រឹក្សាប្រចាំខេត្តកំពត និងតំណាងដៃគូអភិវឌ្ឍន៍ក្នុងខេត្តកំពត អភិបាល អភិបាលរងស្រុក មេឃុំ មេភូមិ លោកគ្រូ អ្នកគ្រូ សិស្សា នុសិស្ស មន្ត្រីកងរាជអាវុធហត្ថ និងអធិការនគរបាលស្រុក ព្រមទាំងព្រះសង្ឃ និងសមាជិកសហគមន៍មកពីបួនសហគមន៍ក្នុងស្រុកពីរ គឺស្រុកទឹកឈូ និងស្រុកដងទង់សរុបមនុស្សចូលរួម៣៥០នាក់ ។
លោកស៊ឹម ឡាបុ័ង នាយខណ្ឌរដ្ឋបាលព្រៃឈើកំពត បានថ្លែងថា ពិធីចុះកិច្ចព្រមព្រៀងព្រៃសហគមន៍នេះ មានចំនួន៤សហគមន៍ដែលមានផ្ទៃដីសរុបចំនួន១.៩៣៦ហិកតា មានសមាជិកចូលរួមចំនួន២.១៣៩គ្រួសារ ស្មើនឹង៥.៩១៣នាក់ ស្រី៤.២២០នាក់ មានក្នុងឃុំព្រៃឃ្មុំ ឃុំព្រៃថ្នង ឃុំព្រែកត្នោត ស្រុកទឹកឈូ និងឃុំស្រែជាខាងត្បូង ស្រុកដងទង់ រូមមានទី១-សហគមន៍ព្រៃឈើជ្រោះកង្កែប ឃុំព្រៃឃ្មុំ ស្រុកទឹកឈូ មានផ្ទៃដីចំនួន៨៥ហិកតា ទី២-សហគមន៍ព្រៃឈើគុបធ្យូង ឃុំព្រៃថ្នង ស្រុកទឹកឈូ មានផ្ទៃដីចំនួន១២១ហិកតា ទី៣-សហគមន៍ព្រៃឈើព្រែកត្នោត ឃុំព្រែកត្នោត ស្រុកទឹកឈូមានផ្ទៃដីចំនួន១.០០៧ហិកតា ទី៤-សហគមន៍ព្រៃឈើភ្នំទទឹប ឃុំស្រែជាខាងត្បូង ស្រុកដងទង់ មានផ្ទៃដីចំនួន៧២៣ហិកតា ។ សហគមន៍ព្រៃឈើមុននេះ មានការឧបត្ថម្ភគាំទ្រពីគម្រោងគ្រប់គ្រងព្រៃឈើដោយនិរន្តរភាព និងឧបត្ថម្ភថវិកាដោយសហភាពអឺរ៉ុប និងអង្គការដានីដា (DANIDA) សហការជាមួយរដ្ឋបាលព្រៃឈើ។
លោកបន្តថា ដោយមើលឃើញពីភាពបាត់បង់ធនធានព្រៃឈើដែលកើតមានចំពោះមុខក្រសួងកសិកម្មរុក្ខា ប្រមាញ់ និងនេសាទ ដឹកនាំដោយលោកបណ្ឌិតច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដឹកនាំអនុវត្ត និងដាក់ចេញផែនការគោលនយោបាយចតុកោណរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា និងដោយមានការគាំទ្រ និងសហការពីអាជ្ញាធរគ្រប់លំដាប់ថ្នាក់បានអនុវត្តគោលនយោបាយវិមជ្ឈការ ដោយផ្តល់សិទ្ធិការទទួលខុសត្រូវដល់សហគមន៍មូលដ្ឋានក្នុងការចូលរួមគ្រប់គ្រងព្រៃសហគមន៍ដែលបង្កើតឡើងក្នុងគោលបំណងរក្សាបាននូវធនធានព្រៃឈើ សត្វព្រៃ និងការប្រើប្រាស់អនុផលព្រៃឈើឱ្យមាននិរន្តរភាព ។ ដូច្នេះយើងត្រូវសហការយ៉ាងជិតស្និទ្ធរវាងរដ្ឋបាលព្រៃឈើមូលដ្ឋាន អាជ្ញាធរគ្រាប់លំដាប់ថ្នាក់ អង្គការមិនមែនរដ្ឋាភិបាល និងស្ថាប័នពាក់ព័ន្ធនានា ជាពិសេសសហគមន៍មូលដ្ឋានផ្ទាល់ ។
លោកស៊ឹម ឡាបុ័ង បានថ្លែងអំណរគុណចំពោះលោកអភិបាលខេត្តកំពត អង្គការដានីដា អង្គការ RECOFTC និងសូមអំពាវដល់អង្គការជាតិ និងអន្តរជាតិ ម្ចាស់ជំនួយនានា ដើម្បីបន្តជួយពង្រឹងការកាំទ្រដល់ការអភិវឌ្ឍសហគមន៍ព្រៃឈើ ដើម្បីបង្កើនជីវភាពដល់សហគមន៍មូលដ្ឋាន ពិសេសប្រជាពលរដ្ឋរស់នៅតំបន់ឆ្នេរដែលងាយរងគ្រោះដោយផលប៉ះពាល់ពីការប្រែប្រួលអាកាសធាតុ ដែលជាកង្វល់រួមរបស់មនុស្សជាតិទាំងមូល ។
លោកហេង វន្ថា អភិបាលរងខេត្តមានប្រសាសន៍ថ្លែងអំណរគុណចំពោះកិច្ចខិតខំប្រឹងប្រែងពីថ្នាក់ដឹកនាំក្រសួងកសិកម្ម រុក្ខា ប្រមាញ់ និងនេសាទ ក៏ដូចជាមន្ត្រីថ្នាក់ដឹកនាំ រដ្ឋបាលព្រៃឈើគ្រប់លំដាប់ថ្នាក់ និងថ្លែងកោតសរសើរចំពោះលោកនាយខណ្ឌរដ្ឋបាលព្រៃឈើកំពត ព្រមទាំងអង្គការដានីដាជាម្ចាស់ជំនួយ និងគំរោងគ្រប់គ្រងព្រៃឈើដោយនិរន្តរភាព និងលើកកម្ពស់របរចិញ្ចឹមជីវិតនៅជនបទតាមរយៈសហគមន៍ព្រៃឈើ ៕
ចែករំលែកព័តមាននេះ