រាជធានីភ្នំពេញ ៖ ព្រឹកថ្ងៃទី២៦ មេសា ២០១២ មានអ្នកភូមិចម្រុះគ្នាប្រមាណ៨០នាក់ ខ្លះមកពីបុរីកីឡា និងបឹងកក់ ក្រោមការរៀបចំពីលោករ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានទៅជួបជុំគ្នានៅទីលានប្រជាធិបតេយ្យ ដើម្បីធ្វើការទាមទារនិងសុំការជួយអន្តរាគមន៍ពីសម្តេច
រាជធានីភ្នំពេញ ៖ ព្រឹកថ្ងៃទី២៦ មេសា ២០១២ មានអ្នកភូមិចម្រុះគ្នាប្រមាណ៨០នាក់ ខ្លះមកពីបុរីកីឡា និងបឹងកក់ ក្រោមការរៀបចំពីលោករ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានទៅជួបជុំគ្នានៅទីលានប្រជាធិបតេយ្យ ដើម្បីធ្វើការទាមទារនិងសុំការជួយអន្តរាគមន៍ពីសម្តេចតេជោហ៊ុន សែន ។ ការតវ៉ារបស់ប្រជាពលរដ្ឋ ក្រោមការរៀបចំរបស់លោករ៉ុង ឈុន នេះមានការអនុញ្ញាតពីសាលារាជធានីភ្នំពេញ ប៉ុន្តែត្រូវអនុវត្តតាមកិច្ចព្រមព្រៀងលើកំណត់ហេតុនៃការជួបជុំ ជាមួយអាជ្ញាធររាជធានី កាលពីថ្ងៃទី២៥ មេសា ។
ការតវ៉ានេះមានការជួបជុំគ្នានៅទីលានប្រជាធិបតេយ្យ រួមមានការហែក្បួនដើម្បីយកញ្ញត្តិ ជូនខុទ្ទកាល័យសម្តេចតេជោ នៅវិមានឯករាជ្យ ដោយដង្ហែក្បួនចេញពីទីលានប្រជាធិបតេយ្យតាមមហាវិថីព្រះនរោត្តម ចូលតាមផ្លូវក្រោយរាជវាំង កាត់តាមផ្លូវមុខវត្តបទុមវតី និងឆ្ពោះទៅក្រោមដើមពោធិ៍វិមានឯករាជ្យតែម្តង ។ បន្ទាប់ពីតំណាងខុទ្ទកាល័យទទួលញ្ញត្តិរួច តំណាងសមាគមគ្រូបង្រៀនកម្ពុជាឯករាជ្យ លោករ៉ុង ឈុន ដែលជាអ្នកដឹកនាំនោះបានតម្រូវឱ្យប្រកាសរំសាយដើម្បីរង់ចាំចម្លើយ។ ប៉ុន្តែតំណាងអ្នកតវ៉ាដែលមានក្រុមខុសគ្នា គឺខ្លះមកពីបុរីកីឡា និងខ្លះមកពីបឹងកក់ ហាក់មិនស្តាប់លោករ៉ុង ឈុន ជាមេខ្លោងរបស់ខ្លួនទេ នៅតែបន្តស្រែកតវ៉ាទៀត។ លុះក្រោយមកមានការរំសាយដោយខ្លួនឯងតែម្តង ។ ក្រុមអ្នកតវ៉ាមកពីតំបន់បឹងកក់កាន់មេក្រូក្បាលឆែងម៉ែង គឺអ្នកស្រីទេព វន្នី គេស្គាល់ច្បាស់គ្រប់បាតុកម្ម តែងមានមុខមាត់លេចធ្លោជាងគេ ដែលគេស្គាល់ទៀតថា ជាសកម្មជនរបស់គណបក្សសម រង្ស៊ីប្រចាំបឹងកក់។
អាជ្ញាធររាជធានីភ្នំពេញបានធ្វើការចោទប្រកាន់ត្រង់ៗទៅលើលោករ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យដែលបានដឹកនាំអ្នកភូមិបុរីកីឡាជួបជុំគ្នាដង្ហែញ្ញត្តិតវ៉ាសុំឱ្យសម្តេចតេជោជួយអន្តរាគមន៍ គឺធ្វើខុសនូវអ្វីដែលខ្លួនបានសន្យា និងព្រមព្រៀងគ្នា ជាមួយអាជ្ញាធររាជធានី ។ អាជ្ញាធរក្រុងនិយាយថា លោករ៉ុង ឈុន ខ្លួនឯងកន្លងមកតែងតែស្រែកក្តែងៗថា ខ្លួនធ្វើពិតជាគោរពច្បាប់ និងគោរពពាក្យសន្យាជាដើម ប៉ុន្តែការដឹកនាំក្បួនតវ៉ានាថ្ងៃទី២៦ មេសា នេះគឺធ្វើផ្ទុយពីអ្វីដែលខ្លួនបានសន្យា និងព្រមព្រៀងគ្នា ។
មន្ត្រីជាន់ខ្ពស់សាលារាជធានីភ្នំពេញ ម្នាក់បានឱ្យកោះសន្តិភាពដឹងថា ការដឹកនាំការជួបជុំគ្នា និងហែក្បួនរបស់លោករ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ នាព្រឹកថ្ងៃទី២៦មេសានេះ ធ្វើខុសនូវអ្វីដែលបានព្រមព្រៀងគ្នានៅក្នុងការជួបជាមួយអាជ្ញាធររាជធានី កាលពីថ្ងៃទី២៥ មេសា។ ពេលសុំច្បាប់នោះ លោកបានព្រមព្រៀងនូវចំនួន៦ចំណុច លើកំណត់ហេតុច្បាស់លាស់ ។ ត្រង់ចំណុចទី២ កំណត់ហេតុបានសរសេរច្បាស់ណាស់ គឺចំពោះអ្នកចូលរួមក្នុងការជួបជុំនៅទីលានប្រជាធិបតេយ្យ និងអ្នកដង្ហែ គឺសុទ្ធសឹងជាប្រជាពលរដ្ឋបុរីកីឡា ហើយស្នាមមេដៃក្នុងញ្ញត្តិក៏ត្រូវតែជាស្នាមមេដៃរបស់ពួកគាត់ដែរ ។ ក្នុងករណីមានការបន្លំស្នាមមេដៃ និងសមាសភាពអ្នកផ្សេងចូលនោះ សមាគមគ្រូបង្រៀនកម្ពុជាឯករាជ្យ ដែលលោករ៉ុង ឈុន ជាប្រធានត្រូវទទួលខុសត្រូវចំពោះមុខច្បាប់ និងបណ្តឹងពាក់ព័ន្ធផ្សេងៗ ។ ប៉ុន្តែផ្ទុយទៅវិញ ទាំងការជួបជុំ និងការហែក្បួននោះ លោករ៉ុង ឈុន បានប្រមែប្រមូលទាំងអ្នកបុរីកីឡា អ្នកបឹងកក់ អ្នកស្ទឹងមានជ័យ និងអ្នកត្រពាំងឈូកជាដើម ដែលមានចំនួនសរុបប្រមាណ៨០នាក់ឱ្យទៅចូលរួម។
មន្ត្រីសាលារាជធានីភ្នំពេញដដែលនោះបានឱ្យដឹងទៀតថា លោករ៉ុង ឈុន ខ្លួនឯងដែលធ្លាប់តែស្រែកក្តែងៗថា លោកជាអ្នកគោរពច្បាប់ សិទ្ធិ និងគោរពពាក្យសន្យានោះគឺវាផ្ទុយស្រឡះ ពីការពិតទាំងស្រុង ។ បើធ្វើបែបនេះ តើនិយាយអ្វីឱ្យគេជឿបានទៀតទេ ? ម្យ៉ាងទៀតនោះលោកមិនអាចគ្រប់គ្រងសមាជិកដែលចូលរួមបានផង គឺក្រុមអ្នកផ្សេងៗដូចជាអ្នកបឹងកក់ជាដើម មិនគោរពតាមពាក្យសម្តីដែលបានសន្យា ។ ក្រុមប្រជាពលរដ្ឋមួយចំនួនតូចនេះដែលប្រមូលពីកន្លែងផ្សេងៗនោះសុទ្ធសឹងជាអ្នកមិនមានឯកសារអ្វីទាំងអស់ ជាអ្នកកេងចំណេញ នឹងមិនត្រូវទទួលការដោះស្រាយគោលនយោបាយនោះ ទេ ។ មិនដូចក្រុមអ្នកតវ៉ានៅបុរីកីឡា មួយចំនួនធំ ពួកគាត់បានទៅជួបជុំនិងដោះស្រាយគ្នានៅស្នងការដ្ឋាននគរបាលរាជធានី នាព្រឹកថ្ងៃនេះដែរ គឺពួកគាត់មានការទាមទារតាមច្បាប់រដ្ឋបាលត្រឹមត្រូវ មានឯកសារកាន់ក្នុងដៃ ។ ឯអ្នកដទៃទៀតផ្អើលតាមគេឯងក្នុងបំណងបង្កភាពអនាធិបតេយ្យ ។
ក្រុមអ្នកវិភាគជាក្រុមគ្រូបង្រៀនបាននិយាយថា លោករ៉ុង ឈុន ដឹកនាំប្រជាពលរដ្ឋតវ៉ាលើបញ្ហាដីធ្លីខុសពីទិសដៅរបស់សមាគមគ្រូបង្រៀនកម្ពុជាឯករាជ្យរបស់ខ្លួន ។ លោកធ្វើបែបនេះតើនៅពេលខាងមុខ ធ្វើយ៉ាងណាឱ្យគ្រូបង្រៀនមានការជឿជាក់បានទៅ ? ដែលកន្លងមកសមាគមគ្រូបង្រៀនកម្ពុជាឯករាជ្យតែងតែមានការដឹកនាំទាមទារតំណាងឱ្យគ្រូបង្រៀនដ៏មានកិត្តិយសឱ្យធ្វើការតវ៉ាផ្សេងៗ តែពេលនេះលោករ៉ុង ឈុន បែរជាមកដឹកនាំទាមទារនូវបញ្ហាដីធ្លី ដែលខ្លះចេញពីសំណង់អនាធិបតេយ្យ ទៅវិញ ប្រហែលជាអស់មានគ្រូបង្រៀនណាសម្រាប់ដឹកនាំទៀតហើយមើលទៅ ។
គួរបញ្ជាក់ថា បើតាមការអះអាងពីមន្ត្រីរាជធានីភ្នំពេញបានឱ្យដឹងថា សាលារាជធានីភ្នំពេញបានអនុញ្ញាតឱ្យតំណាងសមាគមគ្រូបង្រៀនកម្ពុជាឯករាជ្យដែលដឹកនាំដោយលោករ៉ុង ឈុន នោះមានការជួបជុំគ្នានៅទីលានប្រជាធិបតេយ្យ ជាអ្នកបុរីកីឡាសុទ្ធសាធ ។ មានការអនុញ្ញាតហែក្បួនដែលមានតំណាងតែ២០រូប ដើម្បីយកញ្ញត្តិជូនខុទ្ទកាល័យសម្តេចតេជោ ប៉ុន្តែក្រុមអ្នកតវ៉ានោះមិនអនុវត្តតាមការព្រមព្រៀងគ្នានោះទេ បែរជាហែក្បួនមានសមាជិកជាង៨០នាក់ បង្កឱ្យមានការស្ទះផ្លូវចរាចរណ៍បង្កការលំបាកដល់អាជ្ញាធរសណ្តាប់ធ្នាប់ ៕
ចែករំលែកព័តមាននេះ